قاس-قاعىم ءسات. بۇل دا ءبىر داۋرەن. ءداۋىر دارىندارىنىڭ تاماشا ءبىر ساپارى سول كەزدەگى گۋرەۆ وبلىسى, تەڭىز اۋدانى, وكتيابر كەڭشارىندا جالعاسىن تابادى. قازىر بۇل ايماق اتىراۋ وبلىسى, قۇرمانعازى اۋدانى, نۇرجاۋ اۋىلدىق وكرۋگى دەپ اتالاتىنى ايان.
– شىنىندا دا بۇل سيرەك سۋرەت. سوناۋ 1976 جىلدىڭ ناۋرىز ايىندا قازاق مەملەكەتتىك اكادەميالىق دراما تەاترىنىڭ بەلدى اكتريسالارى ءسابيرا مايقانوۆا, حابيبا ەلەبەكوۆا, جاس اكتريسا نۇكەتاي مىشباەۆا, اتاعى ەندى دۇركىرەپ شىعىپ كەلە جاتقان ءاسانالى ءاشىموۆ, قۇمان تاستانبەكوۆ قوسىلعان جاس اكتەرلارى بار بريگادا نۇرجاۋ اۋىلدىق وكرۋگىنە كەلدى. سول كەزدەگى وكتيابر كەڭشارىنىڭ باسشىسى مۇعال ناۋرىزباەۆ ەلگە بەدەلدى, رەسپۋبليكاعا تانىمال ازامات بولاتىن. ونىڭ سول كۇنى قولى بوساماي قالىپ, قوناقتاردىڭ جارتىسى – جىگىتتەر ءبىزدىڭ ۇيگە, قىزدار باسقا ۇيگە تۇسەتىن بولدى. مەن كەڭشاردىڭ ۆەتەرينارلىق دارىگەرىمىن. قوناقتاردىڭ جاندارىندا قىدىرسيىق ەسىمدى اۋداندىق گازەتتىڭ ءفوتوتىلشىسى ءجۇر. اكتريسالار اۋدان مىنگىزىپ جىبەرگەن «ۆولگادا». ءاسانالى مەن قۇماندارعا «ۋاز» كولىگى بۇيىرىپتى.
مالدىڭ تولدەپ جاتقان كەزى. وزدەرى ون شاقتى ادام. ولاردىڭ گۋرەۆتەن باستالعان ساپارى اۋدانعا, ودان ءارى شوپاندار اۋىلىنا ۇلاسادى. سول زاماندا تانىمال ونەر ۇجىمدارى ەگىن, ءتول الۋ ناۋقانى كەزىندە ەلدى مەكەندەردى ارالاپ, كونتسەرت قويىپ, حالىقپەن ديدارلاساتىن ءۇردىس بار ەدى. الماتىدان كەلگەن اتاقتى اكتەرلار ءبىزدىڭ ۇيدە ەكى كۇن قوندى.
كسرو حالىق ءارتىسى ءسابيرا مايقانوۆانىڭ اڭگىمەلەرى كەرەمەت قىزىقتى. ال ءاسانالى ءاشىموۆ پەن قۇمان تاستانبەكوۆتەر وتە قاراپايىمدىلىعىمەن ەستە قالدى. ءاسانالىنىڭ ىشىگى بار ەكەن. قۇماندا قارا تون بولدى. اكتريسالار قۇندىز جاعالى پالتو كيىپ العان. ول كەزدە بۇل ءبىزدىڭ اۋىلدىڭ ايەلدەرىنە وتە قىمبات كيىمدەر بولىپ كورىنەتىن. جانىمىز قالماي بارىمىزدى الدارىنا توسىپ, قۇرمەتتەپ كۇتتىك. بۇل كۇندەر بىزگە ماڭگىلىك ەستە قالعان سىي بولدى. قازاقتىڭ قادىرلى ونەرپازدارى الماتىعا قايتقاننان كەيىن وتباسىلىق البوم قۇراستىرىپ, ءبىر جاساپ قالدىق.
بۇل سۋرەتتە ەكى بىردەي اتاقتى اكتەردىڭ ورتاسىندا وتىرعان تۇڭعىشىمىز ستەللا. قازاق ۇلتتىق ۋنيۆەرسيتەتىن ءبىتىردى. قازىر اتىراۋ قالاسىندا تۇرادى. ءوز ماماندىعى بويىنشا بىلىكتى قىزمەتكەر. ۇلدى بولدى, قىزدى بولدى. باقىتتى انا! – دەيدى ەلدىڭ سىيلى ازاماتى, ەڭبەك ارداگەرى نۇرسيىق اقمۇرزين اعامىز.
ايناش ەسالي,
«ەگەمەن قازاقستان»
الماتى
