جامبىل وبلىسى تاريحي-مادەني نىساندارعا باي ولكەنىڭ ءبىرى. ەجەلگى تاراز تاريحىنىڭ ءوزى ادامزات تاريحىمەن استاس رۋحاني قۇندىلىق. بۇگىنگى تاڭدا ءوڭىردىڭ الەۋەتىن ارتتىرۋ, ەكونوميكاسىن كوتەرۋ, وتاندىق ءتۋريزمدى دامىتۋ ماقساتىندا كونە اۋليەاتا ايماعىن تۋريستىك ورتالىققا اينالدىرۋ جۇمىستارى قولعا الىنۋدا.
وسى ورايدا تاراز قالاسىندا ەلباسى نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىن ىسكە اسىرۋ اياسىنداعى ءتۋريزمدى دامىتۋ ماسەلەلەرى بويىنشا قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن جامبىل وبلىسى اۋماعىندا ورنالاسقان «ەجەلگى تاراز ەسكەرتكىشتەرى» قورىق-مۋزەيىنە قاراستى «اقىرتاس» كەشەنىندە رەسپۋبليكالىق بۇقارالىق اقپارات قۇرالدارى وكىلدەرىنە ارنالعان ءباسپاسوز كونفەرەنتسياسى ءوتتى.
كونفەرەنتسيانىڭ ماقساتى – ەلىمىزدەگى ءتۋريزمدى دامىتۋ, تاريحي, كيەلى ەسكەرتكىشتەردى زەرتتەۋ جانە ناسيحاتتاۋ. مينيستر ارىستانبەك مۇحامەدي ۇلى توراعالىق ەتكەن كونفەرەنتسيا جۇمىسىنا جامبىل وبلىسىنىڭ اكىمى اسقار مىرزاحمەتوۆ, «قازاقستان تەمىر جولى» ۇلتتىق كومپانياسى» اق-نىڭ وكىلدەرى, ەلىمىزگە تانىمال عالىمدار مەن رەسپۋبليكالىق بۇقارالىق اقپارات قۇرالدارىنىڭ باسشىلارى قاتىستى.
جيىن بارىسىندا يۋنەسكو-نىڭ بۇكىلالەمدىك مۇرالار تىزىمىنە جانە قازاقستاننىڭ جالپىۇلتتىق ماڭىزى بار كيەلى جەرلەرىنىڭ تىزىمىنە ەنگەن «اقىرتاس» كەشەنىن جانە جامبىل وڭىرىندەگى وزگە دە تاريحي نىسانداردى تۋريستىك ورتالىققا اينالدىرۋ ماسەلەسى تالقىلاندى. جالپى, ءبىر جارىم عاسىرعا جۋىق ۋاقىت بەدەرىندە «اقىرتاس» كەشەنى زەرتتەلىپ كەلەدى. ەندى اتالعان كەشەندى ءوزىمىز تانىپ قانا قويماي, وزگەلەرگە دە تانىتۋ ماقساتىندا كەشەن اۋماعىن تۋريستىك ورتالىققا اينالدىرۋ ماسەلەسى كۇن تارتىبىندە تۇر. وسى ماقساتتا قازاقستان رەسپۋبليكاسى مادەنيەت جانە سپورت مينيسترلىگى, جامبىل وبلىسىنىڭ اكىمدىگى جانە «قازاقستان تەمىر جولى» ۇلتتىق كومپانياسى» اق ۇشجاقتى مەموراندۋمعا قول قويدى.
سونىمەن قاتار «اقىرتاس» كەشەنىنىڭ ساپار ورتالىعىندا «ەجەلگى تاراز ەسكەرتكىشتەرى» قورىق-مۋزەيىنىڭ جىلجىمالى «رۋحاني جاڭعىرۋعا 1 جىل» اتتى كورمەسى ءوتىپ, كورمەگە وبلىس اۋماعىنداعى تاريحي ورىنداردا جۇرگىزىلگەن ارحەولوگيالىق قازبا جۇمىستارى بارىسىندا تابىلعان جادىگەرلەر قويىلدى.
حاميت ەسامان,
«ەگەمەن قازاقستان»
جامبىل وبلىسى
