قالا پوليتسياسى ءوزىنىڭ Twitter-دەگى ميكروبلوگىندا اتالعان وقيعانىڭ سالدارىنان مەرت بولعاندار دا زارداپ شەككەندەر دە بار ەكەندىگىن جازدى جانە قالىڭ كوپشىلىكتى ميۋنستەر قالاسىنىڭ ورتالىعىنا بارماي تۇرا تۇرۋدى سۇرادى.
Spiegel جۋرنالىنىڭ جازۋىنشا, بيلىك وكىلدەرى بۇل وقيعانى تەراكت دەپ باعالاپ وتىر. قىلمىسكەر ءوزىن-ءوزى ءولتىردى دەگەن دە حابار بار. باسىلىمنىڭ جازۋىنشا, زارداپ شەككەندەر سانى 50-دەن اسادى. وقيعادان ەكى ادام قايتىس بولعان. ميۋنستەردىڭ ورتالىعىن ءتارتىپ ساقشىلارى قورشاۋعا الىپ, قازىر وندا كەڭ اۋقىمدى ارنايى وپەراتسيا ءجۇرىپ جاتىر. پوليتسيا حالىقتى تەكسەرىلمەگەن, جالعان اقپاراتتاردى جەلى ارقىلى تاراتپاۋعا شاقىرىپ وتىر.
قازاقستاننىڭ سىرتقى ىستەر مينيسترلىگى گەرمانيانىڭ ميۋنستەر قالاسىندا بولعان وقيعادان زارداپ شەككەندەردىڭ اراسىندا قازاقستاندىقتاردىڭ بار-جوعىن تەكسەرىپ جاتىر.
ء«بىز قازىر گەرمانيانىڭ وڭتۇستىگىندەگى ميۋنستەر قالاسىندا كولىكتىڭ ادامداردى باسىپ كەتۋ وقيعاسىنان مەرت بولعاندار مەن زارداپ شەككەندەردىڭ اراسىندا قازاقستاندىق بار ما, جوق پا, سول جاعىن تەكسەرىپ جاتىرمىز. قازاقستاننىڭ گەرمانياداعى ەلشىلىگىنىڭ ديپلوماتتارى جەرگىلىكتى پوليتسيامەن تىعىز بايلانىستا»,-دەپ جازدى ءوزىنىڭ Facebook-تەگى پاراقشاسىندا ءسىم-ءنىڭ ءباسپاسوز قىزمەتىنىڭ جەتەكشىسى ءانۋار جايناقوۆ.
