ەلىمىز ەگەمەندىك العالى ەڭسەرگەن ەڭبەكتەرىمىز ۇشان-تەڭىز ەكەنىنە ەشكىم دە داۋ ايتا الماس. دەگەنمەن حالىقتىڭ الەۋمەتتىك جاعدايىن جان-جاقتى ويلاستىرعان بۇل تاريحي قادامنىڭ قازاقستاندىقتار ءۇشىن سىيلار شاتتىعى مەن قۋانىشى الابوتەن. ماعان اسىرەسە ەلباسىنىڭ «7 – 20 – 25» باعدارلاماسى ەرەكشە ۇنادى. كوڭىلىم كادىمگىدەي كوتەرىلىپ قالدى. نەگە كوتەرىلمەسىن, ءاربىر وتباسىنا باسپانا الۋدىڭ جاڭا مۇمكىندىكتەرى اشىلىپ وتىرسا. «جۇمىس ىستەيتىن ءاربىر ادام نەسيەگە پاتەر ساتىپ الىپ, ونى وتباسىلىق بيۋدجەتىنىڭ مۇمكىندىكتەرى اياسىندا تولەي الاتىنداي بولۋى ءۇشىن ارزان رەسۋرستار ۇسىناتىن تەتىكتەر قاجەت» دەپ اتاپ كورسەتتى پرەزيدەنت. مۇنداي مۇمكىندىكتەر بۇرىن-سوڭدى بولماعان. نەسيە ءوسىمىنىڭ مولشەرلەمەسى قازىرگىدەي 14-16 ەمەس, جىلىنا 7 پروتسەنتتەن اسپايتىن بولسا, بانكتەر باستاپقى جارناعا باسپانا قۇنىنىڭ 30 پروتسەنتىنە دەيىن, كەيدە ءتىپتى 50 پروتسەنتىن تالاپ ەتسە, بۇل باعدارلامادا 20 پروتسەنتتەن اسپايدى دەپ كورسەتسە, بوركىڭدى قالاي اسپانعا اتپايسىڭ. ونىڭ ۇستىنە نەسيە الۋشىنىڭ اي سايىنعى تولەمىن ازايتۋ ءۇشىن ونىڭ مەرزىمى 10-15 ەمەس, 25 جىلعا دەيىن بولسا, بۇل اينالايىن-اۋ, اكەڭ جاساماعان جاقسىلىق ەمەس پە؟
ءالھامدۋللا, قازاقپىز. قازاق بولعاننان سوڭ بالاجانبىز. «ۇرپاق كوبەيسىن. ءبىر قوزى تۋسا, ءبىر ءتۇپ جۋسان ارتىق شىعادى» دەيمىز. قۇدايعا شۇكىر, كوپبالالى وتباسىلار اۋىلدا دا, قالادا دا جەتكىلىكتى. بىراق نەسىن جاسىرايىق, كوپتەگەن اكەلەر بالالارىنىڭ بارلىعىنا دەرلىك باسپانا سالىپ بەرۋگە مۇمكىندىكتەرى بولا بەرمەيدى. ال 2-3 ميلليون تەڭگەگە جەر ساتىپ الايىق دەلىك. سوندا قۇرىلىس ماتەريالدارىنىڭ باعاسى ۋشىعىپ تۇرعان مىنا زاماندا ءزاۋلىم ءۇي سالىپ بەرۋگە شامام جەتەدى مە؟ ءزاۋلىم ءۇي دەپ وتىرعانىم اقشامنىڭ تاسىپ بارا جاتقانىنان ەمەس. قازىر قالادا ءۇيدى بۇگىنگى زامانعا ساي ەڭسەلى دە كورىكتى ەتىپ سالۋ جونىندە ناقتى تاپسىرمالار بەرىلىپ جاتىر.
وسىنى ويلاپ باس قاتىپ جۇرگەندە ەلباسىنىڭ «بەس الەۋمەتتىك باستاماسى» كوكتەن ىزدەگەنىمدى جەردەن كەزىكتىرگەندەي بولدى. بۇعان قۋانباعاندا ەندى قايدا قۋاناسىز؟ ءبىر بالاما «7 – 20 – 25» باعدارلاماسى بويىنشا پاتەر الىپ بەرۋىمە ەندى مۇمكىندىك اشىلدى ەمەس پە؟
جالپى, بۇل قادام ەلباسىنىڭ تالايدان بەرى كوكەيىندە ءجۇر ەكەن. مۇنى ەلباسى ۇندەۋىندە اتاپ كورسەتتى. ادام قالاي باقىتتى بولادى؟ ءوزىڭدى قولداپ, قورعايتىن, قامقورلىق جاسايتىن ارتىندا ۇلكەن سۇيەنىش بار ەكەنىن سەزىنگەندە باقىتتى بولادى. ءبىز وسى قامقورلىقتى دا, سۇيەنىشتى ايقىن سەزىنىپ وتىرمىز. مۇنداي ەلدىڭ بارلىق تۇرعىندارى باقىتتىڭ قۇشاعىندا بولارى ايداي انىق. سۇيەنىشتى سەزىنىپ, قامقورلىقتى قولمەن ۇستاپ كورگەندەي تانىپ-ءبىلىپ وتىرعان حالىقتىڭ تۋعان جەرگە, سول مەملەكەتتى باسقارىپ وتىرعان تۇلعاعا دەگەن سۇيىسپەنشىلىگى, ىستىق ىقىلاسى ارتارى ءسوزسىز. ەلىن, جەرىن جان جۇرەگىمەن سۇيەتىن پرەزيدەنتىمىز بارشا قازاقستاندىقتاردىڭ تاعى دا ءۇمىت وتىن جاقتى. وسىنداي ەلدە عۇمىر كەشكەنىنە قۋاناسىز, ماقتاناسىز.
پرەزيدەنتتىڭ ەڭبەكاقىسى تومەن ادامدار ءۇشىن سالىقتىق جۇكتەمەنى 1 پروتسەنتكە دەيىن تومەندەتۋ تۋرالى تاپسىرماسى دا قاراپايىم ادامدارعا دەگەن ۇلكەن قامقورلىق. راسىندا, بىرەۋلەر از تابىس تابادى. بىرەۋلەردىڭ جۇمىسى ءا دەگەننەن ءجۇرىپ كەتپەۋى دە مۇمكىن. وسىندايدا كاسىپكەر بيۋدجەتكە قوماقتى قارجى اۋدارا الادى ما؟ بۇدان بيۋدجەتتىڭ ءبۇيىرى تومپايىپ شىعا كەلەدى مە؟ مەن جۇمىسىن جاڭا باستاعان جاستاردى بىلەمىن.ولاردىڭ ىشىندە جۇمىستارىن دوڭگەلەتىپ الىپ كەتە الماي جۇرگەندەرى دە بار. ەلباسى قولداۋى ولاردى قاناتتاندىراتىنىنا ەندى سەنىم مول. ال قاناتتاندىرا, قاناعاتتاندىرا ءبىلۋ بىلە بىلسەڭىز, ۇلكەن قابىلەت. ءتىپتى قۇدىرەت دەسەك تە اسىرىپ ايتقاندىق بولماس ەدى.
سابىربەك ولجاباي,
قازاقستان جازۋشىلار وداعىنىڭ مۇشەسى
وڭتۇستىك قازاقستان وبلىسى
