ەلشىنىڭ سوزىنە سۇيەنسەك, قازاقستان مەن موڭعوليا اراسىنداعى ىنتىماقتاستىقتى دامىتۋدىڭ جول كارتاسى ازىرلەنگەن. قۇجات الداعى 5 جىلدى قامتيدى. وسى باعدارلامانىڭ ارقاسىندا بىرلەسكەن كاسىپورىندار اشىلىپ, ينۆەستيتسيا تارتۋدىڭ تەتىكتەرى قاراستىرىلادى. ق.قوبلانديننىڭ ايتۋىنشا, موڭعوليالىق كاسىپكەرلەر قازىردىڭ وزىندە تاۋ-كەن, اۋىل شارۋاشىلىعى جانە تۋريزم سالالارىندا ىنتىماقتاستىقتى نىعايتۋعا قۇلشىنىپ وتىرعان كورىنەدى.
«موڭعوليانى بىزدەگى ۋران جانە التىن وڭدەۋ سالاسى, سارى ۇنتاق جاساۋ تەحنولوگياسى قىزىقتىرادى. ودان بولەك, قورعاس بەكەتىندەگى جۇمىستار مەن تەمىر جول ترانزيتتىك جۇمىستارىنا دا ەرەكشە ءمان بەرىپ وتىر», دەدى ق.قوبلاندين.
ەلشى قارىم-قاتىناستى نىعايتا تۇسۋگە بىرقاتار ماسەلەلەر كەدەرگى كەلتىرىپ وتىرعانىن جەتكىزدى. ماسەلەن, ەكى ەل اراسىندا اۆتوبۋس قاتىناعانىنا قاراماستان, رەسەي اۋماعىنان موڭعولياعا باراتىن جول سالىنباعان ەكەن. ونىڭ پىكىرىنشە, بۇل تۇيتكىلدى شەشۋ ءۇشىن تىكەلەي اۋە رەيسىن اشىپ, تاس جول سالۋ قاجەت.
«ەكى ەل اراسىنداعى كۇردەلى ماسەلەلەردىڭ ءبىرى – كولىك جانە لوگيستيكالىق بايلانىس. وسىنى شەشۋ ماقساتىندا قازىرگى تاڭدا «استانا – ۇلان-باتىر» اۋە رەيسىن اشۋ بويىنشا كەلىسسوزدەر جۇرگىزىلىپ جاتىر. بيىل بۇل جوسپار ىسكە اسۋى ءتيىس», دەدى ەلشى.
سونىمەن قاتار «وسكەمەن – بايان-ولگي – حوۆد» باعىتىندا ايماقتىق اۋە رەيسىن اشۋ بويىنشا كەلىسسوزدەر ءجۇرىپ جاتقانىن اتاپ ءوتتى. ەلشىنىڭ پىكىرىنشە, بۇل ماسەلە تاياۋدا شەشىمىن تابۋى ءتيىس.
قازىرگى تاڭدا موڭعولياعا اپاراتىن جولدار رەسەي اۋماعىنان وتەدى. سونداي-اق «استانا – ولگەي», «الماتى – ولگەي» باعىتىندا اۆتوبۋستار قاتىنايدى. بۇدان بولەك, 300 شاقىرىمدى قۇرايتىن «وسكەمەن – ريددەر – تاشانتا» قىسقا جولمەن دە قاتىناۋعا بولادى. قازاقستان تاراپى بۇل باعىتتاعى جول قۇرىلىسىنىڭ وزىنە قاراستى بولىگىن اياقتاپ قويعان. تەك رەسەي وزىنە قاراستى جول قۇرىلىسىن اياقتاماي وتىر.
بۇدان بولەك, ول موڭعولياداعى مال شارۋاشىلىعىنىڭ جايىنا دا توقتالدى. ونىڭ ايتۋىنشا, ەلدەگى مال باسى حالىقتان جيىرما ەسە كوپ. ماسەلەن, حالىقتىڭ سانى 3,2 ميلليون بولسا, جىلقى باسى 4 ميلليونعا جەتكەن. قامبار اتا ت ۇلىگى ەلدەگى مال سانىنىڭ 5,9 پايىزىن عانا قۇرايدى ەكەن.
رەسمي مالىمەتكە سايكەس, موڭعوليادا قوي مەن ەشكىنىڭ باسى 57 ميلليوننان اسادى. سيىر مەن قوداس 4,4 ميلليونعا جاقىنداعان. جالپى, حالقىنىڭ ۇشتەن ءبىرى اۋىل شارۋاشىلىعى سالاسىندا ەڭبەك ەتەدى. ايتسە دە, مال سانىنىڭ كوپ بولۋى سالدارىنان جايىلىمدىق جەرلەر جەتىسپەي جاتقان كورىنەدى.
«قازىرگى تاڭدا مال باسىنىڭ جالپى سانى 66,2 ميلليوندى قۇرايدى. بيىل كوكتەمدە بۇل كورسەتكىش 70 ميلليوننان اسادى دەگەن بولجام بار. وسىعان قاراماستان, ەت ونىمدەرىن ەكسپورتقا شىعارۋ باستى ماسەلەگە اينالىپ وتىر. ايتسە دە, ول ءۇشىن مالدى اسىلداندىرۋ قاجەت, سانيتارلىق-ەپيدەميولوگيا سالاسىندا بىرقاتار تۇيتكىلدەر شەشىلۋى ءتيىس. كەيىنگى جىلدارى موڭعوليادا جايىلىم جەرلەرىنىڭ تاپشىلىعى تۋىنداي باستادى», دەدى ق.قوبلاندين.
اباي اسانكەلدى ۇلى,
«ەگەمەن قازاقستان»
