قازاقستان پرەزيدەنتىنىڭ "بەس الەۋمەتتىك باستاماسىن" ىسكە اسىرۋ تاقىرىبى تالقىلانعان دوڭگەلەك ۇستەلدە ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ جاڭا «7-20-25» باعدارلاماسىنىڭ ارتىقشىلىقتارىن مىسالدارمەن كەلتىرىپ, ايتىپ بەردى.
«مىسالى, پاتەر 12 ميلليون تەڭگە تۇراتىن بولسا, ونىڭ الدىن الا تولەمىن (20 پايىز) تولەۋ ءۇشىن 2,4 ميلليون تەڭگە قاجەت بولادى, ال قالعان 9,6 ميلليون تەڭگەنى بانك 25 جىلعا 7 پايىزبەن بەرەدى. ءسويتىپ, اي سايىنعى تولەمنىڭ كولەمى 68 مىڭ تەڭگە بولادى», دەدى مارحابات جايىمبەتوۆ.
ۇلتتىق بانك توراعاسىنىڭ ورىنباسارى ولەگ سمولياكوۆتىڭ ايتۋىنشا, ەكىنشى دەڭگەيلى بانكتەردىڭ بارلىعى بۇل جوباعا قاتىساتىن بولادى.
بۇعان دەيىن ەلباسى نۇرسۇلتان نازارباەۆ پارلامەنت پالاتالارىنىڭ بىرلەسكەن وتىرىسىندا «7-20-25» اتتى جاڭا باعدارلامانى ۇسىنعان بولاتىن. بۇل باعدارلاما كەز كەلگەن قازاقستاندىقتىڭ نەسيەگە پاتەر الۋىنا مۇمكىندىك بەرەدى. «7-20-25» يپوتەكالىق كرەديت بەرۋ باعدارلاماسى بيىل مامىردا بەكىتىلەدى دەپ جوسپارلانىپ وتىر.
