دامۋدىڭ قازاقستاندىق جولى رۋحاني قۇندىلىقتىڭ وربۋىندە

الماتىدا ءبىلىم جانە عىلىم مينيسترلىگىنىڭ فيلوسوفيا جانە ساياساتتانۋ ينستيتۋتىندا «جاھاندىق الەمدەگى دامۋدىڭ قازاقستاندىق جولى: فيلوسوفيالىق-دۇنيەتانىمدىق جانە الەۋمەتتىك-ساياسي ماسەلەلەر» دەگەن تاقىرىپتا دوڭگەلەك ۇستەل بولىپ ءوتتى. قازاقستان تاۋەلسىزدىگىنىڭ 20 جىلدىعىنا ارنالعان ءىس-شارادا نەگىزىنەن العاندا ينستيتۋت عالىمدارىنىڭ ىرگەلى زەرتتەۋلەر باعىتىنداعى باعدارلامالارىنىڭ قورىتىندىلارى تۋرالى جان-جاقتى اڭگىمە بولدى. ەل تاۋەلسىزدىگىنىڭ مەرەيلى مەرەكەسى قارساڭىندا «تاۋەلسىز قازاقستاندا ادامي كاپيتالدى قالىپتاستىرۋ. الەۋمەتتىك – فيلوسوفيالىق ساراپتاما» اتتى ەڭبەكتى دايىنداپ, شىعارعان قازاقستاندىق عالىمدار ادامي كاپيتال – ەلدىڭ بولاشاعىن بولجايتىن مىقتى قۇبىلىس دەپ ەسەپتەيدى. ينستيتۋت عالىمدارىنىڭ سوڭعى ءۇش جىلداعى ىرگەلى عىلىمي ىزدەنىستەرىنىڭ ناتيجەسىنە ارنالعان باسقوسۋدا ەلىمىزدىڭ ەكونوميكاسىنىڭ قارقىندى دامۋىندا ادامي كاپيتالدىڭ الاتىن ورنى اۋقىمدى ەكەندىگىن فيلوسوفيا جانە ساياساتتانۋ ينستيتۋتىنىڭ ديرەكتورى مۇحتار يزوتوۆ كوپشىلىككە جان-جاقتى ايتىپ ءوتتى. بۇكىلالەمدىك بانكتىڭ مالىمەتتەرى بويىنشا, 192 ەلدىڭ ەكونوميكاسىن زەرتتەۋ نەگىزىندە ونىڭ 55 پايىزىندا ەكونوميكالىق دامۋ, مىنە, وسى دەرەكپەن انىقتالاتىندىعى دالەلدەندى. «ادامي كاپيتال» ۇعىمى ەڭ العاش رەت ەكونوميكا جونىندەگى نوبەل سىيلىعىنىڭ لاۋرەاتتارى – تەودور شۋلتس جانە گەري بەككەردىڭ ىقپالىمەن پايدا بولعاندىعى اقيقات. عالىمداردىڭ تۇجىرىمداۋىنشا, تۇرمىسى تومەن ادامداردىڭ جاعدايىنىڭ جاقسارۋى جەردىڭ ەمەس, تەحنيكانىڭ قارىشتاپ دامۋىنا جانە ولاردىڭ كۇش-جىگەرىنە, انىعىراق ايتقاندا بىلىمىنە تاۋەلدى. – ءبىزدىڭ پىكىرىمىزشە, جوعارىدا اتى اتالعان اتاقتى عالىمداردىڭ جاساعان تەورياسى تالاپقا تولىقتاي ساي كەلەدى دەپ ايتۋعا بولمايدى. ويتكەنى, ولار بۇل ماسەلەگە رۋحاني قۇندىلىقتار جاعىنان ەمەس, تەك قانا ەكونوميكالىق جاعىنان قاراعاندىعى جاسىرىن ەمەس. ادامنىڭ ىشكى رۋحاني كۇش-قۋاتىن تولىقتاي اشقاندا عانا بەلگىلى ءبىر ناتيجەگە قول جەتكىزۋگە بولادى. قازاق حالقىنىڭ ۇلى اقىندارى اباي مەن شاكارىم ادامنىڭ قالىپتاسۋىندا, ەڭ الدىمەن ەڭبەكتىڭ, سونداي-اق ار-وجداننىڭ, ياعني ادامگەرشىلىك قاسيەتتەردىڭ اۋاداي قاجەتتىلىگىن اتاپ ايتۋى كوپ نارسەدەن حابار بەرسە كەرەك, – دەدى ينستيتۋت باسشىسى مۇحتار يزوتوۆ ءوز ويىن ورتاعا سالىپ. ءبىلىم جانە عىلىم مينيسترلىگىنىڭ فيلوسوفيا جانە ساياساتتانۋ ينستيتۋتىنىڭ ءبىر توپ عالىمدارى مۇحتار يزوتوۆتىڭ جەتەكشىلىگىمەن بۇگىنگى كۇننىڭ كۇن تارتىبىندە تۇرعان, وسىنداي ماڭىزدىلىعى جوعارى ماسەلەلەر جونىندەگى زەرتتەۋلەرىن بۇدان ءۇش جىل بۇرىن باستاعان بولاتىن. بۇل ورايدا, عالىمدار ءوز زەرتتەۋلەرىندە ءححى عاسىردا ەلىمىزدىڭ باسەكەگە قابىلەتتىلىگىن, قازاقستاننىڭ مەنەدجمەنت جانە باسقارۋ جۇيەسىن قولداي وتىرىپ ادامداردىڭ بىلىكتىلىگىن بارلىق دەڭگەيدە قالىپتاستىرىپ, ارتتىراتىن ادىستەردى دە ىزدەستىرۋدىڭ قاجەتتىلىگى مول ەكەندىگىن اتاپ كورسەتەدى. قازاقستاندىق عالىمداردىڭ ايتۋىنشا, ادام قوعامدا شەشۋشى ءرول اتقاراتىن, سونداي-اق ءونىمدى ەڭبەك ەتىپ, قوعامعا وراسان زور پايدا تيگىزەتىن بىردەن-ءبىر تۇلعا. ينستيتۋت عالىمدارى ادامي كاپيتال توڭىرەگىندەگى وزدەرىنىڭ نەگىزگى ۇسىنىستارىن مادەنيەت, ءبىلىم جانە عىلىم مينيسترلىكتەرىنە جانە وزگە دە مەملەكەتتىك ورگاندارعا جولدادى. سونىمەن, ءبىزدىڭ قوعامنىڭ بارلىق كۇش-قۋاتى ادامي كاپيتالدى ءىس-جۇزىندە دايەكتىلىكپەن جۇزەگە اسىرۋعا باعىتتالۋى ءتيىس. ول بۇگىنگى تاڭداعى باستى ءارى قاجەتتى تالاپ ەكەندىگى ايتپاسا دا تۇسىنىكتى. باقىت بالعارينا.