قازاقستاندى بالا كەزىمنەن, دالىرەك ايتقاندا, ەكىنشى دۇنيەجۇزىلىك سوعىس كەزىنەن بىلەمىن. بۇل مەملەكەت دىنارالىق جانە كونفەسسياارالىق كەلىسىمى جاراسقان, ساياسي تۇراقتىلىعى ورنىقتى الەمدەگى ساناۋلى ەلدىڭ ءبىرى سانالادى. ەلدىڭ وركەندەۋى مەن قارىشتاپ دامۋىنا بۇگىندە ءبىر ميللياردتان استام مۇسىلمان قاۋىمى عانا ەمەس, الەمدىك قوعامداستىق پەن الەم جۇرتشىلىعى قىزىعىپ وتىر. قازاقستان مۇنداي تابىسقا ىنتىماق پەن بىرلىكتىڭ, ءوزارا سىيلاستىقتىڭ ارقاسىندا جەتكەنىن نىق سەنىممەن ايتا الامىن.
فرانتسۋز فيلوسوفى ميشەل مونتەن «ناداندىق وشپەندىلىكتى تۋدىرادى» دەپ وتە دۇرىس ايتقان. ءوز باسىم قازاقستان پرەزيدەنتىنىڭ ءوز ەلىندە ءبىلىم الۋدى قولجەتىمدى ەتۋگە دەگەن شىنايى ىقىلاس-نيەتىن تولىقتاي قولدايمىن. سەبەبى مەملەكەتتىك گرانت سانىن كوبەيتۋ جاستاردىڭ ءبىلىم الۋعا دەگەن ىنتاسىن ارتتىرادى ءارى ونىڭ الاتىن ورنى ەرەكشە. ونىڭ ۇستىنە بۇل ەلدىڭ حالقى ءوز زامانىنىڭ ويشىلدارى ءال-فارابي مەن اۆيتسەننانىڭ بىرەگەي قۇندىلىقتارىمەن سۋسىنداپ وسكەن. سونداي-اق مەن قازاقستانداعى العاشقى فرانتسۋز ۋنيۆەرسيتەتى – سوربوننانى اشۋمەن اينالىسقان ەدىم.
قازاقستان مىنە ەندى تۇرعىنداردى باسپانامەن قامتاماسىز ەتۋدى قولعا الىپ وتىر. جاسىراتىنى جوق, بۇل – فرانتسيادا دا بار پروبلەما. ءبىز اببە پەر قورىمەن بىرلەسە وتىرىپ ءوز ەلىمىزدە تۇرعىن ءۇي ماسەلەسىن شەشۋدى قاراستىرۋدامىز. ويتكەنى بۇل – كەزەك كۇتتىرمەيتىن, كەيىنگە قالدىرمايتىن بۇگىنگى كۇننىڭ وزەكتى پروبلەماسى.
پرەزيدەنت نۇرسۇلتان نازارباەۆتىڭ ءوز ەلىندە بيزنەس باستاعىسى كەلەتىن مىڭداعان ادامعا شاعىن نەسيە بەرۋدى كەڭەيتۋگە دەگەن نيەتىنە, باستاماسىنا كەز كەلگەن ادام قولداۋ بىلدىرەتىنىنە سەنىمدىمىن. ءوز كەزەگىندە بۇل قازاقستاندىق قوعامدى ەكونوميكالىق تۇرعىدان ەرەكشەلەندىرە تۇسەدى. مەنىڭ وسىناۋ ىزگى نيەتتى تىلەگىم قازاقستان پرەزيدەنتىنىڭ جوبا-جوسپارىن ىسكە اسىرۋعا سەپتەسەدى دەگەن ويدامىن.
مارەك حالتەر,
قوعام قايراتكەرى, قۇقىق قورعاۋشى (فرانتسيا)
