گازەتتىڭ ۇستىمىزدەگى جىلدىڭ 16 اقپان كۇنگى نومىرىندە جاريالانعان «تەمىر جول تاۋقىمەتىن تارتىپ وتىر» اتتى ماقالاسىنا بايلانىستى قولىما قالام الۋعا تۋرا كەلدى. ويتكەنى مەن دە ارال قالاسىندا تۇرامىن. سوڭعى كەزدەرى ءوزىمنىڭ جانە كىشكەنتاي نەمەرەمنىڭ ناۋقاستانۋىنا بايلانىستى استانا قالاسىنا ءۇش رەت ءارى-بەرى قاتىناۋىما تۋرا كەلدى. ءالى دە بولسا كۇردەلى وتا جاساتىپ جاتقان نەمەرەمە بىرنەشە رەت بارىپ-قايتۋعا تۋرا كەلەتىن جايى بار. سول ساپارلاردا ەكى اراداعى تەمىر جول قاتىناسىنا بايلانىستى شەشىمىن تاپپاي وتىرعان كۇرمەۋلى ماسەلەلەردى باستان كەشىرىپ ءبىراز قيىنشىلىق كوردىم. سوندىقتان تەمىر جول قاتىناسىنا ايتىلعان سىن-ەسكەرتپەلەر دۇرىس. ال مەنىڭ ايتارىم, قىزىلوردا (بۇكىل باتىس بەتكەيدەگى دەۋگە بولادى) جاعىنان توتە ءارى قىسقا جول بولىپ تابىلاتىن «قىزىلوردا – جەزقازعان» پويىزىنا بايلانىستى ءجۇرۋ كەستەسى دۇرىس شەشىلۋگە ءتيىس. ناقتىلاسام, سەكسەۋىل ستانساسىنان شىققان پويىز جەزقازعان ستانساسىنا بارعان سوڭ 4 ساعات ايالدايدى. سوسىن ءارى قاراي «جەزقازعان – استانا» پويىزىنا وتىرۋعا تۋرا كەلەدى. كەرى قايتار جولدا دا وسىعان ۇقساس تاۋقىمەت. استانادان كەلەتىن پويىز جەزقازعاندا ەندى 14 ساعاتقا جۋىق ايالدايدى, سوسىن بارىپ قىزىلوردا پويىزىنا وتىرۋعا تۋرا كەلەدى. پويىز كۇنارا جۇرەدى. جەزقازعان ۆوكزالىندا جولاۋشىلارعا جاسالعان جاعداي سىن كوتەرمەيدى. ۆوكزال سۋىق, قوناقۇي جوق, كىشكەنتاي بالالارى بار انالار, مۇگەدەكتەر ءۇشىن ارناۋلى بولمە قاراستىرىلماعان. سونداي-اق ارال تەڭىزى, اباي سياقتى حالىق كوپ مىنەتىن ستانسالاردا پويىز 5 مينۋت قانا تۇرادى. سول سەبەپتى جۇرت ءتۇسىپ-مىنۋگە دە ۇلگەرمەي جاتادى. اسىرەسە, اۆتوجول قاتىناسى جارامسىز بولعاندىقتان حالقى كوپ اباي ەلدى مەكەنىنىڭ ادامدارى قالاعا بارۋى ءۇشىن پويىزعا كوپ مىنەدى, ءار رەيستە 50-70 ادامعا دەيىن وتىرىپ جاتادى. اباي ۆوكزالىندا پەررون سالىنباعان, ادامدار بيىكتىگى 1,5-2 مەتر ۆاگون تامبۋرلارىنان ارەڭ ءتۇسىپ-ءمىنىپ جاتادى.
ەكى پويىز دا «مارال نۇر» فيرماسىنىڭ جەكە مەنشىگىندە. وسى ماسەلەنى قايتا قاراپ, جولاۋشىلاردىڭ جاعدايى ءۇشىن ەكى پويىزدى بىرىكتىرۋگە, نەمەسە ايالدايتىن ۋاقىتىن قىسقارتىپ ءۇش-ءتورت ۆاگوندى كەلەسى پويىزعا تىركەپ جىبەرىپ وتىرۋعا بولماس پا؟ بۇل – قالىڭ كوپشىلىكتىڭ تىلەگى.
ماقالاداعى «بۇل پروبلەمانىڭ ناقتى قاشان شەشىلەتىنى بەلگىسىز» دەۋى كوپشىلىكتى الاڭداتادى. ءسوز جوق, ەلباسىمىزدىڭ قولداۋىمەن سەكسەۋىلدەن جەزقازعانعا دەيىنگى ارالىقتا تەمىر جول سالىنۋى ەل ەكونوميكاسى ءۇشىن دە, رەسپۋبليكانىڭ ەكى قيىرىنداعى حالىق تاسىمالى ءۇشىن دە ماڭىزى زور. دەسە دە باردى بازارلاپ, قولداعى مۇمكىندىكتى حالىقتىڭ كوڭىلىنەن شىعاتىنداي ەتىپ ۇيىمداستىرا بىلگەن دۇرىس شىعار.
ۇرگەنىشباي قۋاتوۆ,
زەينەتكەر
قىزىلوردا وبلىسى,
ارال اۋدانى,
توقاباي اۋىلى
