ەل تاۋەلسىزدىگىنىڭ 20 جىلدىعى قارساڭىندا وبلىس ورتالىعىنداعى كۋتۋزوۆ كوشەسى بويىندا ەتنومادەني بىرلەستىكتەر اللەيا-الاڭى
اشىلدى. وسىدان ءۇش جىلداي ۋاقىت بۇرىن «دوستىق ءۇيىنىڭ» پايدالانۋعا بەرىلۋ سالتاناتتى راسىمىنە ەلباسى نۇرسۇلتان نازارباەۆ قاتىستى. بۇل كۇندەرى «دوستىق ۇيىندە» وبلىستىق قازاقستان حالقى اسسامبلەياسىنىڭ حاتشىلىعى, 18 ەتنومادەني بىرلەستىك, اسسامبلەيانىڭ جاستار بىرلەستىگى, ۇلتتىق وركەندەۋ مەكتەبى, «انا ءتىلى» تىلدەردى دامىتۋدىڭ وقىتۋ-ادىستەمەلىك ورتالىعى, «قازاق ءتىلى» قوعامى ورنالاسقان. سونىمەن قاتار, 20 ەتنوستىڭ مادەنيەتىن دارىپتەيتىن 42 شىعارماشىلىق ۇجىم جۇمىس ىستەيدى. مامىر ايىندا «ماقساتى ءبىردىڭ – رۋحى ءبىر» ۇرانىمەن «دوستىق. بىرلىك. تاۋەلسىزدىك» اتتى ەتنوستىق توپتاردىڭ ءحىV وبلىستىق فەستيۆالى ءوتتى. «ەل قازىناسى» جوباسى اياسىندا «ەرتىس – دوستىق وزەنى» اتتى حالىقارالىق فەستيۆال ۇيىمداستىرىلدى.
بيىلعى جىلى ەتنومادەني بىرلەستىكتەر جۇمىسىن اتقارۋ ىسىنە 25 ميلليون تەڭگە ءبولىندى. وزگە ەتنوس وكىلدەرى مەملەكەتتىك ءتىلدى مەڭگەرۋدە. وبلىس اۋماعىندا وسى باعىت اياسىندا ءتيىستى جۇمىستار اتقارىلۋدا. مەملەكەتتىك ءتىلدى جانە قازاق حالقىنىڭ سالت-داستۇرلەرىن ۇيرەتۋ وبلىستىڭ لينگۆيستيكالىق لاگەرلەرى مەن الاڭدارىنىڭ وقۋ باعدارلاماسىنا ەنگىزىلگەن. ەندى, مىنە, مەرەكە الدىندا دوستىق اللەياسىندا شاعىن تۇردەگى كەسكىندەلگەن ءاربىر ەتنوبىرلەستىكتەردىڭ ۇلتتىق بولمىسىنا ساي جاسالعان مۇسىندەر ورناتىلىپ وتىر.
مىسالى, «ۆاتان» ازەربايجان ەتنوبىرلەستىگى – ازەربايجان قالالارى بار كارتا جانە قىز مۇناراسىن, گرەكتەر – افروديتانىڭ ءمۇسىنىن, قىرعىزدار – شاڭىراق, قومۋز, بۇركىتتىڭ بەينەسىن, ارمياندار – ارميان ساۋلەت ونەرىن, سلاۆيان ورتالىعى ماترەشكالارىن ءتىزىپ قويىپتى. ءارى قاراي پولياكتار, بولگارلار, ۋكرايندار, بەلورۋستار, كورەيلەر, ۇيعىرلار جاساعان ءوز حالقىنىڭ ۇلتتىق داستۇرلەرىنە ساي بەلگىلەرى بولىپ جالعاسىپ كەتە بەرەدى. اللەيا ىشىنە ورىندىقتار قويىلعان. ءبىر سوزبەن ايتقاندا, قالالىقتار ءۇشىن تاعى ءبىر دەمالىس ورنى اشىلدى. ەلىمىزدەگى ۇلتارالىق كەلىسىمنىڭ, ىنتىماقتاستىق پەن بەيبىتشىلىكتىڭ كورىنىسى ىسپەتتى.
جينالعاندار الدىندا وبلىس اكىمى باقىتجان ساعىنتاەۆ ءسوز سويلەدى. «ەلىمىز دوستىق پەن تاتۋلىقتىڭ مەكەنىنە اينالعان. اللەيانىڭ اشىلۋى ءبارىمىز ءۇشىن زور ماڭىزدى ءىس-شارا جانە ۇلكەن مارتەبە دەپ ەسەپتەيمىن», – دەدى ءوڭىر باسشىسى. بۇدان كەيىن ەتنوبىرلەستىكتەر وكىلدەرى جافار ماحمۇدوۆ, تاتيانا كۋزينا, يانا مۋراۆسكايا قۇتتىقتاۋ ءسوز سويلەدى.
فاريدا بىقاي,
پاۆلودار.
