ماسليحاتتارعا 200 دەپۋتات سايلانباق

اقجايىقتا ءماجىلىس دەپۋتاتتارى مەن بارلىق دەڭگەيدەگى ءماسليحاتتار سايلاۋىنا ازىرلىك جۇمىستارى جان-جاقتى ورىستەي باستادى. مۇنداعى بارلىق اۋماقتىق كوميسسيالار ءوز مىندەتتەرىن اتقارىپ ءجۇر. قازىرگى كۇنى سايلاۋ نۇكتەلەرىن قاجەتتى اقپاراتتىق ماتەريالدارمەن قامتۋ جۇمىستارى جۇرگىزىلۋدە. «نۇر وتان» حدپ-نىڭ XIV سەزىندە رەسپۋبليكا پرەزيدەنتى, پارتيا توراعاسى نۇرسۇلتان نازارباەۆ اتاپ كورسەتكەندەي, بۇل سايلاۋدىڭ ورنى بولەك, ءمانى مەن ماڭىزى ايرىقشا. ەندەشە سايلاۋ ۋچاسكەلەرىندە قىزمەت جاسايتىن اۋماقتىق كوميسسيا مۇشەلەرىنە قويىلاتىن تالاپتار مەن جاۋاپكەرشىلىكتەر دە جوعارى بولماق. سوندىقتان وبلىستا ءبىرىنشى كەزەكتە وتە قىسقا ۋاقىت ارالىعىندا ولاردى وقىتىپ ۇيرەتۋگە, كەزەكتەن تىس سايلاۋدىڭ باستى ەرەكشەلىكتەرىن ۇعىندىرۋعا ءمان بەرىلگەن. وڭىردە بۇگىنگى كۇنگە دەيىن سايلاۋشىلار داۋىس بەرەتىن 523 ۋچاسكەنىڭ شەكارالارى ناقتىلاندى. وكرۋگتىك جانە ايماقتىق سايلاۋ كوميسسيالارىنىڭ تىزىمدەرى مەن  ولاردىڭ قايدا, قانداي مەكەنجايدا ورنالاسقانى جەرگىلىكتى ءباسپاسوز بەتتەرىندە جاريا ەتىلدى. – وبلىس بويىنشا بارلىق دەڭگەيدەگى ماسليحاتتارعا 200 دەپۋتات سايلانباق. ونىڭ 30-ى وبلىستىق, 20-سى قالالىق جانە 150-ءى اۋداندىق ماسليحاتتارعا دەپۋتات بولىپ سايلانادى. رەسپۋبليكا كونستيتۋتسياسىنىڭ 86-شى بابى بويىنشا دەپۋتاتتىققا ۇسىنىلاتىن ۇمىتكەرلەرگە بىرقاتار تالاپتار قويىلعان. سوندىقتان دا بۇل كەزەڭدە وسى كونستيتۋتسيالىق تالاپتاردىڭ ساقتالۋى ەسكەرىلەتىن بولادى, – دەدى گازەت تىلشىسىنە باتىس قازاقستان وبلىستىق سايلاۋ كوميسسياسىنىڭ مۇشەسى عيلىم قۋانىشەۆ. تەمىر قۇسايىن, باتىس قازاقستان وبلىسى.