تۇرعىن ءۇي قۇرىلىسىنا ۇلەستىك قاتىسۋ ماسەلەسى بويىنشا استانا قالاسى اكىمىنىڭ ءبىرىنشى ورىنباسارى سەرگەي حوروشۋن باياندادى.
«ۆاك-تىڭ سوڭعى وتىرىسىندا 22 وبەكتى قارالدى. قازىرگى تاڭدا «ەلوردا قۇرىلىس كومپانياسى» جشس وكىلەتتى مەكەمەسىنىڭ 16 نىسانى قارالدى, ولار: («جاعالاۋ-3», «جاعالاۋ-4», «شىعىس», «ستوليچنىي-2», «ەسىل-2», «ارىستان», «ارابي-2», «تك-1», «تۇران سىعاناق», «جەتى جول», «كومسومولسكي», «ايسانام دە ليۋكس», «كomfort Deluxe», «سادوۆىە كۆارتالى», «گارانت», «ديناستيا»), دەدى س.حوروشۋن.
توتەنشە, سانيتارلىق-ەپيدەميولوگيالىق, قالانىڭ اعىمداعى نىسانداردىڭ تىنىس-تىرشىلىگى مەن جىلۋ ماۋسىمى تۋرالى قالا اكىمىنىڭ ورىنباسارى قوسمان ايتمۇحامەتوۆ باياندادى. ونىڭ ايتۋىنشا, وتكەن اپتادا جۇقپالى اۋرۋلار بويىنشا سانيتارلىق-ەپيدەميولوگيالىق احۋال تۇراقتى, باقىلاۋ دەڭگەيىنەن اسىپ كەتپەگەن. استاناداعى جىلۋ ماۋسىمى شتاتتىق رەجيمدە وتۋدە. ەنەرگيا قاينار كوزدەرى ءنورماتيۆتى جانار-جاعارماي قورىمەن قامتاماسىز ەتىلگەن.
ال ءدارى-دارمەك قۇرالدارى مەن ونىڭ قورى تۋرالى قالا اكىمىنىڭ ورىنباسارى ەرمەك امانشاەۆ ايتىپ بەردى.
ەلورداداعى قۇقىق ءتارتىبىن قامتاماسىز ەتۋ بويىنشا قابىلدانعان شارالار مەن كريمينوگەندىك احۋال تۋرالى قالانىڭ ءىىد باسشىسى مارات قوجاەۆ ەسەپ بەردى.
«جالپى العاندا استاناداعى جەدەل جاعداي بارىسىندا قىلمىس ايتارلىقتاي ازايعان. وتكەن اپتادا 549 قىلمىس تىركەلدى, بۇل الدىڭعى اپتاعا قاراعاندا 46 قىلمىسقا از جانە وتكەن جىلمەن سالىستىرعاندا دا ەكى ەسەگە تومەندەگەن. سونداي-اق ۇرلىق, توناۋ, الاياقتىق, بۇزاقىلىق تا ازايعان» دەدى م.قوجاەۆ.
ايتۋىنشا قوعامدىق ورىنداردا جاسالاتىن قىلمىس ءتۇرى تومەندەگەن. بۇدان باسقا, اۆتوكولىك ۇرلاۋ, اككۋمۋلياتور, سالونعا ۇرلىققا ءتۇسۋ, قالاداعى قالتا ۇرلىعى مەن ساۋدا ويىن-ساۋىق ورتالىقتارىنداعى ۇرلىق تا تومەندەگەن.
ال بەينەباقىلاۋ كامەراسىنىڭ كومەگىمەن 13 قىلمىس پەن 1 233 اكىمشىلىك قۇقىق بۇزۋشىلىق انىقتالدى.
قالادا تازالىق پەن ءتارتىپ جۇمىستارى جۇرگىزىلۋدە. اكىمشىلىك جاۋاپكەرشىلىككە شاعىن جانە ورتا بيزنەستىڭ 52 باسشىسى تارتىلدى, 2 – مەردىگەرلىك ۇيىم, 6 – پيك, 1 – قۇرىلىس مەكەمەسى.
قالانى اباتتاندىرۋ ماسەلەسى بويىنشا الماتى, ەسىل, سارىارقا اۋداندارى اكىمىنىڭ باياندامالارى تىڭدالدى.
قالاداعى قوعامدىق ترانسپورتتىڭ جۇمىسى جايلى «استانا LRT» جشس باسقارما توراعاسى ايتىپ بەردى. ول حالىقارالىق اۋەجاي اۋماعىنداعى جول قوزعالىسى ۇيىمدارىن وزگەرتۋ ماسەلەسى تۋرالى ايتتى.
«سمارت-سيتي» جوباسىنداعى مەملەكەتتىك-جەكەمەنشىك سەرىكتەستىك جوباسىن جۇزەگە اسىرۋ تۋرالى نارىقتاعى جانار-جاعارماي ماتەريالدارىنىڭ اعىمداعى احۋالى مەن «سەرگەك» بەينەباقىلاۋ كامەراسىن قوسۋ بويىنشا جۇمىستار بارىسىن ينۆەستيتسيا جانە كاسىپكەرلىكتى دامىتۋ باسقارماسىنىڭ باسشىسى الىشەر ابدىقادىروۆ باياندادى.
