– ەلميرا, ءسىزدى فيتنەس باپكەر بولىپ قىزمەت اتقارىپ ءجۇر دەپ ەستىدىك. بۇل قوسىمشا جۇمىس پا الدە؟
– الماتىداعى فيتنەس ورتالىقتاردىڭ بىرىندە جۇزۋدەن باپكەر بولىپ جۇمىسقا تۇردىم. بىراق بۇل دەگەنىم كاسىپقوي سپورتتان كەتتىم دەگەن ءسوز ەمەس. قازىر بىزگە دەمالىس بەرىلگەن. جاتتىعۋ جۇمىستارى قايتا باستالعانعا دەيىن وزىمە ۇنايتىن ءىستى قولعا الۋدى ءجون كوردىم.
– ياعني ءسىزدى ءالى جارىستاردان قاتىسۋشى رەتىندە كورەمىز عوي؟
– ماسەلەلەردى رەتكە كەلتىرىپ ءارى ءبىراز تىنىعىپ العان سوڭ, بۇيىرتسا, بيىلعى جىل ويداعىداي باستالادى دەپ ويلايمىن.
– ءسىز ءۇشىن وتكەن جىل سپورتتا ءساتتى بولدى دەۋگە كەلمەيدى...
– سىناققا تولى جىل بولدى. ۇزىلىستەن كەيىن سپورتقا ورالۋ دا وڭاي ەمەس ەكەن. سپورتتا عانا ەمەس, جەكە ومىرىمدە دە ءبىراز قيىندىقتارعا تاپ بولدىم.
– ءسىزدى حالىقارالىق ۇيىم دوپينگ قابىلدادى دەپ ايىپتادى. ونى ەستىگەندە قانداي كۇيدە بولدىڭىز؟
– ەڭ العاش توبەمنەن جاي تۇسكەندەي كۇي كەشتىم. باستاپقى ايلاردا ءوزىمدى قويارعا جەر تاپپادىم. دەنساۋلىعىم دا سىر بەرە باستادى. بۇعان وتباسىلىق ماسەلەلەر دە قوسىلدى. بىلايشا ايتقاندا, ىشكى كۇيزەلىسپەن كۇرەسىپ ءومىر ءسۇردىم. بىراق اتا-انام, جاقىن ادامدارىمنىڭ ارقاسىندا سپورتقا قايتا ورالىپ, قيىندىققا توتەپ بەرۋدى ۇيرەندىم. ء«ار ءىستىڭ قايىرى بار» دەگەن وسى شىعار. وكىنەتىنىم, كوزدەگەن ناتيجەمە قول جەتكىزە المادىم. قازاقستان قۇراماسىنا قايتا شاقىرتىلعانىممەن, جەلتوقساندا شىنتاعىمدى جاراقاتتاپ الدىم. ءسويتىپ جاتتىعۋعا قاڭتار ايىندا ءبىر-اق كىرىسىپ, ناۋرىزدا سەربيادا وتكەن تۋرنيردە توپ جاردىم. الايدا ساۋىردە قايتا كەلەڭسىزدىكتىڭ قورشاۋىندا قالىپ, قانشا ۇمتىلسام دا, سودان شىعا الماي جاتقان سياقتىمىن.
– ءوزىڭىزدى وزگە سالادا سىناپ كورگىڭىز كەلگەنى دە سوندىقتان عوي؟
– فيتنەس ورتالىقتاردىڭ جۇمىسى, جالپى وسى سالا ۇناپ جۇرگەن. سوندىقتان باعىمدى سىناپ كورسەم دەدىم. ادەتتە باپكەر تاڭداۋدا ادام ونىڭ جۇمىس وتىلىنە قارايدى. ال جاڭادان كەلگەندىكتەن مەنى كوپشىلىگى تاني بەرمەيدى. سوعان قاراماستان جۇزۋدەن تاجىريبەم بارىن, قولىمان كەلەتىن ءىس ەكەندىگىن بايقاعاندار قاتارى كوبەيىپ جاتىر.
– ال باپكەرلەرىڭىز بەن كوماندالاس ارىپتەستەرىڭىزدىڭ سىزگە دەگەن قارىم-قاتىناسى قالاي؟
– الەكساندر سمولەەۆكە دە بۇل جايت اۋىر سوققى ءتارىزدى بولدى. سوعان قاراماستان ول كىسى مەنى قولداپ, جىگەرلەندىرىپ, جاتتىعۋدا ۇمتىلا ءتۇسۋىم كەرەكتىگىن ايتىپ جۇرەدى. سونىسىمەن دە كوپشىلىككە جاقپاي قالادى. ونىڭ ۇستىنە سپورتتا ناتيجەڭ بولماسا, كىمگە كەرەكسىڭ. اسىرەسە, دوپينگ داۋىنان سوڭ قۇراماداعى باسقا ماماندار ءۇشىن مەن «حالىق جاۋىنا» اينالدىم. بىراق ەشكىم ىشكى كۇيزەلىسىمدى تۇسىنگىسى كەلگەن جوق. بالكىم, بولاشاعىما سەنبەگەندىكتەن دە شىعار. سوعان قاراماستان قۇراماعا ورالۋىما مۇمكىندىك بەرگەنى ءۇشىن ول كىسىلەرگە دە العىس ايتامىن.
– ءجۇزۋ – مەدالى كوپ سپورتتىڭ ءبىرى. بۇل سپورتقا ءبىزدىڭ قوعامدا قىزىعۋشىلىق قانداي؟
– دميتري ءبالانديننىڭ جەتىستىكتەرىنەن سوڭ بالالارىن ءجۇزۋ ۇيىرمەسىنە بەرىپ جاتقان اتا-انالار كوپ. ءبىزدىڭ دە سۋدا بالىقشا جۇزە الاتىندىعىمىزدى تۇسىنە باستاعانداي. ەكاتەرينا رۋدەنكونىڭ دا جەتىستىكتەرى از ەمەس. كاتيا – ازيا ويىندارىنىڭ ءۇش دۇركىن كۇمىس جۇلدەگەرى. ياعني جۇمىس جۇيەلەنىپ كەلەدى. باعىتىمىزدىڭ دۇرىستىعىن, دارىندى بالالاردىڭ بارىن باسشىلىق تا كورىپ جاتىر. وسى قارقىننان تايماساق, ءالى تالاي جەتىستىككە جەتەمىز.
– ەندى ءوزىڭىز باپكەرسىز. ادامدارمەن جۇمىس ىستەۋ قالاي ەكەن؟
– مەن ءۇشىن قيىن ەمەس. كەرىسىنشە, كوڭىل-كۇيىمدى كوتەرەدى. جاتتىعۋىمىز قىزىقتى وتەدى. ونىڭ ۇستىنە باپكەرىمنىڭ جانىندا ءجۇرىپ تە بالالاردى دايىنداعانبىز. سولاردىڭ ىشىندە سپورت شەبەرى اتانعاندارى بار. ياعني نۇسقاۋ بەرىپ, دۇرىس باعدار كورسەتە الامىن.
– جۇزۋدە سالماق دەرەجەلەرى جوق. سوعان قاراماستان ءار كيلوعا قاتتى ءمان بەرەسىزدەر مە؟
– ءسوزسىز. سپورتشىنىڭ قالىپتى سالماعى, سونان سوڭ جارىسقا قاتىساتىن سالماعى بولادى. بۇل ەرەجەنى ساقتاماۋ تۋرنيردەگى ناتيجەڭە كەرى اسەر ەتەتىنى انىق. قازىر وزىمدە ارتىق سالماق بارىن بىلەمىن, ناقتىراعى بۇلشىقەتتەر كوپ. ودان ارىلۋ قيىننىڭ-قيىنى.
– بالكىم, ءسىزدىڭ الەۋمەتتىك جەلىدەگى تانىمالدىلىعىڭىز, تىلشىلەردىڭ نازارىنان تىس قالماۋىڭىز كەسكىن-كەلبەتىڭىزدىڭ دە ارقاسى شىعار؟
– الەۋمەتتىك جەلىدەگى وقىرماندارىما جازعان پىكىرلەرىم, ادام رەتىندە اشىقتىعىم, ومىرگە دەگەن قۇشتارلىعىم ۇنايتىن سەكىلدى. شىندىقتى جاسىرماي, بەتكە ايتا سالاتىن باتىلدىعىما دا كوپشىلىك ريزا بولىپ جاتادى.
– ءسىز جايلى پىكىرلەردىڭ باسىم بولىگى قاي سارىندا جازىلادى؟ جالپى, سىنعا قالاي قارايسىز؟
– قۋاناتىنىم, وقىرماندارىمنىڭ اراسىندا تەرىس پىكىر ايتىپ, سىنايتىندار از. باسىم بولىگى قولداپ, سونىڭ ارقاسىندا جىگەرلەنە تۇسەمىن. جالپى, قىز بالا بولعاندىقتان, ءبىز ءۇشىن جۇرتتىڭ نازارىندا ءجۇرۋ ماڭىزدى. شومىلاتىن كيىمدە تۇسكەن سۋرەتتەرىمە قاتىستى ءتۇرلى پىكىرلەر وقىپ تا جاتامىن. دەگەنمەن وعان بولا كوڭىل-كۇيىمدى تۇسىرگەن ەمەسپىن. اركىمنىڭ كوزقاراسى, ۇستانىمى بار. ولارمەن ءسوز تالاستىرعىم كەلمەيدى. مەنى بىرەۋ تالقىلاسا, ماعان, ومىرىمە دەگەن قىزىعۋشىلىقتارىنان دەپ بىلەمىن. كەيدە سىننىڭ ءوزى ادامعا كۇش بەرەدى.
– جاتتىعۋىڭىز بار, بۇگىندە جۇمىس ىستەيسىز. ۆلوگتار ءتۇسىرىپ, وقىرماندارىڭىزدى قىزىقتىراتىنداي پوستار جازۋعا ۋاقىتتى قايدان تاباسىز؟
– ەشكىم تاۋلىگىنە 24 ساعات جۇمىس ىستەمەيدى. قالاساڭ, نەگىزگى جۇمىسىڭنان بولەك وزىڭە ۇنايتىن ىسكە ۋاقىت تابۋعا بولادى. مەن ادامدارمەن تىلدەسكەندى, پىكىر الماسقاندى جاقسى كورەمىن. تيىسىنشە بەلگىلى ءبىر جايتقا بايلانىستى ءوز ويىمدى بىلدىرگىم كەلەدى. وندايدى ينستاگرامداعى پاراقشاما جازىپ قويامىن. الماتىدا وتكەن ارالاس جەكپە-جەك كەشىنەن ۆلوگ تۇسىرگەنىمدى دە ماقتانىشپەن ايتا الامىن. سول ارقىلى سپورتشىلارمەن جاقىنىراق تانىسىپ, ولاردىڭ دا قاراپايىم ادام ەكەندىگىن, ازىلدەي الاتىنىن, قىزىعۋشىلىقتارى بار ەكەندىگىن كورسەتۋگە تىرىستىم. بالا كۇنىمدە ءان ايتاتىنمىن. قازىر ارا-تۇرا كاراوكەگە بارىپ تۇرامىز. بيلەگەندى ۇناتامىن. بۇلارعا دا ۋاقىت تاۋىپ ءجۇرمىن.
– جاتتىعۋ بار, جارىس, ەندى جۇمىس بار. جۇزۋدەن جالىققان جوقسىز با؟
– كۇندەلىكتى قايتالانا بەرەتىن ىستەن شىنىمەن دە جالىقتىم. دەمالىس الىپ ءوزىم ءۇشىن ءومىر ءسۇرىپ جاتقانىم دا سوندىقتان. مەن بالاندين ەمەسپىن, ناتيجەلەرىم دە كوڭىل كونشىتپەي ءجۇر. نازاردان تىس قالا باستاعانىمدى دا سەزە باستادىم. باپكەرلەردىڭ دە جاتتىقتىرۋدان, مەنىمەن جۇمىس ىستەۋدەن جالىققانىن بايقايمىن.
– توكيو وليمپياداسىنا قاتىسۋىڭىز مۇمكىن بە؟
– توكيوداعى الامانعا قاتىسۋ جايلى ءۇمىتىم ۇزىلگەن. بىراق تاعدىردىڭ بىزگە قانداي توسىنسىي دايىنداپ قويعانىن كىم ءبىلسىن. ەگەر ءساتى ءتۇسىپ جاتسا, 2020 جىلعى وليمپيادادا باق سىناۋىم ابدەن مۇمكىن. سپورتتان ءبىرجولا كەتسەم بە دەيمىن. ويىم سان-ساققا ءبولىندى. نە دە بولسا ۋاقىت كورسەتەر.
– ءبارى ساتىمەن بولسىن دەيمىز! اڭگىمەڭىزگە راحمەت.
اڭگىمەلەسكەن ءمادينا اسىلبەك,
جۋرناليست
