قازاقستان تابىسىن جوعارى باعالادى

26 قاراشادا استانادا قازاقستان رەسپۋب­ليكاسىنىڭ سىرتقى ىستەر ءمينيسترى ەرجان قازىحانوۆ ەۋرووداقتىڭ قازاقستانداعى وكىلدىگىنىڭ باسشىسى – ەلشى نوربەرت جۋستەن­دى ونىڭ ديپلوماتيالىق قىز­مەتىنىڭ اياق­تا­لۋىنا بايلانىستى قابىل­دادى, دەپ حا­با­ر­لادى قر ءسىم-ءىنىڭ ءباسپاسوز قىزمەتى. ە.قازىحانوۆ ەۋروپالىق ديپلوماتقا جەمىستى ەڭبەگى ءۇشىن جانە قازاقستان-ەۋروپا ىنتىماق­تاستىعىنىڭ دامۋىنا زور ۇلەس قوسقانى ءۇشىن العىس ءبىلدىردى. قازاقستان باسشىلىعىنىڭ ەۋروپاداعى ارىپتەستەرىمەن ىنتىماقتاستىقتى كۇشەيتۋگە اسا ءمان بەرەتىندىگىن جەتكىزگەن قازاقستاندىق مينيستر, قر مەن ەو ەكىجاقتى ىنتىماق­تاستىعىن جاڭا ساپالى دەڭگەيگە كوتەرۋ ءۇشىن قاجەتتى بارلىق الەۋەت بار ەكەنىن اتاپ كورسەتتى. ال ساياسي سۇحباتتىڭ جوعارى دەڭگەيدە دامۋىن ەكى جاقتىڭ ساياسي ەرىك-جىگەرى مەن ىنتىماقتاستىقتىڭ نى­عايۋى دالەلدەيدى, دەدى ە.قازىحانوۆ ءوزىنىڭ سوزىندە. ءسوز رەتىنە قاراي ايتا كەتسەك, 2010 جىلى قازاق­ستان پرەزيدەنتى ن.نازارباەۆ ەو-نىڭ بريۋسسەلدەگى شتاب-پاتەرىندە ەكى رەت بولدى. ەۋروپا وداعىنىڭ توراعاسى ح.ۆان رومپەي بىلتىرعى جىلدىڭ جەلتوقسان ايىندا استانادا وتكەن ەقىۇ سامميتىنە قاتىستى. بيىل ن.نازارباەۆ ەۋروپالىق كوميسسيانىڭ ءتو­راعاسى ج.م.بارروزۋمەن (19 ساۋىردە) كيەۆتە وتكەن يادرولىق ەنەرگيا سامميتىندە كەزدەستى. ال ح.ۆان رومپەيمەن بۇۇ باس اسسام­بلەيا­سىنىڭ 66-شى سەسسيا جۇمىسىندا جۇزدەستى. ال كەشەگى كەزدەسۋدە تاراپتار ەو-نىڭ ورتالىق ازياداعى ستراتەگياسىنىڭ جانە بيىل اياقتالاتىن «ەۋروپاعا جول» مەملەكەتتىك باعدارلاماسىنىڭ ىسكە اسىرىلۋى بارىسىن قاراستىردى. بۇل اعىمداعى جىلدىڭ 24 قاراشاسىندا استانادا ءساتتى وتكەن «قازاقستان – ەۋروپا وداعى: ىنتى­ماقتاستىقتىڭ جەتىستىكتەرى مەن جاڭا مۇمكىندىكتەرى» اتتى حالىقارالىق كونفە­رەن­تسيانىڭ ناتيجەسى بولىپ تابىلادى. كەزدەسۋ سوڭىندا ن.جۋستەن قازاقستاندى 20 جىلدىق تاۋەلسىزدىك مەرەيتويىمەن قۇتتىقتاپ, ەلىمىزدىڭ ەگەمەندىك العان جىلدارىنداعى قول جەتكىزگەن جەتىستىكتەرىن جوعارى باعالادى.