پرەزيدەنت ازاماتتارعا 7 پايىزدان اسپايتىن يپوتەكالىق نەسيەلەر بەرىپ, قايتارۋ ۋاقىتىن 20-25 جىلعا سوزۋ, سونداي-اق باستاپقى جارنانى 20 پايىزدان اسىرماۋ باستى ماسەلە ەكەندىگىن ايتتى. تۇرعىن ءۇي ماسەلەسى بۇگىنگى كۇنى ەكىنىڭ ءبىرىن قىنجىلتاتىن, تولعاندىراتىن جايت ەكەندىگى ءمالىم. ال ەلباسىنىڭ وسى تۇرعىدان قولداۋى باسىم كوپشىلىككە دەمەۋ بولماق.
ەلىمىزدە جالاقىسى از 2 ملن-عا جۋىق ادامنىڭ ءال-اۋقاتىن جاقسارتۋ ءۇشىن سالىقتىق جۇكتەمەنى 10 پايىزدان 1 پايىزعا تومەندەتۋ كوزدەلگەن. سايكەسىنشە, مۇنداي بەتبۇرىس ءبىراز وتباسىنىڭ جاعدايىن جاقسارتۋعا كومەگىن تيگىزگەلى وتىر.
جوعارى وقۋ ورىندارىندا جىل سايىن بولىنەتىن 54 مىڭ گرانت قوسىمشا 20 مىڭعا كوبەيتىلەدى. بۇل وقۋ ورىندارىنىڭ ابىرويىن ارتتىرىپ جانە ءبىلىم سالاسىنىڭ دەڭگەيىن كوتەرىپ, دامىتۋعا سەپ بولار ءسوزسىز. اسىرەسە ستۋدەنتتەردى جاتاقxانامەن قاتاماسىز ەتۋ ولاردىڭ ساپالى ءبىلىم الۋىنا وتە ۇلكەن اسەرىن تيگىزەدى.
اۋىل شارۋاشىلىعىن دامىتۋ اياسىندا شاعىن جانە ورتا كاسىپكەرلىككە شاعىن نەسيەلەر بەرۋدىڭ جەڭىلدىكتەرى دە ەلدى قۋانتتى. شاعىن نەسيەلەردىڭ كولەمىن 62 ميلليارد تەڭگەگە جەتكىزۋ كوپتەگەن ماسەلەلەردىڭ كۇرمەۋىن شەشەدى.
ەلباسى ءوز بايانداماسىندا قىزىلوردا – جەزقازعان – قاراعاندى – تەمىرتاۋ ارقىلى استاناعا دەيىن گاز قۇبىرى ماگيسترالى تارتىلسا, 2,7 ملن ادام كوگىلدىر وتىننىڭ يگىلىگىن كورەتىنىن ايتتى.
مىنە وسى بەس باعداردى ازاماتتارىمىزدىڭ جاعدايىن جاقسارتۋعا باعىتتالعان تاريحي بەتبۇرىس رەتىندە باعالايمىن. ارينە بۇل ءۇشىن بارلىق ازاماتتار ءبىر ماقسات, ءبىر مۇددەمەن العا ۇمتىلۋلارى ءتيىس.
يكرام حاشيمجانوۆ,
«دۋستليك» وزبەك قاۋىمداستىعىنىڭ توراعاسى
