قازىرگى تاڭدا قازاقستان ۇكىمەتى پرەزيدەنتتىڭ باستامالارىن جۇزەگە اسىرۋ بويىنشا جول كارتاسىن جاسادى.
نۇرسۇلتان نازارباەۆ اتاپ كورسەتكەندەي, قازاقستان ءوز مۇمكىندىكتەرىن ءتيىمدى پايدالانۋى ءتيىس. «قازاقستان – ءبىزدىڭ ورتاق ءۇيىمىز» يدەياسى باۋىرلاس ەلدىڭ دامۋىنا تىڭ سەرپىن بەرەدى.
پرەزيدەنتتىڭ الەۋمەتتىك باستامالارى ابدەن زەردەلەنىپ, زەرتتەلىپ بارىپ جاريالانعانى انىق بايقالادى. بۇل ماسەلە بويىنشا بىلىكتى ماماندار تىڭعىلىقتى جۇمىس ىستەگەنى كورىنىپ تۇر. ويتكەنى اتاپ كورسەتىلگەن بەس باسىمدىق بويىنشا نەگىزگى ماقساتتار مەن ولاردىڭ ورىندالۋ مەرزىمى, اتالعان مىندەتتەردىڭ قارجىلىق اۋقىمى ناقتى كورسەتىلگەن. ماسەلەن «7 – 20 – 25» باعدارلاماسىن قاراستىراتىن بولساق, مۇندا قازاقستاندىقتاردىڭ يپوتەكالىق نەسيەنى 7 پايىزدىق مولشەردە 25 جىلعا الا الاتىنى, العاشقى جارنا 20 پايىزدى قۇرايتىنى ناقتىلانعان. بۇل يپوتەكالىق نەسيەنىڭ اي سايىنعى تولەمىن ەداۋىر تومەندەتەدى.
ءۇشىنشى الەۋمەتتىك باستاما بويىنشا «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ» ىسىنە دە قاتىستى ناقتى مىندەتتەر كۇن تارتىبىنە شىعارىلىپ وتىر. قازاقستان پرەزيدەنتى ءبىلىم ساپاسىن جانە وعان قولجەتىمدىلىكتى ارتتىرۋ ماقساتىندا جىل سايىنعى 54 مىڭ گرانتقا قوسىمشا 2018-2019 جىلعى وقۋ جىلىنا 20 مىڭ گرانت ءبولۋدى تاپسىردى. بۇل – الەۋمەتتىك ماڭىزى زور اۋقىمدى جوبا.
«ەلدى گازبەن قامتاماسىز ەتۋدى جالعاستىرۋ» جونىندەگى باستاما دا الەۋمەتكە كوتەرىڭكى كوڭىل-كۇي سىيلاۋدا. تاۋەلسىزدىك جىلدارىندا قازاقستاندا گاز جەتكىزۋ كولەمى 8 ميللياردتان 52 ميلليارد تەكشە مەترگە دەيىن ءوستى. بىراق بۇل جەتكىلىكسىز ەكەنى انىق. ەلدىڭ ورتالىق جانە سولتۇستىك ايماقتارى ءالى كۇنگە گازسىز وتىر. وسى ورايدا پرەزيدەنت ەلدى گازداندىرۋ جونىندەگى جاڭا باستاماسىن كۇن تارتىبىنە شىعاردى. بۇل باستاما بويىنشا 2,5 ملن ادام گازبەن قامتىلاتىن بولادى. بۇل ءوز كەزەگىندە شاعىن جانە ورتا بيزنەستىڭ دامۋىنا ءارى ەكولوگيالىق جاعدايعا وڭ ىقپالىن تيگىزەتىنى ءسوزسىز.
ەندى پرەزيدەنت نۇرسۇلتان نازارباەۆ كۇن تارتىبىنە شىعارعان مىندەتتەردى جۇزەگە اسىرۋ ءۇشىن ەل ۇكىمەتى تىڭعىلىقتى جۇمىس ىستەۋى ءتيىس. مەن مەملەكەت باسشىسى العا قويعان مىندەتتەردى قازاقستاندىقتاردىڭ قارقىندى تۇردە ەڭسەرەتىنىنە سەنەمىن.
ەلحان شاحينوعلى,
ساياساتتانۋشى (ازەربايجان)
