باسپانا ماسەلەسىنە بايلانىستى وبلىستا وسىعان دەيىن دە جۇمىستار قىزۋ جۇرگىزىلىپ كەلدى. سوڭعى ءۇش جىلدا تۇرعىن ءۇي قۇرىلىسىنا سالىنعان ينۆەستيتسيانىڭ كولەمى 10 ەسە ارتقان. ءبىر جىلدا بەرىلگەن باسپانا 36 پايىزعا ارتقان, 2,6 مىڭ وتباسى قونىس تويىن تويلادى. قوستاناي قالاسىنىڭ وزىندە, قالا ىرگەسىندە جاڭا تۇرعىن اۋداندار بوي كوتەرىپ كەلەدى. الايدا 24,5 مىڭ ادام باسپانا كەزەگىندە تۇر.
– ەلباسى ۇسىنىپ وتىرعان «7 – 20 – 25» مەملەكەتتىك باعدارلاماسى قوستانايلىقتاردىڭ دا يپوتەكالىق نەسيە الۋ مۇمكىندىگىن بارىنشا كەڭەيتەتىن بولادى. وندا ايتىلعان جەڭىلدىكتەر ارقىلى ادامدار باسپانا جاعدايىن جاقسارتاتىن بولادى, – دەدى ارحيمەد بەگەجان ۇلى.
ەلباسى باستامالارى تەك الەۋمەتتىك سالانى دامىتۋدى عانا كوزدەمەيدى, بۇل ىشكى نارىقتىڭ, سونىمەن قاتار قۇرىلىس سالاسىنىڭ دامۋىنا ىقپال ەتەدى. ەلباسى باستاماسى ارقاسىندا قۇرىلىس جۇمىستارىن بولاشاقتا اۋىلعا قاراي بۇرامىز دەپ ويلايمىن. اۋىل شارۋاشىلىعىن دامىتۋ ءۇشىن مامان كەرەك, ال جاس ماماندارعا باسپاناسىز قيىن بولاتىنىن كورىپ وتىرمىز. «7 – 20 – 25» مەملەكەتتىك باعدارلاماسى اۋىلداعىلارعا دا ءۇي سالۋعا مۇمكىندىك بەرەدى, دەدى «يرينا ي ك» قۇرىلىس كومپانياسىنىڭ جەتەكشىسى الەكساندر كورچينسكي.
باسپانا ءسوز بولعاندا ەلباسى ۇندەۋىندەگى ءۇشىنشى باستامادا ايتىلعان ستۋدەنتتەردىڭ جاتاقحانا جاعدايىن جاقسارتۋ ماسەلەسى بىردەن ەسكە تۇسەدى. الدىمەن ەلباسى 2018-2019 جىلدارى جوعارى ءبىلىم الۋ ءۇشىن جىل سايىن بولىنەتىن 54 مىڭ گرانتقا تاعى قوسىمشا 20 مىڭ بولىنەتىنىن ايتتى. ونىڭ 11 مىڭ گرانتى تەحنيكالىق ماماندىقتار دايىنداۋعا ارنالادى. ال قازىر ءتورتىنشى ونەركاسىپتىك رەۆوليۋتسيا جاعدايىنداعى ەكونوميكا ءۇشىن تەحنيكالىق ماماندار اسا قاجەت. ەلباسى باستاماسىمەن بولىنەتىن قارجىعا ەندى مىڭداعان ماماندار دايىنداۋعا مۇمكىندىك تۋادى. ال سول بولاشاق ماماندار ساپالى ءبىلىم الۋ ءۇشىن ولاردىڭ الەۋمەتتىك جاعدايىن جاقسارتۋ تاعى بار. قوستانايلىق ستۋدەنت جاستاردىڭ جاتاقحاناعا زارۋلىگى بار ەكەنى جاسىرىن ەمەس. قازىر وبلىس وڭىرىندە 3305 ستۋدەنت, ونىڭ ىشىندە جوعارى وقۋ ورىندارىندا – 1805, كوللەدجدەردە 1455 ستۋدەنتتىڭ جاتاقحانادا ورنى جوق. ونىڭ بارلىعىن شەشۋ ءۇشىن وڭىردەگى رەزەرۆتەر دە قاراستىرىلاتىن بولادى.
– ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى جانىنداعى جاتاقحانانىڭ جوبالاۋ-سمەتالىق قۇجاتتارى دايىن تۇر. ول پايدالانۋعا بەرىلگەندە ستۋدەنتتەردىڭ بوس ۋاقىتىن دۇرىس ۇيىمداستىرۋعا ىقپال ەتەدى, جاستار اراسىنداعى قىلمىس تا ازاياتىن بولادى. ەندى وبلىستاعى باسقا جوعارى وقۋ ورىندارىمەن دە مەملەكەت پەن جەكەمەنشىك ارىپتەستىگى اياسىندا وسىنداي جۇمىستاردى قولعا الاتىن بولامىز, – دەدى ءوڭىر باسشىسى.
وبلىستاعى رۋدنىي جانە ارقالىق سەكىلدى قالالاردا دا جوعارى, ورتا وقۋ ورىندارى بار. ولاردا ەسىك-تەرەزەسى ۇڭىرەيىپ بوس قالعان, بىراق قابىرعاسى, ىرگەتاسى مىقتى كوپقاباتتى ۇيلەر ءالى تۇر. ارحيمەد بەگەجان ۇلى وسىنداي ۇيلەردى قايتا جوندەسە, ول ستۋدەنتكە جاتاقحانا, كاسىپكەرگە جۇمىس بولاتىنىن دا ەسكە سالدى.
سونىمەن قاتار اكتيۆتە ايلىق جالاقىنى ءوسىرۋ ءۇشىن سالىق جۇكتەمەلەرىن ازايتۋ, شاعىن نەسيەلەردى كەڭەيتۋ, ەلىمىزدى ودان ءارى گازداندىرۋ ماسەلەلەرى تۋرالى اڭگىمە بولدى. وبلىستا 331 632 جالدامالى جۇمىسشىلار بار. ارينە سالىق جۇكتەمەسى ازايعاندا, بوساعان قارجىنىڭ ەسەبىنەن ولاردىڭ جالاقىسى كوبەيەدى.
جاپپاي كاسىپكەرلىكتى دامىتۋ ءۇشىن ەلباسى ۇندەۋىندەگى ءتورتىنشى باستاما يگى ىستەرگە مۇرىندىق بولادى. ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ ءۇشىن 2018 جىلى قالالاردا 237 ملن تەڭگە, اۋىلداردا 2 ملرد 83 ملن تەڭگە ءبولىندى. 2016 جىلدان بەرى وبلىستا «قوس قولداۋ» كاسىپكەرلەردى وڭىرلىك قارجىلاي قولداۋ باعدارلاماسى مەن «اتامەكەن قوستاناي» شاعىن نەسيە ۇيىمى ارقىلى 46 نەسيە جانە 142 شاعىن نەسيە بەرىلگەن. ەندى ەلباسى ۇندەۋىندە ايتقان جەڭىلدىكتەردى پايدالانىپ, قوستاناي وڭىرىنەن دە مىڭداعان ادامدار ءوز ءىسىن جەڭىل اشا الاتىن بولادى.
ەلباسى نۇرسۇلتان نازارباەۆ ۇندەۋىندەگى بەسىنشى باستاما – ەلدى ودان ءارى گازداندىرۋ ماسەلەسى قوستانايلىقتاردىڭ دا تۇرمىسىن كوتەرە تۇسەتىن بولادى. گازداندىرۋ قوستاناي ءوڭىرى ءۇشىن دە ينفراقۇرىلىمدى دامىتۋدىڭ ماڭىزدى باعىتىنىڭ ءبىرى بولىپ سانالادى. وبلىس وڭىرىندەگى 880 مىڭ تۇرعىننىڭ 54 پايىزى كوگىلدىر وتىنمەن قامتىلعان. بيىل فەدوروۆ, اۋليەكول اۋداندارىنداعى ەلدى مەكەندەردى جانە رۋدنىي قالاسىنداعى جەكەلەگەن شاعىن تۇرعىن اۋدانداردى گازداندىرۋ ءۇشىن 2 ملرد تەڭگە قارجى ءبولىندى. كوگىلدىر وتىن جەتكىزۋ ءۇشىن وبلىستا مۇنان بولەك تە جوبالار قاراستىرىلىپ وتىر. ول بويىنشا الداعى ۋاقىتتاردا شالعايدا جاتقان قامىستى, دەنيسوۆ, اۋليەكول, جىتىقارا اۋداندارىنداعى ەلدى مەكەندەر دە گازدىڭ راحاتىن كورەتىن بولادى.
نۇرسۇلتان نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى ۇندەۋى مەملەكەت ساياساتى الدىمەن ەلدىڭ الەۋمەتتىك جاعدايىن كوزدەيتىنىن كورسەتتى. ءتىپتى قيىن جىلداردىڭ وزىندە ەلىمىزدە زەينەتاقى, جالاقى, جاردەماقى ءوسىرىپ وتىردى. جاقسى تۇرمىس حالىقتىڭ بىرلىگىن نىعايتا تۇسەدى. ەلباسى ساياساتىنىڭ كوزدەگەنى دە وسى.
ءنازيرا جارىمبەت,
«ەگەمەن قازاقستان»
قوستاناي
