بۇرىن بەتتەسىپ كورمەگەن بۇل جاڭا ءۇردىس ەل وڭىرلەرىنە دە تىڭ مىندەتتەر جۇكتەيدى. وسى ورايدا پرەمەر-ءمينيستردىڭ ورىنباسارى اسقار جۇماعاليەۆتىڭ اقتوبە وبلىسىنا ساپارىنىڭ باستى ماقساتى – «تسيفرلى قازاقستان» مەملەكەتتىك باعدارلاماسىنا سايكەس وڭىردە قولعا الىنعان ىستەرمەن تانىسۋ بولعانىن ايتا كەتكەن ءجون.
بىردەن ايتارىمىز, وڭىردەگى ونەركاسىپتىك كاسىپورىندار مەن اۋىل شارۋاشىلىعى وندىرىسىندە بۇل ءىستىڭ العاشقى اياق الىسى ءتاپ-ءتاۋىر. ماسەلەن ءوڭىر اۋماعىنداعى «ايس» جشس تاۋارلى-ءسۇت فەرماسىنىڭ قىزمەتىمەن تانىسۋ بارىسىندا اسقار قۋانىش ۇلى مۇندا وزگە وڭىرلەرگە ۇلگى رەتىندە ۇسىنارلىقتاي تسيفرلاندىرۋ ءىسىنىڭ وڭ مىسالدارى مول ەكەنىنە كوزىن ايقىن جەتكىزدى. مۇنداعى اگروونەركاسىپتىك ۇدەرىستەر تولىعىمەن اۆتوماتتاندىرىلعان. سونداي-اق ءىرى اگروقۇرىلىمدا تسيفرلاندىرۋ ۇدەرىستەرىنىڭ تيىمدىلىگى قازىردىڭ وزىندە العاشقى ناتيجەسىن بەرۋدە. بۇعان دالەل, ءبىر سيىردان كۇنىنە ورتاشا ەسەپپەن 25-30 ليتر ءسۇت ساۋىلادى. كۇنىنە 40-45 ليترگە دەيىن ءسۇت بەرەتىن سيىرلار دا بار. تسيفرلاندىرۋ باعىتتالعان باستامالار سۋارمالى ەگىستىك ونىمدىلىگىن بەس ەسەگە دەيىن ارتتىرۋعا مۇمكىندىك بەرىپ وتىر.
ايتالىق, بۇعان دەيىن مال ازىعىنا قاجەتتى جۇگەرى سۇرلەمىنىڭ ءار گەكتارىنان الىنعان ءونىم 100 تسەنتنەردەن اسپاسا, بۇگىندە ونىڭ مولشەرى 480 تسەنتنەردى قۇرايدى. «ايس» جشس جاڭا تەحنولوگيالىق جەلىلەر ەڭبەك ونىمدىلىگىن بىرنەشە ەسە كوتەرۋگە, انالىق سيىرلاردىڭ جاي-كۇيىن تولىقتاي باقىلاۋعا الۋعا مۇمكىندىك بەرەدى. الداعى كەزدە ايماقتا «ايس» تاۋارلى-ءسۇت فەرماسى ۇلگىسىندە تاعى دا 31 شارۋاشىلىق قۇرىلماق.
اسقار جۇماعاليەۆ بۇل ۇدەرىستەرگە وڭ باعاسىن بەرە كەلىپ, تسيفرلى تەحنولوگيانى ەنگىزبەيىنشە ءبىر دە ءبىر شاعىن, ورتا جانە ءىرى بيزنەستىڭ ءورىسى كەڭەيە قويمايتىنىن اتاپ كورسەتتى. سونداي-اق وڭىردە كاسىپورىنداردى جاڭعىرتۋ مەن تسيفرلاندىرۋعا جانە اۆتوماتتاندىرۋعا باعىتتالعان باعدارلامالار دا وڭ ناتيجەسىن بەرە باستاعانى بەلگىلى بولىپ وتىر. ءارى وسى ارقىلى ونىمدەردى ەكسپورتقا شىعارۋعا جاڭا مۇمكىندىكتەر اشىلعان. ونىڭ جارقىن مىسالىنىڭ ءبىرى اقتوبە رەلس ارقالىعى زاۋىتى بولىپ تابىلادى.
ارينە وسىعان قاراپ وڭىردە جاڭا اقپاراتتىق تەحنولوگيالاردى ەنگىزۋ ماسەلەسىندە ەشقانداي كەدەرگىلەر مەن پروبلەمالار جوق دەۋگە بولمايدى. اسىرەسە وڭىردەگى ءبىلىم بەرۋ مەن دەنساۋلىق ساقتاۋ سالالارىندا بۇل ىستە بىرقاتار كىدىرىستەردىڭ ورىن الىپ وتىرعانى ەشكىمگە دە قۇپيا ەمەس. مۇنداعى ءبىرىنشى ماسەلە ينتەرنەت جەلىسى جىلدامدىعى تومەندىگىنەن تۋىندايدى. ءتىپتى مۇنى ايتپاعاندا, ينتەرنەت جۇيەسىنەن مۇلدەم تىس قالىپ وتىرعان شالعايداعى ەلدى مەكەندەر دە بار. تالشىقتى وپتيكالىق جەلىنىڭ جەتىسپەۋى دە ءبىراز قولبايلاۋ تۋعىزۋدا.
وسى ماسەلەلەر جونىندە ايتىپ بەرگەن اقتوبە وبلىسىنىڭ اكىمى بەردىبەك ساپارباەۆتىڭ ۇسىنىس-تىلەكتەرىنە وراي اسقار جۇماعاليەۆ ءوڭىردىڭ بارلىق ەلدى مەكەندەرىنە كەڭجولاقتى ينتەرنەت جەلىسىن سپۋتنيكتىك قوندىرعىلار ارقىلى جەتكىزۋگە ۇكىمەت تاراپىنان قولداۋ كورسەتىلەتىنىن مالىمدەدى. قازىرگى كۇنى ءوڭىر ەكونوميكاسى مەن الەۋمەتتىك سالاسىن تسيفرلاندىرۋ ىسىندە وبلىستا كەڭ اۋقىمدى باعدارلامالار جاسالىپ, سوعان ساي كەشەندى ءىس-شارالار قولعا الىنعان. بۇل جونىندە اسقار جۇماعاليەۆكە وبلىس اكىمىنىڭ ورىنباسارى قايرات بەكەنوۆ مالىمدەدى.
ۆيتسە-پرەمەر ساپار قورىتىندىسىندا, تۇتاستاي العاندا اقتوبە وبلىسىنداعى تسيفرلاندىرۋ ماسەلەسى بويىنشا ەلباسى جولداۋىندا العا قويىلعان مىندەتتەر دەڭگەيىندە شەشىمىن تاۋىپ كەلە جاتقانى جونىندە ءتۇيىن جاسادى. 14 ناۋرىز ەلىمىزدىڭ باتىس وڭىرلەرىندە جىلدىڭ باسى دەپ سانالىپ, كورىسۋ كۇنى اتالىپ وتەتىنىنە وراي ول بارشا اقتوبەلىكتەردى وسى اتاۋلى كۇنمەن قۇتتىقتادى.
تەمىر قۇسايىن,
«ەگەمەن قازاقستان»
اقتوبە
