– ءبىز قازاقستانعا, جاس ەلوردامىز – استاناعا كەلگەندەرىڭىز ءۇشىن ريزاشىلىق بىلدىرەمىز. بۇگىنگى كەزدەسۋىمىزدىڭ ەكىجاقتى قاتىناستار جىلناماسىنداعى ماڭىزى ەرەكشە, – دەدى قازاقستان پرەزيدەنتى.
مەملەكەت باسشىسى تاجىكستان قازاقستاننىڭ ماڭىزدى ستراتەگيالىق ارىپتەسى بولىپ سانالاتىنىن ايرىقشا اتاپ ءوتىپ, وسى جىلدار ىشىندە ەكى ەل اراسىندا تاتۋ كورشىلىك ءارى سەنىمدى قارىم-قاتىناس ورناعانىن ايتتى.
– ءبىز وڭىرلىك جانە جاھاندىق دەڭگەيدە ءوزارا ىقپالداسىپ كەلەمىز. ارامىزدا 80-نەن استام شارتتار مەن كەلىسىمدەردى قامتيتىن اۋقىمدى قۇقىقتىق بازا قالىپتاسقان, – دەدى قازاقستان پرەزيدەنتى.
نۇرسۇلتان نازارباەۆ ەكىجاقتى قارىم-قاتىناستاردى ودان ءارى نىعايتۋعا باعىتتالعان, بۇگىن قول قويىلاتىن كەلىسىمدەردىڭ ماڭىزدىلىعىن اتاپ ءوتتى.
– قارىم-قاتىناسىمىزدىڭ 25 جىلى – دوستىقتىڭ جانە ءبىر-بىرىمىزگە قولداۋ كورسەتۋىمىزدىڭ تاريحى. بۇگىن ءبىز نەگىزگى قۇجاتقا قول قويامىز. بۇل – ءبىزدىڭ ورتاق جۇمىسىمىزدى قورىتىندىلاپ, كەلەشەكتەگى باسىمدىقتارىمىزدى ايقىندايتىن بىرلەسكەن مالىمدەمە, – دەدى مەملەكەت باسشىسى.
ەمومالي راحمون نۇرسۇلتان نازارباەۆقا جوعارى ماراپات – «پاراسات» وردەنىن تابىس ەتكەنى ءۇشىن العىس ايتىپ, قازاقستان مەن تاجىكستان اراسىنداعى قارىم-قاتىناستى نىعايتۋعا قوسقان ۇلەسىن جوعارى باعالاعانىنا شىنايى ريزاشىلىعىن ءبىلدىردى.
– قازاقستانمەن اراداعى قارىم-قاتىناس تاجىكستاننىڭ سىرتقى ساياساتىندا جەتەكشى ورىن الادى. ءبىز ونى قارقىندى تۇردە دامىتۋعا نيەتتىمىز. تاجىكستان حالقى دا جانە جەكە ءوزىم دە حالقىمىزدىڭ باسىنا قيىن كۇن تۋعاندا قولداۋ ءبىلدىرىپ, ەكونوميكالىق تۇرعىدان كومەك كورسەتكەندەرىڭىزدى ەشقاشان ۇمىتپايمىز, – دەدى تاجىكستان رەسپۋبليكاسىنىڭ پرەزيدەنتى.
سوڭىندا ە.راحمون سەنىمدى ساياسي پلاتفورما مەن مىقتى قۇقىقتىق بازاعا نەگىزدەلگەن ەكىجاقتى ىنتىماقتاستىقتىڭ تابىستى دامىپ كەلە جاتقانىن اتاپ ءوتتى.
