« ۇلى دالانىڭ ۇلتتىق داستۇرلەرى» اتتى حالىقارالىق فورۋم اتىراۋدا العاش رەت وتكىزىلۋدە جانە ەكى كۇنگە سوزىلادى. فورۋم اياسىندا بىرقاتار مادەني جانە عىلىمي ءىس-شارالار وتەدى دەپ حابارلادى اتىراۋ وبلىسىنىڭ وڭىرلىك كوممۋنيكاتسيالار قىزمەتى.
«كورىسۋ», «جاڭا جاسىڭمەن, ۇلى دالام» ۇلتتىق داستۇرلەردى جالعاستىرۋعا ارنالعان اۋقىمدى تەاترلاندىرىلعان فەستيۆال يساتۆي-ماحامبەت اتىنداعى ورتالىق الاڭدا ءوتتى.
اتالعان ءىس-شارانىڭ حالقىمىزدىڭ سالت-داستۇرلەرىن, مادەنيەتىمىزدى, ءومىر ءسۇرۋ سالتتارىن ودان ءارى بايىتۋ جانە جاس بۋىندى قالىپتاستىرۋ ءۇشىن ماڭىزى زور. ءىس-شارادا 700-دەي ءارتىس, 5 ەلدىڭ وكىلدەرى, تۇركيا, ءازىربايجان, قىرعىزستان, رەسەي مەن وزبەكستاننان كەلگەن 30 شىعارماشىلىق ۇيىم ونەر كورسەتتى.
اتىراۋ وبلىسىنىڭ ەتنو-مادەني بىرلەستىكتەرىنىڭ وكىلدەرى ءوز كيىز ۇيلەرىن ورناتىپ, مەرەكە قوناقتارىنا ۇلتتىق تاعامدارىن ۇسىنا وتىرىپ, مادەني سالت-داستۇرلەرىن كورسەتتى.
سونىمەن قاتار ورتالىق الاڭدا ۇلتتىق سپورت تۇرلەرىنەن جارىستار ءوتتى. فەستيۆالدىڭ اشىلۋىنا مىڭداعان كورەرمەن جينالدى.
اتىراۋ وبلىسىنىڭ اكىمى نۇرلان نوعاەۆ قۇتتىقتاۋ سوزىندە «كورىسۋدى» مەرەكەلەۋدىڭ رەسپۋبليكا اۋماعىندا تۇراتىن بارلىق حالىقتى جاقىنداستىراتىن ءداستۇردىڭ ءبىرى رەتىندەگى قازاق حالقى ءۇشىن ماڭىزدىلىعىن اتاپ ءوتتى.
- «مەملەكەت باسشىسى, قازاقستاننىڭ تۇڭعىش پرەزيدەنتى نۇرسۇلتان نازارباەۆ ءوز سوزدەرىندە بۇل ومىردە ءوز ورنىن تابۋ ءۇشىن ءاربىر ۇلت ءبىرتۇتاس, باسەكەگە قابىلەتتى بولۋى قاجەت دەپ بىرنەشە رەت اتاپ كورسەتتى. بۇگىن ءبىزدىڭ ەلىمىزدە ءومىر ءسۇرىپ جاتقان بارلىق ۇلتتاردىڭ بىرلىك پەن كەلىسىمدە ءومىر ءسۇرۋى ءۇشىن بارلىق جاعداي جاسالعان» - دەدى نۇرلان نوعاەۆ. – قازاقستاننىڭ الەمدىك قاۋىمداستىقتا الاتىن ورنى ەرەكشە. مەملەكەت باسشىسىنىڭ باستامالارىن بىرقاتار ەلدەردىڭ باسشىلارى ۇلگى ەتۋدە. ءبىرىنشى كەزەكتە بۇل قوعامدىق كەلىسىمنىڭ, ساياسي تۇراقتىلىقتىڭ, بەيبىتشىلىك پەن تىنىشتىقتىڭ بەلگىسى. بارلىق قازاقستاندىقتار ۇلت كوشباسشىسىن قولدايدى.
« ۇلى دالانىڭ ۇلتتىق داستۇرلەرى» حالىقارالىق فورۋمى مەملەكەت باسشىسىنىڭ «رۋحاني جاڭعىرۋ» باعدارلامالىق ماقالاسىن ورىنداۋ اياسىندا وتكىزىلۋدە جانە ەكى كۇنگە سوزىلادى. ءىس-شارانىڭ باستى ماقساتى – قازاق حالقىنىڭ ۇلتتىق سالت-داستۇرلەرىن تانىمال ەتۋ.
وسى ەكى كۇن ىشىندە فورۋم قوناقتارى ىرزا تۇرسىنزادانىڭ ەتنوقولونەرىنىڭ شەبەرلىك ساعاتتارىنا قاتىسا الادى. فورۋم اياسىندا رەسپۋبليكالىق ايتىس پەن قازاقستاننىڭ حالىق ءارتىسى باقىت قارابالينا اتىنداعى كۇيشى-دومبىراشىلار سايىسى وتەدى. ءابسوليۋتتى سالماق كاتەگوريالارىنداعى سپورتشىلاردىڭ قاتىسۋىمەن وتەتىن قازاق كۇرەسىنەن حالىقارالىق اشىق چەمپيونات فورۋم اياسىنداعى كوپشىلىك سپورتتىق ءىس-شارالاردىڭ ءبىرى بولماق. وسى كۇنى اتىراۋ قالاسىنىڭ تۇرعىندارى مەن قوناقتارى «سپيكەر №7» جاستار زياتكەرلىك كونفەرەنتسياسىنا قاتىسا الادى.
فورۋمنىڭ العاشقى كۇنى ي.تايمانوۆ پەن م.وتەمىس ۇلى اتىنداعى الاڭدا جەرگىلىكتى ارتىستەر مەن «Ringo» توبى, نۇربولات ابدۋللين, ءالي وقاپوۆ, تاۋەكەل ءمۇسىلىم جانە قايرات نۇرتاس سياقتى قازاقستاندىق ەسترادا جۇلدىزدارىنىڭ قاتىسۋىمەن وتەتىن كەشكى كونتسەرتكە ۇلاسادى.
15 ناۋرىزدا قازاقستاننىڭ, جاقىن شىعىس پەن ەۋروپا ەلدەرىنىڭ عالىمدارى «ناۋرىز – ادامزاتتىڭ ماتەريالدى ەمەس قۇندىلىعى رەتىندە» اتتى حالىقارالىق عىلىمي-تاجىريبەلىك كونفەرەنتسياعا قاتىسادى. مۇنايلى استانانىڭ فاريزا وڭعارسىنوۆانىڭ شىعارماشىلىعىنا ارنالعان رەسپۋبليكالىق ادەبي وقۋدى, « ۇلى دالا ۇلاعاتى» اتتى كىتاپتىڭ تۇساۋكەسەرىن, «دومبىرا Party» جاستار اكتسياسىن تاماشالاي الادى. ەكى كۇندىك فورۋم كونكۋرس جەڭىمپازدارىن ماراپاتتاۋمەن جانە «امانات» ۇلتتىق سىيلىعىن تاپسىرۋمەن اياقتالادى.
