كەشە مۇناي جانە گاز مينيسترلىگىندە قازاقستان رەسپۋبليكاسى مەن رەسەي فەدەراتسياسى اراسىنداعى ىنتىماقتاستىق جونىندەگى ۇكىمەتارالىق كوميسسيانىڭ ون بەسىنشى وتىرىسى ءوتتى. وعان ەلىمىزدىڭ مۇناي جانە گاز ءمينيسترى س.مىڭباەۆ پەن رەسەي فەدەراتسياسى ونەركاسىپ جانە ساۋدا ءمينيسترى ۆ.حريستەنكو جەتەكشىلىك ەتتى. وتىرىسقا كوميسسيانىڭ قازاقستاندىق جانە رەسەيلىك وكىلدەرى, سونداي-اق مينيسترلىكتەردىڭ, ۆەدومستۆولاردىڭ جاۋاپتى قىزمەتكەرلەرى قاتىستى.
كوميسسيانىڭ 15-وتىرىسىندا 30-دان استام ماسەلەلەر, اتاپ ايتساق, وتىن-ەنەرگەتيكالىق كەشەن, كولىك, ونەركاسىپ, اۋىل شارۋاشىلىعى, اتوم ەنەرگەتيكاسى, اسكەري-تەحنيكالىق ىنتىماقتاستىق, «بايقوڭىر» كەشەنى بويىنشا, عىلىم, ءبىلىم جانە جاڭا تەحنولوگيالار, سونداي-اق قورشاعان ورتانى قورعاۋ جانە تابيعاتتى پايدالانۋ سالاسىنداعى ماسەلەلەر قارالدى.
كوميسسيا قازاقستان ۇكىمەتى مەن رەسەي فەدەراتسياسى ۇكىمەتى اراسىندا 2008-2011 جىلدارعا ارنالعان ەكونوميكالىق ىنتىماقتاستىق باعدارلاماسىنا قاتىستى ءىس-شارالار جوسپارىن ورىنداۋداعى وڭ ناتيجەلەردى اتاپ كورسەتتى. تاراپتار قوس مەملەكەت اراسىندا ۇزاق مەرزىمدى ەكونوميكالىق ىنتىماقتاستىق باعدارلاماسىن (2020 جىلعا دەيىن) جانە ونى جۇزەگە اسىرۋ جونىندەگى 2012-2014 جىلدارعا ارنالعان ءىس-شارالار جوسپارىن دايىندادى.
كوميسسيانىڭ كەزەكتى وتىرىسى كەلەر جىلدىڭ 4-توقسانىندا ماسكەۋ قالاسىندا وتەتىن بولىپ بەلگىلەندى.
ءابدىراحمان قىدىربەك.
