ەلىمىز نارىقتىق ەكونوميكاعا وتكەلى بەرى زاڭدى تۇلعالارمەن بۇركەمەلەنگەن ەكونوميكالىق قىلمىستار ءجيى ورىن الا باستادى. وعان قوسا كاسىپكەرلىك قىزمەتتى باقىلاۋشى ورگانداردىڭ لاۋازىمدى تۇلعالارى تاراپىنان بيزنەس ىسىنە زاڭسىز ارالاسۋ دەرەكتەرى كوبەيىپ كەتتى. ال مۇنداي قاپتاعان كوررۋپتسيادان قۇتىلۋدىڭ امالى قانداي؟ مىنە, وسى ماسەلەلەر حالىقارالىق عىلىمي-پراكتيكالىق كونفەرەنتسيادا ءسوز بولدى.
كونفەرەنتسيا جۇمىسىنا قازاقستان, رەسەي, ليتۆا, بەلارۋس, ۋكراينانىڭ عالىمدارى, ۆەدومستۆولىق وقۋ ورىندارىنىڭ باسشىلارى, قۇقىق قورعاۋ ورگاندارى مەن قوعامدىق ۇيىم وكىلدەرى, دەپۋتاتتىق كورپۋس, سونداي-اق سىبايلاس جەمقورلىققا قارسى كۇرەس سالاسىنداعى ساراپشىلار قاتىستى. الدىمەن ءسوز العان ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ ورىنباسارى ا.لۋكين تاۋەلسىزدىگىمىزدىڭ جيىرما جىلدىعىن ءبىزدىڭ ەلىمىز جاڭا ساپالى دەموكراتيالىق ستاندارتتارمەن, ياعني زاڭ ۇستەمدىگىن قامتاماسىز ەتىپ, ادام قۇقىن بارىنشا قورعاۋ دارەجەسىنە قول جەتكىزۋىمىزبەن قارسى الىپ وتىرعانىمىزدى ايتىپ ءوتتى.
دەگەنمەن, وركەن جايعان ەلىمىزدىڭ الەۋەتىن السىرەتۋدى كوزدەگەن جەمقورلار ارەكەتى باسىلار ەمەس. بۇل ورايدا جەمقورلار جاماندىعىن تالماي جىرلايتىن قۇقىق قورعاۋ ورگاندارى دا قاراپ جاتپاعانى انىق. ويتكەنى, ولار جەمقورلاردى جاعادان العان جالىندى جۇمىستار جاپپاي جۇرگىزىلگەنىمەن «ترانسپارەنسي ينتەرنەشنل» كورسەتكىشىنە ساي ەلىمىز جەمقورلىققا قارسى تۇرۋ بويىنشا 105-ورىندى يەلەنۋى مەملەكەت پەن قوعام تاراپىنان كوررۋپتسياعا قارسى كەشەندى شارالاردى قابىلداۋ قاجەتتىگىن دە بىلدىرەدى دەيدى. ونداي شارالاردىڭ ءبىرى رەتىندە كولەڭكەلى ەكونوميكاعا قارسى كۇرەستى كۇشەيتۋدى العا تارتادى. اگەنتتىك ەكونوميكانىڭ وسىنداي سالاسىندا 219 ملرد. تەڭگە زيان كەلتىرگەن 3485 قىلمىستى انىقتاپ, ونىڭ تەك 101 ملرد. تەڭگەسىن قايتارا الدى.
كونفەرەنتسيادا ءسوز العاندار سىبايلاس جەمقورلىققا قارسى ارەكەت پەن ەكونوميكالىق قاۋىپسىزدىكتى قامتاماسىز ەتۋدىڭ قىلمىستىق-قۇقىقتىق ءجانە كريمينولوگيالىق ءجايىن, قىلمىستىق ءىس جۇرگىزۋ جانە كريميناليستيكالىق ءتۇرلەرىن, الەۋمەتتىك-ساياسي, اقپاراتتىق جانە ەكونوميكالىق ماسەلەلەرىن ورتاعا سالدى.
الەكساندر تاسبولاتوۆ.
