جاقىندا عانا الەۋمەتتىك جەلىلەر مەن سپورت سايتتارىندا كوپتەگەن اقپارات جارىق كوردى. ونىڭ ەڭ الدى «Astana Pro Team» ۆەلوكومانداسىنىڭ باس مەنەدجەرى الەكساندر ۆينوكۋروۆپەن بايلانىستى ەدى. ۆەلوۇجىمنىڭ باسشىسى قارجىنىڭ جەتىسپەي جاتقانىن العا تارتىپ, كوماندانىڭ جابىلىپ قالۋ قاۋپى بار ەكەنىن ايتتى. وليمپيادا چەمپيونىنىڭ سوزىنە سەنسەك, 2018 جىلدىڭ العاشقى ايلارىندا كوماندا وتكەن جىلدان ۇنەمدەگەن قارجىعا كۇن كورىپتى. ەندى ول اقشا تاۋسىلىپ, جاقىن ارادا شاباندوزدار جالاقىسىز قالاتىن ءتۇرى بار. «جىل باسىنان بەرى ومان تۋرى مەن ۆالەنسيا جانە اندالۋسيا ۆۋەلتالارىندا توپ جاردىق. قازاقستان اتىن الەمگە تانىتىپ ءجۇرمىز. وسى كەزگە دەيىن جەتكەن جەتىستىگىمىزدىڭ 30 پايىزىن قازاقستاندىق شاباندوزدار يەلەندى. بۇل ەلىمىزدەگى ۆەلوسپورتتىڭ دامىعانىنىڭ كورىنىسى. وسىنداي كومانداعا قارجى دەر كەزىندە بەرىلمەسە, بارلىعىنان ايىرىلعالى تۇرمىز», دەپ بايبالام سالدى ۆينوكۋروۆ.
العاشقىدا قوعامدىق پىكىر اسا ءورشي قويعان جوق. جىل باسىندا قارجى ۋاقتىلى تۇسپەي, ءسال كەشىگۋلەر بولاتىنى قالىپتى جاعدايعا اينالعالى قاشان. الايدا ۆينوكۋروۆتىڭ مالىمدەمەسى شىققانى سول ەدى, ءىزىن الا «استانا» فۋتبول كلۋبى دا ءسوز الدى. مىسالعا, كلۋبتىڭ اتقارۋشى ديرەكتورى قايسار بەكەنوۆ بۇل قارجى تاپشىلىعىن كورۋىمىزدىڭ ءبىرىنشى جىلى ەمەس دەيدى. كوماندا وتكەن جىلى كورسەتكەن كەرەمەت ونەرىنە تيەسىلى سىياقىسىن الماعان. «كوپتەگەن فۋتبولشى الدىندا قارىزىمىز بار. بۇلاي جالعاسا بەرسە, كلۋب بەلشەسىنەن قارىزعا باتىپ, بونكروتقا ۇشىرايدى. وسىنشاما ۋاقىت تەر توگىپ, ەۋروپاعا تانىمال كوماندا قۇرعان ەڭبەگىمىز ءبىر كۇندە جەلگە ۇشپاق», دەيدى قايسار بەكەنوۆ.
«استانا» مەن «سپورتينگ» ويىنىنان كەيىن كوماندانىڭ باس باپكەرى ستانيمير ستويلوۆ تا وسى ماسەلەگە ارنايى توقتالعان بولاتىن. «مەن ءوز بولاشاعىم عانا ەمەس, كلۋبتىڭ ەرتەڭى ءۇشىن دە قام جەدىم. ەگەر وزدەرى ۋادە ەتكەن اقشا بەرىلمەيتىن بولسا, وندا جىلدار بويى جيناعان ابىرويىمىز ءبىر كۇندە توگىلە سالماق. ودان كەيىن بۇل كوماندانى باسىنان باستاپ قايتادان جيناقتاۋ كەرەك. ەندى عانا قالىپتاسىپ كەلە جاتقاندا, ورتا جولدان تايقىپ كەتۋ ماعان دا اۋىر ءتيىپ وتىر», دەپ كۇڭىرەندى.
بولگاريالىق باپكەردىڭ, كلۋب باسشىلارىنىڭ دەمەۋشىلەرگە وكپەسى قارا قازانداي ەكەنىن وتكەن جىلدان بىلەمىز. الايدا شىدامنىڭ دا شەگى جەتىپ, شاماسى فۋتبولشىلار مەن باپكەرلەر وزدەرىنە وزگە جۇمىس قاراستىرۋدى باستاعان سەكىلدى.
جوعارىدا اتالعان كلۋبتاردىڭ وزگەلەرى نەگە جۇمعان اۋىزدارىن اشپاي وتىر دەگەن ويعا قالامىز. ونىڭ دا ءبىر سەبەبى بار كورىنەدى. «استانا» كاسىپقوي سپورت كلۋبى قۇرىلعالى بەرى وسى ەكى كلۋبتان وزگەسى جارىتىپ ناتيجە دە كورسەتپەگەن. ياعني قارجى سۇراپ, باس كوتەرۋگە داتتەرى شىداس بەرمەسە كەرەك. «استانا» باسكەتبول كلۋبى ءوز الاڭىندا 8 ويىن قاتارىنان ۇتىلىپ, قۇرىلعالى بەرى پلەي-وفف ساتىسىن اڭساپ, ۆتب بىرىڭعاي باسكەتبول ليگاسىنىڭ ماڭگى باقي اۋتسايدەرىنە اينالعان. «Astana Motorsports» راللي كومانداسىنىڭ جاعدايى دا بەلگىلى. مۇنداي كوماندا بار ەكەنىن كوپتەگەن قازاقستاندىق جانكۇيەرلەر بىلە دە بەرمەيدى. وڭتۇستىك امەريكا مەن افريكا جولدارىندا جورتۋىلداپ جۇرگەن كوماندا «ايدالادا اق وتاۋ, اۋزى-مۇرنى جوق وتاۋ» ىسپەتتى. جاقىن ارادا «سامۇرىق-قازىنا» تاراپى بۇل سپورتتىق كلۋب ءوز قىزمەتىن توقتاتادى دەپ اقپارات تاراتتى. دەمەك بۇرىننان بەرى قىرۋار قارجىنى يەمدەنىپ كەلگەن كوماندانىڭ جابىلۋى كاسىپقوي كلۋبقا جەڭىلدىك جاسادى.
ايتپاقشى, كلۋب ساپىندا شوگەننەن (ات پولوسى) جانە قول دوبىنان دا كوماندالار بار. جاڭادان قۇرىلعان ۇجىمداردان ازىرگە ناتيجە تالاپ ەتىپ وتىرعان ەشكىم جوق. سەبەبى باستاپقى جىلى 1 ميلليون ەۋرو كولەمىندە قارجى كەتكەننەن سوڭ, بۇل جوبالاردى قازىر پرەزيدەنتتىك كلۋب ەش قارجىلاندىرمايدى. الايدا بۇل كلۋبتار دەمەۋشىلەردىڭ ارقاسىندا كۇن كورىپ كەلەدى.
شىنىن ايتۋىمىز كەرەك, باستاپقىدا ەل ابىرويىن كوتەرىپ, بەدەلىمىزدى اسقاقتاتاتىن جارنامالىق جوبالار سپورتتىق تۇرعىدان دا, اتاق شىعارۋ جاعىنان دا قىزمەت قىلۋى ءتيىس ەدى. «استانا» فۋتبول كلۋبى مەن «Astana Pro Team» ۆەلوكومانداسىنان باسقالارى نەگىزگى مۇددەنىڭ ماڭىنا دا جولامادى. ەندى جاقىن ارادا ساراپتامالىق-زەرتتەۋ جۇمىستارىنان كەيىن كاسىپقوي كلۋب باسشىلارى ءبىر شەشىمگە كەلۋى ءتيىس. جىل سايىن جەلگە شاشىلىپ جاتقان قارجىنىڭ ەسەبى سول كەزدە بەلگىلى بولار.
ەرمۇحامەد ماۋلەن,
«ەگەمەن قازاقستان»
