– جايداربەك, قازىر بولليۆۋدتا, «Princess» تاريحي تۋىندىسىنىڭ تۇسىرىلىمىنە قاتىسىپ جاتقانىڭىزدى باق ارقىلى وقىپ, ءبىلىپ جاتىرمىز. ات قۇلاعىندا ويناعان كوشپەندىلەر مەن ءۇندى تاريحىندا ۇقساستىقتار بار سياقتى عوي.
– ات قۇلاعىندا ويناۋ, اساۋ تۇلپاردى اۋىزدىقتاۋ تەك ازيالىقتارعا نەمەسە قازاقتارعا عانا ءتان ونەر ەمەس شىعار. اقش-تا, لاتىن امەريكاسىندا مۇنى سپورتتىڭ ءبىر ءتۇرى رەتىندە قاراستىرادى. بىراق حالىقتىڭ مەنتاليتەتى, مىنەز-قۇلقى حاس تۇلپارلاردى تىزگىندەۋدىڭ تاكتيكالىق تاسىلدەردەرىنە وزگەرىستەر الىپ كەلگەنى داۋسىز. مىسالى ەو, اقش نەمەسە ۇندىستانداعى كاسكادەرلەر تەك ەرەجەگە باعىنادى. بەلگىلى ءبىر قالىپتىڭ شەڭبەرىنەن شىقپايتىن ونەردەن سەن ەشقاشان ءلاززات الا المايسىن. اتقا مىنگەنىڭدە سەن وعان ەركىندىك بەرۋىڭ كەرەك. سەنىڭ شەبەرلىگىڭ – حاس تۇلپاردىڭ ەركىندىگىن ءوزىڭنىڭ ەرىك-جىگەرىڭە باعىندىرا بىلۋىڭدە.
ماعان ەلدە جۇرگەندە كينوونىمنىڭ بيۋدجەتى ماڭىزدى ەمەس. كينو الاڭى مەن ءۇشىن تاجىريبەمدى, شەبەرلىگىمدى ارتتىراتىن الاڭ. ءوز فيلمدەرىمىزدىڭ بىرىندە مەنىڭ كوماندامداعى دۋبلەردىڭ ءبىرى ءجىپ-جىڭىشكە سىمعا بايلانىپ, 9-شى قاباتتان جەرگە قۇلادى. تروست كەز كەلگەن ساتتە ءۇزىلىپ كەتسە, نە بولارىن كوز الدىڭا ەلەستەتۋدىڭ ءوزى قيىن عوي. شەتەلدىك ارىپتەستەرىم مۇنى كورىپ «اقىماقسىڭدار, ازعانتاي اقىعا بولا مۇنداي جانكەشتىلىككە بارۋدىڭ قاجەتى جوق» دەيدى.
شەتەلدىك كينولارداعى مۇنداي قاۋىپتى تاسىلدەرىمدى قىمباتقا باعالايمىن, ال تۋعان جەرىمدە اقشا ماڭىزدى ەمەس. ءبىز تەك تيەسىلى جۇمىسىمىزدى جاقسى ىستەگىمىز كەلەدى. قازاق كاسكادەرلارىن ولاردىڭ بويىنداعى وتانشىلدىق سەزىمى مەن جاراتىلىسىنان بىرگە دارىعان جانكەشتىلىگى عانا دارالاندىرىلىپ تۇرادى.
– بولليۆۋدتاعى كاسكادەرلەر مىنەتىن اتتى ۇيرەتۋ ءتاسىلى قانداي ەكەن؟ بالا كۇنىمىزدە قۇلىنداردى قولىمىزدان قانت بەرىپ, وزىمىزگە يكەمدەپ الۋشى ەدىك...
– كەز كەلگەن تاكتيكا وزىڭە بەرىلگەن تۇلپاردىڭ ءيىسىن الۋمەن باستالادى. ول ءۇشىن ءۇش نەمەسە التى اي كەتەدى. ق ۇلىن كۇنىنەن باۋىر باسسا, مۇمكىن باسقاشا بولار ما ەدى. بىراق بىزدە ونداي مۇمكىندىك جوق. مىسالى, قازىر مۋمبايدا مەن ۇيرەتىپ جاتقان تۇلپار وسىعان دەيىن كەمىندە ون كاسكادەردىڭ قولىنان ءوتتى. سولاردىڭ مىنەزى ونىڭ بويىنا ءسىڭدى. ءبىر ايدا ۇيرەنەتىندەر بار, ءتىپتى ءۇش جىل بويى ۇستاعان ۇيرەنشىكتى ات كينو الاڭىندا مىنەز كورسەتىپ, تۋلايتىن ساتتەر بار. ەڭ باستىسى, كاسكادەر مەن جىلقى اراسىنداعى گارمونيا.
ءبىر قىزىعى, مەنىڭ توبىمداعى جىگىتتەرى اتتاردى تەز جۋاسىتا بىلەدى.
مەن و باستا ات قانشا جەردەن اساۋ بولعانمەن, جاتتىعۋعا تەز بەيىمدەلەدى, كەز كەلگەن تريۋكتى الىپ شىعادى دەپ ويلايتىنمىن. بىراق جىلقى بالاسىنىڭ دا, تەاتر, كينو ارتىستەرى ءتارىزدى وبرازدان شىعا الماي قالاتىن ساتتەرى بولادى ەكەن. وسى ورايدا تيمۋر بەكمامبەتوۆپەن بىرگە «دنەۆنوي دوزوردىڭ» تۇسىرىلىمىنە قاتىسقان كەزدەگى وقيعا ەسكە ءتۇسىپ وتىر. تيمۋر حات جازىپ, اتتار قانداي جاعدايدا قابىرعانى جارىپ جىبەرەردەي تەپكىلەيتىنىن سۇرادى. كينوعا سونداي كورىنىس قاجەت بولىپ تۇر ەكەن, تۇسىرىلگەن سيۋجەتتەردىڭ بىردە-بىرەۋى ءساتتى شىقپاعان. ال تيمۋر, ءبىرىنشى كەزەكتە شىنايىلىققا باسىمدىق بەرەتىن رەجيسسەر. مەن اتتى قابىرعانى تەپكىلەۋگە دايىنداۋ ءۇشىن ءبىر اپتا سۇرادىم. سول كەزدە ماعان «مىنەزدى» دەپ كاسكادەرلەردىڭ ءبارى سىرت اينالىپ كەتكەن, 300 رەت ساتىلىمعا قويىلعان ات بەرىلگەن بولاتىن. العاشىندا سىرتتاي زەرتتەدىم, كەيىن ءبىر-بىرىمىزگە ۇيرەنە باستادىق. قانت بەردىك, ءسابىز بەردىك. سونىمەن قويشى, ءتىلىن تاۋىپ جاتتىعۋعا كىرىستىك. ءبىر اپتادان سوڭ ول قابىرعانى تەسىپ جىبەرەتىندەي تەپسىنىپ, كۇشىن بويىنا جينادى. بىراق ءتۇسىرىلىمى بىتكەن سوڭ, «وبرازدان» شىعا الماي, كينودا قولدانعان تاسىلدەردى قايتالايمىن دەپ قالىپقا سىيماي, ەسىكتى سىندىرىپ, سىرتقا شىعۋعا جانتالاسقان ساتتەرى بولدى. ونى بەينەتاسپاعا ءتۇسىرىپ الدىم. اتتىڭ قۇلاعىندا ويناساق تا, ولاردى ساقتاۋعا, جاراقاتتاپ الماۋعا تىرىسامىز. سەبەبى ءبىر اتتى دايىنداۋعا كەمى 5-6 جىل كەتەدى. ەگەر ونداي جاعداي بولسا, پروبلەمانىڭ استىندا قالاسىڭ.
قازاقتار, تابيعاتىنان جىلقىعا جاقىن عوي. مىنەزىن بىلەمىز, ايتەۋىر تەز ءتىل تابىسىپ الامىز. كينولارداعى اتپەن جاسالاتىن تريۋكتەردىڭ ءساتتى شىعاتىنى سودان شىعار. اتتىڭ بابىن بىلەتىن ماماندار الەمدە انگليادا, يسپانيادا بار. ال قازاقستاندا – ءبىزبىز, بۇل ماقتانعانىم ەمەس, شىن ءسوزىم.
– ءسىزدى ەڭ العاش رەت 2003 جىلى ەگيپەتتىكتەردىڭ قاتىسۋىمەن تۇسىرىلگەن «بەيبارىس» فيلمىندە كوردىك. بۇل ءسىز ءۇشىن دەبيۋتتىك جۇمىس بولدى ما؟ سىزدەردى كىم دايىندادى؟
– بۇل فيلمگە قازاق كاسكادەرلەرىنىڭ قاتىسۋىنا سول كەزدە مىسىردا ەلشى بولىپ جۇرگەن باعدات امىرەەۆ باۋىرىمىز ىقپال ەتتى. «بەيبارىستىڭ دۋبلەرىن ويناۋعا قازاق كاسكادەردەرى قاتىسسىن» دەگەن ۇسىنىستى سول كىسى ايتتى دەپ ەستىدىك.
ول كەزدە, جاسپىز, تاجىريبە از. كسرو كەزىندە «قازاقفيلمنىڭ» كينولارىنا قىرعىز كاساكادەرلەرى شاقىرىلىپ, ءۇش-ءتورت قازاق سول توپقا كىرەتىن. اتقا قونعاندا ارۋاعى اسىپ, جان-جاعىنداعىلاردىڭ مىسىن باسىپ كەتەتىن قازاقپىز عوي. بەيبارىس سۇلتان جايلى بالا كەزدەن ەسىتتىك. مەنىڭ كاسكادەرلىك ماماندىقتى تاڭداپ الۋىما سول مىسىر ساپارى اسەر ەتتى, ءوزىمىزدىڭ «كوشپەندىلەر», رەجيسسەر سەرگەي بودروۆ رەجيسسەرلىك ەتكەن, قازاقستان, رەسەي, گەرمانيا بىرىگىپ تۇسىرگەن «موڭعولعا» جول اشتى.
– ءاسانالى ءاشىموۆ ءبىر سۇحباتىندا بەكەجان بەينەسىن سومداعاندا كەيبىر ميميكالىق دەتالداردى قۇرمانبەك جانداربەكوۆتەن الدىم دەگەن ەدى. «Nomad Stunts» توبىنىڭ كاسكادەرلىك تاسىلدەرىنە رەسەيلىك پروديۋسەرلەر «ەكسكليۋزيۆ» دەپ باعا بەرىپتى. كينو الاڭدارىندا سىزدەردىڭ قوسىمشا تريۋكتەردى قولدانعان ساتتەگى قىم-قۋىت قيمىلداردى گولليۆۋدتتىڭ وزدەرىڭىز قاتىسپاعان كينوونىمدەرىنەن بايقايسىز با؟
– استىڭداعى حاس تۇلپاردى اۋىزدىعىمەن الىستىرىپ, كينو الاڭىنا اتويلاپ شىققان ساتتەگى سەزىمدى ءدال بەينەلەۋگە ءسىرا, ءسوزدىڭ قۇدىرەتى جەتپەيتىن شىعار. ال مەنىڭ سانام ونى نايزاعايدى اۋىزدىقتاپ مىنگەنمەن بىردەي دەيدى. ول ساتتەردە... قۇلاعىڭا تەك قۇداي عانا سىبىرلاپ تۇرعانداي اسەردە بولاسىڭ. سەن قۇدايدىڭ ەركىنە عانا باعىناسىن. كينودا قوسىمشا كورىنىستەردە وينايتىن كاسكادەردىڭ ونەرى تۋرالى كينوساراپشىلار توقتامدى پىكىرگە كەلگەن جوق. ءبىرى ات سپورتى دەيدى. ەكىنشىسى ونەر دەيدى. سوندىقتان مىناۋ ماعان تيەسىلى دەپ ەشبىر كورىنىستى پاتەنتتەي المايمىز. بىراق ارىپەستەر اراسىنداعى اڭگىمەدە «Nomad Stunts» توبى شەتەلدىك كاسكادەرلەردىڭ قويعان تريۋكتەرىن قايتالادى» دەگەن ءسوز بولعان ەمەس. كەرىسىنشە, كەيبىر شەتەلدىڭ كينوونىمدەرىندەگى قوسىمشا كورىنىستەردە ءبىز تاپقان تاسىلدەردىڭ قولدانىلعانىن بايقاپ قالامىز.
2016 جىلى رەجيسسەر اندرەي كراۆچۋكتىڭ «ۆيكينگىندە», رەجيسسەر ماركۋس نيسپەلدىڭ (اقش) «كونان-ۆارۆارىندا» ەكى اتتىڭ قاتار قۇلاعانداعى تيۋركتەردى ءبىز كينوتاريحىندا العاش ورىنداعانىمىزدى ءبارى بىلەدى. قۇداي قالاسا, اقان ساتاەۆتىڭ «توميريسىندە» دە الەمدىك كينوتاريحىندا بولماعان تريۋكتەردى جاساۋعا دايىندالىپ جاتىرمىز. وزىمىزدەن كەيىن ءبىزدى كىمنىڭ قايتالاعانى ماڭىزدى ەمەس.
مەن ءۇشىن, مەنىن كوماندام ءۇشىن ءبىرىنشى بولۋ ماڭىزدى.
– «Nomad Stunts» توبىنىڭ كاسكادەرلەرى سيلۆەستر ستاللونەنىڭ كومانداسىندا ونەر كورسەتتى. ارنولد شۆارتسەنەگگەر, بريۋس ۋيلليس, دجەت لي, كيانۋ ريۆز, ناتالي پورتمانمەن گولليۆۋدتىق جانە رەسەيلىك كينو الاڭدارىندا كەزدەستىڭىزدەر. شەتەلدىك جوبالار سىزدەر ءۇشىن تەك ماتەريالدىق جاعىنان عانا كەرەك پە؟
– شەتەلدىك جوبالار بىزگە ماتەريالدىق جاعىنان دا, تاجىريبە جيناۋ ءۇشىن دە كەرەك. بىزدە كينو ءىسىن ۇيىمداستىرۋ جاعىنان كوپ ماسەلە اقساپ جاتىر. بىرىنشىدەن, ولاردان مەن ءبىر جۇيەگە باعىنعان ءتارىپتى ۇيرەندىم. كاسكادەرلەرىمىز سول ۇدەرىستى كوزىمەن كوردى. بوس ۋاقىتتارىندا تريۋك جاساۋمەن جۇيەلى تۇردە اينالىسادى. مەن كينو ءتۇسىرۋ پروتسەسى كەزىندە كاسكادەرلىك كوماندانىڭ ءاربىر مۇشەسىن يۋنيتقا, جيىنتىعى رەجيسسەرعا باعىناتىن ءتارتىپ ەنگىزگەنىن قالار ەدىم. مىسالى, «نەۋدەرجيمىە» كينوسىندا بارلىق اتىس-شابىس, وزەن بويىنداعى بارلاۋدى تەك كاسكادەرلىك يۋنيتتەر ورىندادى. بۇل ۋاقىتتى ۇنەمدەدى.
– ءسىز ءۇشىن, ات ۇستىندەگى نەمەسە اسكەري-سوعىس تاقىرىبىنداعى تريۋكتەردى جاساۋدىڭ ەتالونى كىم؟ كىمدى ۇلگى تۇتاسىز؟
– مەن ءۇشىن بە؟ مۇمكىن, دجەكي چان شىعار. ونىڭ سوققىسى قاتتى. سونىمەن ءبىر مەزگىلدە ادەمى كومپوزيتسيا سياقتى. وسىدان بىرەر جىل بۇرىن ءبىز دجەكي چاننىڭ كومانداسىمەن ءبىر كينو ءتۇسىرۋ الاڭىندا جۇمىس ىستەدىك. قالاي جۇمىس ىستەيتىنىن سۇرادىق. جىگىتتەرىنىڭ ايتۋى بويىنشا, دجەكي چاننىڭ تريۋكتەرىنىڭ 90 پايىزى – يمپروۆيزاتسيا. الدىن الا جاتتىقپايدى. تەك كينوعا تۇسكەن كەزدە, ءتۇسىرىلىم بارىسىندا ويلاپ تابادى. بۇل ۇلكەن تالانت قوي. تابيعي تالانت...
– دجەكي چاننىڭ ءومىرىن گولليۆۋدىڭ ميللياردتاعان قارجىلىق كاپيتالى بار ساقتاندىرۋ كومپانيالارى ساقتاندىرۋعا قورقادى ەكەن. سىزدەردى كىم ساقتاندىرادى؟
– ەندى جانىمىزدى قۇدايدىڭ اماناتىنا بەرىپ قويعان قازاقپىز عوي. قازاقستاندىق كومپانيالار ءبىزدى ساقتاندىرۋعا سونشالىقتى ىقىلاستى ەمەس. قورقاتىن شىعار. ال رەسەيدە كينو زاڭى بار. ساقتاندىرۋ كومپانيالارى سول زاڭ مىنددەتتەگەن شارتتار بويىنشا كاسكادەرلەردى ساقتاندىرۋدى باستادى. ال شەتەلدىك جوبالاردا ساقتاندىرۋ مىندەتىن سول ەلدىڭ كومپانيالارى الادى. اقش-قا تابانىمىز تيە سالىسىمەن كەلىسىمشارتتىڭ ءبىر بۋما قاعازىن الدىمىزعا توسادى. وندا دەنە قىزۋىڭ قانشا گرادۋستا تۇرعاندا جۇمىس ىستەۋگە بولاتىنى, ءتىپتى سۋىقتا قانشا ۋاقىت جۇرۋگە رۇحسات ەتىلەتىنى – ءبارى-ءبارى جازىلعان. مالايزياعا «ماركو پولوعا» قاتىسۋعا بارعاندا, سۋمەن بىرگە ءتۇرلى دارۋمەندەردى ءىشۋدى مىندەتتەدى. جاراقات الىپ قالعان كاسكادەردىڭ جازىلىپ, قاتارعا قوسىلۋىنا كينو كومپانيالارى مۇددەلى. بىزدە, كينو يندۋسترياسىندا ساقتاندىرۋ ماسەلەسىنىڭ بولماۋى كوپتەگەن جايتتاردىڭ دامۋىنا كەدەرگى.
مۇنى ءتيىستى ورىندار قولعا الاتىن شىعار دەپ ۇمىتتەنەمىن.
– «Nomad Stunts» كاسكادەرلەر توبى حالىقارالىق, مەملەكەتارالىق توپ ەكەنىن بىلەمىز.
– ءبىزدىڭ توپتا 74 كاسكادەر بار. ورىس, قىرعىز, بولگار, ازەربايجان, ۋكرايندار... ءسىز ايتپاقشى, مەملەكەتارالىق توپقا اينالىپ كەتىپپىز. تۇركيادان كەلىپ جاتىر. ونىڭ 12-ءسى قىز بالا. مەنىڭ ايەلىم دە سول توپتا.
قۇداي قالاسا, كۇز ايىنان باستاپ «Nomad Stuntsتىڭ» ازەربايجانداعى فيليالىن اشقالى جاتىرمىز. تۇركيادان دا اشۋ ويدا بار. وندا 20 جىگىت كومانداعا كىرۋگە دايىن وتىر. ءسويتىپ كەرەگەمىزدى جايىپ جاتىرمىز.
– قازاقستاندا ەكشن-كورىنىستەردى تۇسىرۋگە ماماندانعان وپەراتورلار بار ما؟
– ءبىزدىڭ توبىمىزدا ەكشن تۇسىرەتىن ەكى جىگىتىمىز بار. ولار ءوزى از, كوپ ەمەس. رەجيسسەر اقان ساتاەۆتىڭ كومانداسىندا وسى سالاعا ابدەن بەيىمدەلگەن حاسان قىدىراليەۆ دەگەن جاقسى مامان بار. بىراق ءوزىمىز تۇسكەن كينولاردا كامەرانى قاي جەردەن قويۋ كەرەكتىگى جونىندە وپەراتورلارعا اقىل-كەڭەس بەرىپ وتىرامىز. «توميريسكە» اتىسۋ ءۇشىن كاسكادەر قىزدار كوپ كەرەك. 15 قىزدى قوسىمشا توميريس ءۇشىن دايىنداپ جاتىرمىز. ءاليا ىسقاقوۆامىز كانادادا ءجۇر. جىبەك جاپپاسباەۆا بىزبەن بىرگە بولليۆۋدتىڭ كينوسىنا قاتىسىپ جاتىر. جولداسىم الفيا «كوشپەندىلەردە» دۋبلەر بولدى. اقش-تىڭ «كونان-ۆارۆارىندا» باس كەيىپكەردىڭ دۋبلەرى بولدى. اقان ساتاەۆتىڭ «توميريسىنە» قاتىسۋعا دايىندالىپ ءجۇر.
– تەحنولوگيا دامىعان سايىن الەمدە كاسكادەرلەرگە دەگەن سۇرانىس ارتىپ كەلەدى. ءسىز مۇنىڭ سەبەبى نەدە دەپ ويلايسىز...
– تەحنولوگيا دامىعان سايىن كينو جاساندىلىقتان باس تارتىپ جاتىر. مىسالى, كەز كەلگەن سيۋجەتتى ەكرانداۋ ءۇشىن ءتىرى ادام كەرەك. سۋرەت, كارتينا, ءتىپتى روبوت تا ادامدى الماستىرا المايدى. ويتكەنى پلاستيكاسى باسقا, جاقىننان كورسەتە المايدى. ايتەۋىر مىڭ ءتۇرلى كىلتيپانى شىعىپ تۇرادى. اتتىڭ ۇستىندەگى قيمىلداردى كارتينامەن بەرۋ مۇمكىن ەمەس. قازىر كورەرمەندى الداي المايسىڭ. كينو تەحنولوگيانى مولىنان ەنگىزىپ جاتىر, ايتسەدە كينوستۋديالاردىڭ كاسكادەرلەرگە دەگەن سۇرانىسى ازايماي وتىر. مىسالى, بۇگىندە ءبىز قاتىسىپ جاتقان بولليۆۋدتىڭ «Princess» كينوسىنا 111 كاسكادەر قاتىسىپ جاتىر.
– ءسىز ءۇشىن كاسكادەر بولۋ بيزنەس پە, الدە ءوزىڭىز جاقسى مەڭگەرگەن سپورت ءتۇرى مە؟
– قازىر الەمدەگى ماماندىقتىڭ كەز كەلگەن ءتۇرى بيزنەسپەن قابىسىپ كەتتى. ءسىز دە وسى سۇحباتتى جاقسى دايىنداپ, ونىڭ باسشىلارىڭىز تاراپىنان جاقسى باعالانعانىن قالايسىز. قازىر الەم جاقسى مامانداردى ءبىر-بىرىنەن قىزعانىپ, وزىنە تارتىپ جاتىر. بۇل بيزنەستىڭ ۇستەمدىگىن ارتتىرا تۇسۋدە.
بيزنەستىك سيپاتى تارتىمسىز ونەر وسپەيدى. ول بىرەۋدىڭ اسىراندى كۇشىگى ءتارىزدى بولىپ قالادى. شەتەلدە كينو – بيزنەس, سپورت – بيزنەس, ءتىپتى جۋرناليستيكا دا – بيزنەس. شەتەلدىك باق-تىڭ نەمەسە شەتەلدىك كينوتۋىندىلاردىڭ بىرنەشە ميلليوندىق اۋديتوريانى جاۋلاپ الۋىنىڭ سەبەبى سول. مەن ءۇشىن دە ونەر ءارى بيزنەس, ءارى كاسىبىم. مىسالى, گولليۆۋد پەن بولليۆۋدقا تەك اتتىڭ ۇستىندە وتىرا الاتىندار كەرەك بولسا, يسپانداردى الا سالاتىن ەدى. يسپاندار اتتىڭ ۇستىندە جاقسى وتىرادى, جاقسى شابادى. بىراق ات ۇستىندە قىلىشتاسا المايدى.
تاڭداۋ – قازاقتارعا ءتۇستى. سەبەبى الەمدە اتتىڭ ۇستىندە ارقالانىپ كەتەتىن قازاقتار عانا ەكەنىن جۇرتتىڭ ءبارى ءبىلىپ بولدى.
– سىزدەر مۇنداي دەڭگەيگە قالاي جەتتىڭىزدەر. جاتتىقتىرۋشىلارىڭىز مىقتى بولدى ما؟
– ءبىزدىڭ جاتتىقتىرۋشىلارىمىز جوقشىلىق بولدى دەسەم سەنبەيسىز. 1990 جىلداردىڭ باسىندا بولماشى تيىن-تەبەندەرگە بولا كينوعا تۇستىك. شىنىقتىق. قالاماقىمىز دامحاناعا بارۋعا زورعا جەتەتىن. سول جانكەشتىلىك قانىمىزدا قالىپ قويعان شىعار. قازىر دە ەلدە كەيبىر كينولارعا تەگىن تۇسۋگە دايىنبىز. بىزگە قانىمىزدى سۋىتىپ الۋعا بولمايدى...
– كاسكادەرلىك مەكتەپ اشۋ ويدا بار ما؟
– جوق. بۇل قاۋىپتى ماماندىق. سەبەبى ءوزىم ءتۇسىرىلىم بارىسىندا قابىرعامدى سىندىرىپ العانمىن. كاسكادەرلىك–ەشبىر ەرەجەگە باعىنبايتىن قاۋىپتى كاسىپ. مەكتەپ اشامىن دەپ نيەتتەنگەن ادام تەك كاسىپقوي عانا ەمەس, قالتالى دا ازامات بولۋى كەرەك. ساقتاندىرۋ كومپانيالارىنىڭ جۇمىسى ءالسىز. كينوعا ءتۇسۋ بارىسىندا شاكىرتتەرىڭنىڭ ءبىرى جاراقات الىپ قالسا, ونىڭ وبالى كىمگە؟ قازىر ءبىزدىڭ كوماندامىزدا ءارتۇرلى بەكگراۋندولار – بۇرىنعى چەمپيوندار, مەن سياقتى اۋىلدان شىققان ازاماتتار بار. ولاردىڭ ءبارى شىنىققان, كاسكادەرلىك شەبەرلىكتىڭ زاڭىمەن ءومىر سۇرەدى.
– سىزدەر «نەۋدەرجيمىە 2» كينوسىنان كەيىن اتلانتيك-ءسيتيدىڭ سپورتتىق «وسكار» سىيلىعىن الدىڭىزدار. الدىڭىزدان ۇلكەن مۇمكىندىكتەردىڭ ەسىگى اشىلدى. كوپ ادامدار سىزدەردى گولليۆۋدقا كەتىپ قالاتىن شىعار دەپ ساۋەگەيلىك ايتقان ەدى.
– ءيا, «وسكار» بىزگە گولليۆۋدتىڭ ەسىگىن اشتى. بۇل كاسكادەرلەرگە ارنالعان حالىقارالىق ماراپاتات. ول شۆارتسەنەگگەر, ستاللونە سياقتى ۇلكەن سپورتتان كەتكەن كاسكادەر-اكتەرلەردىڭ ۇسىنىسىمەن بەلگىلەنگەن. گولليۆۋدتىڭ كاسكادەرلەر قاۋىمداستىعىنا مۇشەلىككە قابىلدادى. قازىر بىزدە, شەتەلدىك قانا ەمەس, قازاقستاندىق جوبالار دا كوپ. مىسالى, قاڭتار ايىنىڭ باسىندا يتاليادان ۇسىنىس كەلىپ ءتۇستى. ونىڭ تۇسىرىلەتىن ۋاقىتى اقان ساتاەۆتىڭ «توميريسىمەن» قاتار باستالادى. مەن ء«توميريستى» تاستاپ قايدا كەتەمىن..
ۋاقىتىمنىڭ كوپشىلىگى ەلدە وتەدى. دۇنيەدە اقشامەن باعالانبايتىن قۇندىلىقتار بار.
اڭگىمەلەسكەن گۇلبارشىن ساباەۆا,
جۋرناليست
الماتى
