جۇلدىزدى جيىرما كۇن
ءبىرىنشى كۇن (26 قاراشا ):
مەنىڭ قازاقستانىم
ۇلاعاتقا باستار ۇلىق قۇندىلىقتار
ءومىر ءپالسافاسى ءاربىر ادامنىڭ قاستەرلەيتىن, قاسيەت تۇتاتىن نارسەسى بولۋى كەرەكتىگىن كورسەتەدى. سەكسەننىڭ سەڭگىرىنەن اسقان جاسىمىزدا, كولحوزدىڭ ەسەپشىلىگىنەن, باستاۋىش مەكتەپتىڭ مۇعالىمىنەن مينيستر, وبلاتكوم توراعاسى, وبلىستىق پارتيا كوميتەتىنىڭ ءبىرىنشى حاتشىسى, قازاق كسر جوعارعى كەڭەسى تورالقاسىنىڭ توراعاسىنا دەيىنگى باسپالداقتاپ ءجۇرىپ وتكەن جولىمىزدا ءبىز سياقتى اعا ۇرپاق ەل مەن جەردىڭ, حالىق پەن وتاننىڭ قادىرىنە جەتۋدى ءوزىمىزدىڭ پارىزىمىز دەپ بىلدىك. ءالى دە سولاي. ولاي بولسا, ەل قاسيەتى, ەلدىكتىڭ بەلگىسى قاشاندا سول ەلدىڭ رامىزدەرىنەن بايقالار بولار. وسى ورايدا ۆلاديمير ماياكوۆسكيدىڭ سوۆەتتىك پاسپورت تۋرالى اتاقتى ولەڭى ەسكە تۇسەدى. ايتالىق, پاسپورتتى جىرلاعان سول ولەڭ تالاي بۋىننىڭ بويىندا وتانشىلدىقتى تاربيەلەگەنى انىق. ەلدىڭ تۋى جەلبىرەگەندە, ەلدىڭ گيمنى شىرقالعاندا بويىمىزدى ارقاشان شىم-شىمداپ ءبىر ماقتانىش سەزىمى كەرنەيتىن. سونىمەن بىرگە سول كەڭەس ۋاقىتىندا ءبىزدىڭ بەيرەسمي رامىزدەرىمىزگە بالانعان ۇلتتىق قۇندىلىقتارىمىز بولمادى دەپ ايتا المايمىن. قازاقتىڭ باتىرلىق جىرلارى, حالىق اندەرى, اقىندار ايتىستارى, اباي ولەڭدەرى, مۇحتار اۋەزوۆتىڭ «اباي جولى» رومانى, تاعى باسقالار ۇلتتىق رۋحتى قالعىتپاعان قۇندىلىقتار قاتارىنا جاتادى. ال ەندى ەركىندىك پەن ەگەمەندىككە قولىمىز جەتىپ, كوكىرەگىمىز كەڭىپ, كەۋدەمىز بيىكتەگەن بۇگىنگى زاماندا تاۋەلسىز ەلىمىزدىڭ مەملەكەتتىك رامىزدەرى ءبىز ءۇشىن قانشالىقتى قۇندى؟ وسى ساۋالدى ءاربىر وتانشىل ازامات ءوز-وزىنە قويىپ وتىرۋى كەرەك. شىن ءمانىندە دە مەملەكەتتىك ءانۇرانىمىز شىرقالعاندا جۇرەگىمىز تولقىپ, اقوردانىڭ كۇمىس كۇمبەزدى توبەسىندە جەلبىرەگەن كوك تۋىمىزدى كورگەن سايىن كوڭىلىمىز شالقىپ, مەرەيىمىز اسپاي ما. وسى مەملەكەتتىك رامىزدەر – ءبىزدىڭ ماقتانىشىمىز. ولار ءبىزدىڭ ەلدىگىمىزدى, مەملەكەتتىگىمىزدى پاش ەتەدى. بۇل بەلگىلەردە ءبىزدىڭ اسقاق ءمۇددەلەرىمىز بەن بيىك ماقساتتارىمىز تۇر. سوندىقتان, قاي كەزدە دە ەلدىگىمىزدىڭ ارعىماعى اتويلاپ, ءاربىر اق تاڭى جارقىراپ اتىپ, شاڭىراعى شايقالماسا ەكەن دەپ تىلەيمىز. البەتتە, سوڭعى جيىرما جىلدا ەلىمىزدىڭ ارداگەرلەر ۇيىمىن باسقارعان مەن ءۇشىن قازىرگى قازاقستانىمنىڭ كوك بايراعى, ءانۇرانى جانە ەلتاڭباسى ەرەكشە قىمبات. بۇلاردا ەل مەن جەردىڭ تاريحى, ۇلتىمىزدىڭ جاقسى قاسيەتتەرى مەن داستۇرلەرى, ار-نامىسى مەن پاراسات-پايىمى, بەيبىتشىلدىگى مەن بىرلىكشىلدىگى, ىزگى ماقساتتارى مەن اق نيەتى, بۇگىنگى باقىتى مەن بولاشاقتاعى باعدارى تاماشا كورىنىس تاپقان دەپ ويلايمىن. وسى رامىزدەردى سونشالىقتى مازمۇندى دا ماعىنالى, ايبىندى دا ادەمى ەتىپ جاساي بىلگەن اۆتورلارىنا مىڭ العىس! ول رامىزدەردى جانىڭمەن ۇققان سايىن ەلىڭ ءۇشىن, وتانىڭ ءۇشىن, قازاق دەگەن حالقىڭ ءۇشىن شۋاقتى ماقتانىش سەزىمىنە بولەنەسىڭ. بىلە بىلگەنگە ءبىزدىڭ مەملەكەتتىك رامىزدەرىمىزدىڭ زامانداستارىمىز ءۇشىن دە, جاس ۇرپاق ءۇشىن دە تاعىلىمى زور. ولاردان ءبىز ۇلاعاتقا باستايتىن ۇلىق قۇندىلىقتاردى كورەمىز. ول رامىزدەردە وتانشىلدىق پەن پاتريوتتىق تاربيەنىڭ باستاۋ بۇلاعى جاتىر. كەيىنگى جاستار مەن ءبۇلدىرشىندەردى سول تازا بۇلاقتىڭ تۇنباسىنان مولىنان سۋسىنداتقانىمىز ابزال. ماقتاي ساعديەۆ, قازاقستاننىڭ قۇرمەتتى ارداگەرى. الماتى.
