مەملەكەتتىلىك مەرەكەسى بىزگە توي تويلاۋ ءۇشىن ەمەس, وي ويلاۋ ءۇشىن كەرەك.
ەلباسىمىز وسىلاي دەدى. تاۋەلسىزدىكتىڭ جيىرما جىلدىعىن زەردەگە سالۋ, ونىڭ تاريح ءۇشىن قىپ-قىسقا, بىراق ءبىزدىڭ ەلدىگىمىز ءۇشىن بايتاق شەجىرەسىنەن تاعىلىم الۋ بارىنەن دە ماڭىزدى ەكەنىن ايتتى.
بۇل كەزەڭدە قازاقستان عاسىرلارعا تەڭەسەتىن عاجايىپ جولدى ءجۇرىپ ءوتتى. بۇل جولدا ءبارى دە بولدى: بۇرىننان قالىپتاسقان شارۋاشىلىق بايلانىستارى ءۇزىلىپ, شىعارعان ءونىمدەرىن وتكىزە الماي داعدارعان كاسىپورىندار, التى ايلاپ ايلىق, جىلداپ زەينەتاقى الا الماي, ەگەمەندىكتىڭ ەلەڭ-الاڭىنداعى ەڭسەنى ەزەر قيىندىقتاردان قاجىعان جۇرت, كەڭبالاق كۇيدە ءجۇرگەن قازاقتىڭ بازار پسيحولوگياسىنا بوي ۇيرەتە الماي اسىپ-ساسۋى, الا قاپشىق ارقالاپ, وتباسىن اسىراعان ايەلدەر, جەكەشەلەندىرۋ جانتالاسى, نارىق جاعدايىندا ءومىر سۇرۋگە بەيىمدەلۋدىڭ باستاپقى قادامدارى, ەكونوميكالىق رەفورمالاردىڭ العاشقى ءناتيجەلەرىن بەرۋى, الەۋمەتتىك سالانىڭ ەڭسە تىكتەۋى, حالىقتىڭ كوڭىل-كۇيىنىڭ قالپىنا ءتۇسۋى, ەلدىڭ ەرتەڭىنە سەنىمنىڭ ورنىعۋى, ينۆەستيتسيالاردىڭ كەلە باستاۋى, جاسامپازدىق جۇمىستىڭ جولعا قويىلۋى, ەلدىڭ ءال-اۋقاتىنىڭ ارتۋى, استانانىڭ سالىنۋى, قالادا دا, دالادا دا قۇرىلىستىڭ قارقىن الۋى, ءوز ءوندىرىسىمىزدىڭ وركەندەۋى, مەملەكەتىمىزدىڭ باتىسقا دا, شىعىسقا دا بىردەي تانىلىپ, بىردەي قۇرمەتتەلۋى, ءبۇكىل تۇركى الەمىنەن, بۇكىل مۇسىلمان جۇرتىنان, بۇكىل تمد كەڭىستىگىنەن تۇڭعىش رەت ەۋروپا تورىنە كوتەرىلىپ, توبەبيلىك جاساۋ, استانا سامميتىن وتكىزۋ, يسلام ىنتىماقتاستىعى ۇيىمىنا ءتوراعالىق ەتۋ...
ءيا, تاريح ساعاتىنىڭ ءتىلى سىرت ەتە قالعانداي قىسقا كەزەڭدە قازاقستان وسىنداي جاسامپازدىق جولدان ءوتتى. ءبىزدىڭ بۇل ۇلى جولداعى كوشىمىزدى بۇگىندە ءدۇيىم دۇنيە تانيتىن, مويىندايتىن, قۇرمەتتەيتىن پرەزيدەنتىمىز نۇرسۇلتان نازارباەۆ بىلىكتىلىكپەن, بايىپتىلىقپەن باستاي ءبىلدى. ەلىم دەگەن ەرگە كامىل سەنگەن, كامىل سەنگەن سوڭ ەكى تىزگىن, ءبىر شىلبىردى قولىنا بەرىك بەرگەن ەل دە تاريح سىنىنا لايىقتى شىداپ شىقتى. ەلدىگىن, كەڭدىگىن, دالالىق دانالىعىن تانىتتى.
مىنە, توي تابالدىرىعىنا دا تاقاپ قالدىق. ەندى جيىرما كۇننەن كەيىن مەملەكەتىمىزدىڭ مەرەيلى مەرەكەسىن اتاپ وتەمىز. وسىعان وراي ەلدە جۇلدىزدى جيىرما كۇن جاريالانىپ وتىر.
ولارعا:
«مەنىڭ قازاقستانىم» (26 قاراشا),
«اتامەكەن» (27 قاراشا),
«اتا زاڭ» (28 قاراشا),
«بەيبىتشىلىك بەلدەۋى» (29 قاراشا),
«كەلىسىم» (30 قاراشا),
«ازاماتتىق قوعام» (1 جەلتوقسان),
«ءداستۇر» (2 جەلتوقسان),
«بولاشاق» (3 جەلتوقسان),
«سەرگەكتىك» (4 جەلتوقسان),
«عىلىم» (5 جەلتوقسان),
«مادەنيەت» (6 جەلتوقسان),
«التىن تەڭگە» (7 جەلتوقسان),
«شاڭىراق» (8 جەلتوقسان),
«اۋىل» (9 جەلتوقسان),
«استانا» (10 جەلتوقسان),
«ءبىلىم» (11 جەلتوقسان),
«دەنساۋلىق» (12 جەلتوقسان),
«سەرپىن» (13 جەلتوقسان),
«مەملەكەتتىك ءتىل» (14 جەلتوقسان),
«وتان» (15 جەلتوقسان)
دەگەن اتاۋلار بەرىلگەن. ەل گازەتى «ەگەمەن قازاقستان» وسى جۇلدىزدى جيىرما كۇننىڭ بارىنە دە ايقارما بەتتەر ارناپ, ولاردىڭ ءمان-ماڭىزىن اشىپ كورسەتەتىن بولادى.
