بارلىعىمىز بىلەتىندەي, جۋىردا يران يسلام رەسپۋبليكاسىنىڭ ۇلتتىق كىتاپحاناسىندا قازاقستان ادەبيەتى جانە مادەنيەتى ورتالىعى اشىلعان بولاتىن. ورتالىقتى اشۋ جۇمىستارىنا بەلسەنە قاتىسقان شەتەل ادەبيەتتەرى ورتالىعىنىڭ كىتاپحاناشىسى سايران راحىمجانوۆانىڭ ايتۋىنشا, جوعارىداعى ىنتىماقتاستىقتىڭ العاشقى جۇمىسى رەتىندە وسى «قۇران ءتاپسىر» بىرەگەي قولجازباسىن قالپىنا كەلتىرگەن. التى ايعا سوزىلعان رەستاۆراتسيا جۇمىسى جۋىردا اياقتالىپ, قۇندى قولجازبا كەشە عانا ۇلتتىق اكادەميالىق كىتاپحاناعا جەتكىزىلگەن. سيرەك قولجازبالار قاتارىنا جاتاتىن پارسى تىلىندەگى قۇراننىڭ قولجازباسى كىتاپحاناعا 2015 جىلى جەكە قوردان كەلىپ تۇسكەن. 800 بەتكە تاياۋ قاسيەتتى كىتاپتىڭ سالماعى 9 كەلى.
قۇندى جادىگەر الدىمەن اتاقتى كەمبريدج ۋنيۆەرسيتەتىنىڭ عالىمدارى, اتاپ ايتقاندا «شاحنامە» كەمبريدج ورتالىعىنىڭ پارسى زەرتتەۋلەرى بويىنشا جەتەكشىسى فيرۋزا مەلۆيلل مەن چارلز پەتردىڭ كوزىنە ءتۇسىپ, ولار «قۇران تاپسىرگە» «عىلىم الەمىندەگى ناعىز سەنساتسياعا اينالۋى مۇمكىن كىتاپ» دەگەن باعا بەرگەن. عالىمدار اتالمىش قۇندى قولجازبا گرافيكا-ورفوگرافيالىق, كوديكولوگيالىق ساراپتامانى جانە رەستاۆراتسيالىق جۇمىستاردى قاجەت ەتەتىنىن ايتقان. ناتيجەسىندە, يرانداعى قازاقستان ادەبيەتى جانە مادەنيەتى ورتالىعى تاعى ءبىر تاريحي جادىگەردى وقىرماندار ولجاسىنا قوسىپ وتىر. ال كەلەشەكتە ۇلتتىق اكادەميالىق كىتاپحاناسىنىڭ سيرەك كىتاپتار مەن قۇندى قولجازبالار كوللەكتسياسى كەمبريدج ۋنيۆەرسيتەتىنىڭ عالىمدارىمەن جانە قازاقستان عالىمدارى, سونداي-اق كىتاپحانا قىزمەتكەرلەرىمەن بىرلەسىپ, حالىقارالىق كوديكولوگيالىق ۇيىمدارىمەن ىنتىماقتاستىقتا جۇمىس جاساۋدى جوسپارلاپ وتىر. ايتا كەتەيىك, يران يسلام رەسپۋبليكاسى كىتاپ مادەنيەتى دامىعان ەل رەتىندە قولجازبانى قورعاپ قالۋدا ۇقىپتىلىقپەن تەر توككەن. كىتاپتى تەك قالپىنا كەلتىرىپ قانا قويماي, ونىڭ ەلەكتروندى نۇسقاسىن دا قاتتى ديسكىگە كوشىرىپ, ەلوردامىزدىڭ الدا كەلە جاتقان مەرەيتويىنا تارتۋ ەتكەن.
ميراس اسان,
«ەگەمەن قازاقستان»
