«جولاۋشىلار تاسىمالى» اق جىلجىمالى قۇرامدى جاڭارتۋ باعدارلاماسىن ىسكە اسىرۋدى جالعاستىرۋدا. جولاۋشىلار ۆاگون پاركى 12 كۋپەلىك ۆاگوندارمەن تولىقتىرىلدى, ونىڭ ىشىندە 2 ۆاگون شتابتىق – ولار مۇمكىنشىلىگى شەكتەۋلى جاندار مەن ولاردى الىپ جۇرۋشىلەرگە ارنالعان.
جاڭا ۆاگوندار ساپاردىڭ جايلىلىعىن قامتاماسىز ەتەدى. تەمىر جول كولىگى قاۋىپسىزدىك جانە ساپا جاعىنان بارلىق حالىقارالىق ستاندارتتارعا ساي. جىلجىمالى قۇرامدى ءوندىرۋ كەزىندە زاماناۋي, ەكولوگيالىق تازا جانە جانۋى قيىن ماتەريالدار پايدالانىلعان.
ۇلتتىق تاسىمالداۋشى ءمۇمكىندىگى شەكتەۋلى جاندارعا جايلى جاعداي جاساۋعا كوڭىل بولۋدە. وسىعان وراي, كومپانيا مۇگەدەكتەر مەن ولاردى الىپ جۇرۋشىلەرگە ارنالعان 2 شتابتىق كۋپە ۆاگوندارىنا تاپسىرىس بەردى. ولار اربادا وتىرعان مۇگەدەكتى پويىزعا وتىرعىزىپ, تۇسىرەتىن اۆتوماتتى كوتەرگىش قۇرالدارمەن قامتاماسىز ەتىلگەن. سونىمەن قاتار, ۆاگوننىڭ تامبۋرى, ءدالىزى, كۋپەسى جانە سانيتارلىق تورابى كەڭەيتىلىپ, مۇمكىندىگى شەكتەۋلى جاننىڭ وزدىگىمەن قوزعالۋىنا كەدەرگى جاسامايدى.
قۇرامدار ەكولوگيالىق تازا دارەتحانالارمەن, اۋديو جانە بەينەتاسىمالداۋ جۇيەلەرىمەن, جەلدەتكىشتەرمەن, جىلۋ جانە ءورت ءسوندىرۋ دابىلداتقىشتارىمەن قامتاماسىزداندىرىلعان. ۆاگونداردا قىسقاتولقىندى پەش, توڭازىتقىش, سونىمەن قاتار اقپاراتتىق تابلو, ءار كۋپەدە تەلەديدار ورناتىلعان. كۋپەلىك ۆاگون 40 ورىنعا, كۋپەلىك شتابتىق – 34 ورىنعا ەسەپتەلگەن.
«جولاۋشىلار تاسىمالى» اق 2012 جىلى 180 زاماناۋي ۆاگوندى ساتىپ الۋدى جوسپارلاپ وتىر, بۇل ءوز كەزەگىندە حالىقتىڭ تەمىر جول كولىگىمەن جولاۋشىلار تاسىمالىنا دەگەن سۇرانىسىن قاناعاتتاندىرادى.
«ەگەمەن-اقپارات».
