كەشە باس پروكۋروردىڭ توراعالىق ەتۋىمەن زاڭدىلىقتى, قۇقىقتىق ءتارتىپ پەن قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسى ءوتتى. وندا جەكە كاسىپكەرلىك سۋبەكتىلەرىنىڭ قۇقىقتارىن قورعاۋ سالاسىنداعى زاڭدىلىقتىڭ جاي-كۇيى جانە ولاردىڭ قىزمەتىنە زاڭسىز ارالاسۋ فاكتىلەرىنىڭ جولىن كەسۋ بويىنشا مەملەكەتتىك ورگاندار قابىلداعان شارالار تۋرالى ماسەلە قارالدى.
جەكە كاسىپكەرلىكتى قولداۋ جانە بيزنەستى دامىتۋعا قولايلى جاعداي جاساۋ – مەملەكەتتىك ساياساتتىڭ ستراتەگيالىق مىندەتتەرىنىڭ ءبىرى. الايدا, بيزنەسكە اكىمشىلىك قىسىم جاساۋ ءالى كۇنگە دەيىن ورىن الۋدا. پروكۋرورلىق تەكسەرۋلەردىڭ قورىتىندىلارى مەملەكەتتىك ورگانداردىڭ كاسىپكەرلەر قۇقىقتارىن بۇزىلۋىنىڭ كوپتەگەن فاكتىلەرىن انىقتادى. 2010 جىلدىڭ باسىنان 6 995 زاڭ بۇزۋشىلىق انىقتالىپ, 4 844 كاسىپكەردىڭ كونستيتۋتسيالىق قۇقىقتارى قورعالدى. 1 128 لاۋازىمدى تۇلعا ءتۇرلى جاۋاپكەرشىلىككە تارتىلدى.
ۇيلەستىرۋ كەڭەسى قالىپتاسقان جاعدايدى ەسكەرە وتىرىپ, بارلىق مەملەكەتتىك ورگاندارعا بيزنەس ىسىنە ارالاسۋ فاكتىلەرىن تۇبىرىمەن جويۋ ءۇشىن جان-جاقتى شارالار قابىلداۋ جانە تەكسەرۋلەرگە ۆەدومستۆولىق باقىلاۋدى كۇشەيتۋ تۋرالى ۇسىنىس جاسادى. وسى ماقساتتا تەكسەرۋلەردى جۇيەلەندىرۋگە جانە بيزنەس ءجۇرگىزۋدىڭ زاڭدى جولدارىن ىنتالاندىرۋعا باعىتتالعان تاۋەكەلدى باعالاۋ جۇيەسىنىڭ كريتەريلەرىنە سايكەس تەكسەرۋلەردى مىندەتتى تۇردە جوسپارلاۋ قاجەتتىگى اتاپ ءوتىلدى. سونداي-اق ۇيلەستىرۋ كەڭەسى كەلەشەكتە اكىمدەردىڭ رەيتينگ كورسەتكىشتەرىنە قوسا وتىرىپ, وڭىرلەر بولىگىندە بيزنەس ءجۇرگىزۋ شارتتارىن باعالاۋدىڭ بىرىڭعاي جۇيەسىن ازىرلەۋدى ۇسىندى. تەكسەرۋ جۇرگىزۋ ءتارتىبىن بۇزعانى ءۇشىن لاۋازىمدى تۇلعالاردىڭ جاۋاپكەرشىلىگىن ارتتىرۋدى كوزدەيتىن زاڭناماعا وزگەرىستەر مەن تولىقتىرۋلار ەنگىزۋگە باستاما جاساۋ ۇسىنىلدى, دەپ حابارلادى باس پروكۋراتۋرانىڭ ءباسپاسوز قىزمەتى.
