ءۇش وليمپيادادا جەلبىرەگەن

تۋ – قاشان دا قاسيەتتى, كيەلى, مەملەكەتتىك ءرامىز. سون­دىقتان جاقسىسى, جاما­نى بولمايدى. 2000 جىلى جاسىل قۇر­لىق اۆستراليانىڭ سيدنەي قالاسىندا وليمپيادا ويىن­دارىنىڭ الاۋى تۇتانعاندا رەداكتسيادان ءبىر كوك باي­راقتى “ەگەمەننىڭ” ءتورت سايىپقىرانى كوتەرىپ بار­عان. ولار: رىسبەك سارسەن­باي, ەركىن قىدىر, وڭداسىن ەلۋباي جانە عالىم ءسۇ­لەيمەن. وليمپيادانىڭ ورتاسىنا دەيىن كوڭىلدى كۇپتى قىلىپ, بەسىن اۋىپ نامازدىگەر بول­عاندا قازاقستان قورجىنىنا التىندار مەن كۇمىستەر جاۋدى. قازاقتىڭ بولات ءجۇمادىلوۆ, بەكزات ساتتارحانوۆ, ەرماحان ىبى­رايىموۆ جانە مۇقتارحان ءدىلدا­بەكوۆ سەكىلدى وعلاندارى قارسى­لاستارىنىڭ قابىرعالارىن سوگىپ, فينالدا ايقاس سالدى. بەكزات پەن ەرماحان وليمپيادا جەڭىمپازى اتاندى. جەلدەن جۇيرىك قىز ولگا شيشيگينا التىننان القا تاقتى. سوندا وسى بايراق ولاردىڭ يىعىنا جابىلىپ, جەڭىس تەرى سىڭگەن ەدى. 2003 جىلعى افينا وليمپيا­داسىندا ءباھادۇر باقتيار ارتاەۆ وسى بايراقپەن اتوي سالدى. ال 2007 جىلعى بەيجىڭ وليمپيا­داسىنا كوتەرىپ بارۋ ءبىزدىڭ ەنشىمىزگە تيگەن ەدى. دزيۋدوشى اسحات جيتكەەۆ موڭعول نايدانمەن ايقاس سالىپ, تۇعىرعا كوتەرىلەردە قازاق بايراعىن سۇرادى. لىپ ەتكىزىپ يىعىنا جاپتىم. كۇمىس بولسا دا قازاق دزيۋدو تاريحىنداعى ەڭ جوعارى مەدال ەدى بۇل. ءبۇ­گىندە الەم چەمپيوناتىن ءۇش مارتە باعىندىرعان يليا يلين جىگىتتىڭ جايساڭى. جۇلقا كوتە­رۋدە قورقىتىپ الادى دا, سەرپە كوتەرۋدە شەكسىز قۋانىشقا بولەي­دى. وڭ قولى شىنتاق تۇسىنان تامىرى تارتىلىپ قالسا دا تۇلا بويى نامىسقا سۋارىلعان جامپوز التىندى قارسىلاستارىنىڭ قو­لى­نان ج ۇلىپ الدى. كوزىمەن تۋ ىزدەگەندە جاتتىقتىرۋشىلاردىڭ اراسىنان جىقپىل تاۋىپ, جەلدەي ۇشىپ جەتكىزىپ بەردىك. جەرلەسىمىز وليمپيادانىڭ التىنىن الىپ, قازاقستاننىڭ داڭقىن الەمگە جايىپ جاتقاندا كىم ءبىزدىڭ جولى­مىزعا توسقاۋىل بولادى. يليا تەرشىگەن بەتىن بايراق شەتىمەن ءسۇرتتى. كۋبالىق قارا قابىلاندى وقساتىپ, بۇلا بويى بۋسانىپ كەلە جاتقان باقىت سارسەكباەۆ تا وسى بايراقتى جامىلىپ, سۋرەتكە ءتۇستى. جۇلدەگەرگە دە ىرىم ەتىپ جاپتىق. بۇل بايراق “ەگەمەننىڭ” اتى­نان دوحادا (كاتار) جانە گۋانچجوۋدا (قىتاي) وتكەن ازيا ويىن­دارىنا بارعان ءبىزدىڭ قولى­مىزبەن تالاي اسىلدارىمىزدىڭ يىعىنا جابىلدى. ازيا ويىن­دارى دەگەنىڭىزبەن ءتورت جىلدا ءبىر رەت وتەتىن بۇل سپورت جارىسى – ازيا حالىقتا­رىنىڭ وليمپياداسى. ازيا اتتى الىپ قۇرلىقتىڭ 45 مەملەكەتى باق, نامىس سىناي­تىن كەزەڭدە قازاقستان قىتاي, جاپون جانە وڭتۇستىك كورەيا سياقتى الەمگە ايگىلى مەملەكەتتەردى عانا الدىنا سالىپ, تورتتىكتى تۇيىندەپ كەلدى. 1,5 ميللياردقا جەتە­عابىل حالقى بار ءۇندىس­تاننىڭ ءوزى قازاقستان اسۋى­نان وتە الماي مىقشىڭداپ جۇرگەنىن كوز الدىڭىزعا ەلەس­تەتسەڭىز, وتانىڭىزعا دەگەن قۇرمەت ەسەلەنە تۇسەدى. باتىر, باعلاندارى­مىز­دىڭ وتان مەرەيىن اسقاق­تاتقان شاعىندا توبەسىندە تەڭىزدەي تولقىعان “ەگەمەن­نىڭ” بۇل بايراعىنىڭ ەندىگى كوتەرىلەر كەزى 2012 جىلى لوندون وليمپياداسى دەپ ويلايمىز. باقتيار تايجان. شىمكەنت. ___________________ ايقارما بەتتىڭ ماتەريالدارىن ۇيىمداستىرعان قورعانبەك امانجول,  «ەگەمەن قازاقستان».