1-تايم
ويىن باستالماي تۇرىپ نەگىزگى قۇرام ويىنشىلارىنا كوز جۇگىرتكەنىمىزدە شابۋىل وتىندە دجۋنيور كابانانگانىڭ جوقتىعى بىردەن بايقالدى. ونىڭ ورنىنا دجوردجە دەسپوتوۆيچ شىعىپتى. باس باپكەر ستانيمير ستويلوۆ بىردەن امالسىز سۇرمەرگەننىڭ ورنىنا قولدا بار شابۋىلشىنى قويىپتى. قالعانىنىڭ بارلىعى تەگىس بۇرىنعى وزدەرىنىڭ ورنىنا جايعاسىپتى. تەك جاراقاتىنان ايىعىپ كەلگەن لاسلو كلياينحايسلەر الاڭعا قايتا ورالىپتى. «سپورتينگ» ساپىندا دا شابۋىلشىمەن ازدى-كەم ماسەلە ورناعان. وسىعان دەيىن جاراقات الىپ قالعان باست دوستتىڭ ورنىنان رەسەي چەمپيوناتىندا اتى شىققان سەيدۋ دۋمبيانى بايقادىق.
العاشقى مينۋتتاردا دوپ ۇستاۋدان قاتەلەسىپ, پاستارى ءدال جەتپەگەن «سپورتينگ» ويىنشىلارى ورتالىق الاڭدا بايقاۋسىزدا دوپتان ايىرىلىپ قالدى. وسى ساتتە شابۋىل وتىنە ويىسىپ كەتكەن مارين توماسوۆ ارىپتەستەن تاماشا پاس الىپ, جويقىن سوققىمەن ەسەپ اشتى. بىرىككەن اراب ايىرلىكتەرىندە وتكەن جولداستىق ماتچتاردا ەرەكشەلەنگەن مارين شىنىمەن دە ءدال قازىر ءوز بابىن تاپقانىن دالەلدەدى. «سپارتاك» پەن «كراسنودار» قاقپالارىنا گول سوققان حورۆاتيالىق جارتىلاي قورعاۋشى كومانداعا ەندى ۇيرەنىسكەن سەكىلدى.
پورتۋگاليالىق كوماندا بولسا جاساندى الاڭدا وزدەرىنىڭ ۇيرەنشىكتى ويىنىن كورسەتۋ قيىن ەكەنىن بايقاپ, اۋەلەگەن پاستارعا كوڭىل ءبولدى. ۇنەمى دوپتى توبەمەن اسىرىپ بەرىپ, بويشاڭ ويىنشىلارىنا سەنىم ارتتى. سونىڭ سالدارى بولسا كەرەك, قاقپامىزعا قاراي بۇرىشتاما دوپتارى قارشا بورادى. بىراق, ولاردىڭ ەشقايسىسى دا قاقپاعا داري قويمادى.
2-تايم
2-تايم باستالىسىمەن «سپورتينگ» شابۋىلعا لاپ قويدى. شاماسى باپكەر جورجە جەزۋش شاكىرتتەرىنە قاتتى-قاتتى سويلەسە كەرەك, قوناقتار بىردەن بەلسەندىلىك تانىتتى. اينالدىرعان ون مينۋتتىڭ ىشىندە پورتۋگاليالىقتار قاتارىنان 3 گول سوعىپ, ەلوردالىقتاردى ساباسىنا ءتۇسىردى. 48 بەن 55-مينۋتتار ارالىعىندا برۋنو فەرناندەس (پەنالتيدەن), جەلسون مارتينش, سەيدۋ دۋمبيا ۇشەۋى قازاقستاندىق ۇجىمعا وتە اۋىر ءۇش سوققى بەردى. 7-مينۋتتىڭ ىشىندە جەرلەستەرىمىز جەر سيپاپ قالدى. 1:0 ەسەبىمەن ۇتىپ تۇرىپ, اياق استى كەلگەن گولداردان ەسەڭگىرەپ قالدى. فۋتبولشىلار تۇگىل تربۋناداعى جانكۇيەردىڭ سالىسى سۋعا كەتتى. باسى ءتاتتى بولعانىمەن, اياعى وسىلايشا قاتتى بولادى دەپ كىم ويلاعان. ءتىپتى, فاناتتار سەكتورىنان ەكىنشى گولدى تالاپ ەتىپ, «سپورتينگتىڭ» سىلەكپەسىن شىعارۋدى تىلەگەندەر دە از ەمەس ەدى. ءوز الاڭىندا كوپ جەڭىلە بەرمەيتىن كلۋبىمىز مۇنداي اۋىر حالگە تۇسەدى دەپ ارينە كوبىسى ويلاي قويعان جوق. دەگەنمەن, دەڭگەيدىڭ اتى دەڭگەي. «يۋۆەنتۋسپەن» تەڭ ءتۇسىپ جۇرگەن چەمپيوندار ليگاسىنىڭ كومانداسى ەۋرپا ليگاسىنا كەلگەندە اۆتوماتتى تۇردە ءتۋرنيردىڭ فاۆوريتىنە اينالماي ما؟ قۇرامىندا وسىدان ەكى جىل بۇرىن ەۋروپا چەمپيونى بولعان فۋتبولشىلار جۇرسە, قالعاندارى ءوز مەملەكەتتەرىنىڭ ۇلتتىق قۇرامالارىندا وينايتىن سەن تۇر مەن اتايىندار بولسا, نە شارا, نە داۋا. ونىڭ ۇستىنە «استانا» قورعاۋشىسى يۋري لوگۆينەنكو ەكى سارى قاعاز الىپ, الاڭنان قۋىلدى. 10 اداممەن پورتۋگاليانىڭ اتاقتى كومانداسىنا قايبىر سەس كورسەتەسىز.
تىنعان ويىن تىندى. سىرت الاڭداعى ماتچتان دا ءۇمىت از. بىراق, بۇل تەك «استاناعا» عانا ەمەس, بارشا قازاقستاندىق كلۋبتارعا ساباق بولۋى كەرەك. «سپورتينگ» سەكىلدى باي تاريحىڭ بولماسا دا, ءوز اكادەمياڭدى قۇرىپ, جاستارىڭدى تاربيەلەپ سودان ءنار الاتىن دەڭگەيگە جەتۋ. ۇنەمى, سىرتتان كەلگەن لەگيونەردىڭ اياعىنا قاراپ وتىرا بەرۋ ءوزىڭ وتىرعان اعاشتىڭ بۇتاعىن كەسكەنىمەن تەڭ. كريستيانۋ رونالدۋ, ناني سەكىلدى فۋتبولشىلاردى سىيلاعان «سپورتينگ» اكادەمياسى بۇكىل كلۋبقا تابىس ءتۇسىرىپ, قانشاما پورتۋگال بالالارىنا ۇلكەن سپورتقا ەسىگ اشىپ وتىر. دىڭگەگى مىقتى كوماندانىڭ دەڭگەيى دە بىزدەن جوعارى بولاتىن سودان دا شىعار.
ەرمۇحامەد ماۋلەن
