استانا - سپورتينگ: قايسىسىنىڭ مۇمكىندىگى كۇشتى؟

«استاناعا» باسىمدىق بەرەتىن فاكتورلار

اڭگىمەمىزدىڭ القيسساسىن  ەلوردالىقتاردان باستاساق. اتاعىنان ات ۇركەتىن قارسىلاس  بولسا دا كوماندامىز قايمىعاتىن كەيىپ تانىتپايدى. ول دۇرىس. شىنتاۋايتىنا كەلگەندە, ءبىزدىڭ جىگىتتەرگە جوعالتاتىن ەشنارسە جوق. ونسىز دا تاريحي جەتىستىككە جەتتى. قارسىلاستىڭ قاي جاعىن الساڭىز دا ءبىزدىڭ كوماندادان مىقتى ەكەنىن بولگار مامانى مويىنداپ وتىر. «كەزدەسۋدىڭ ءفاۆوريتى «سپورتينگ» ەكەنى بەلگىلى. بىراق, مەنىڭ شاكىرتتەرىم شايقاسقا دايىن», دەدى كەشەگى ءباسپاسوز ماسليحاتىندا. ستويلوۆتىڭ ساسپاي ءجۇرۋىنىڭ سىرى نەدە؟ «استانانىڭ» جەڭىسكە جەتۋ مۇمكىندىگى قانداي؟

بىرىنشىدەن. سينتەتيكالىق الاڭ. «سپورتينگ» سينتەتيكالىق الاڭنىڭ نە ەكەنىن دە بىلمەيدى. «ماعان سالسا, مۇنداي الاڭدا ويناۋعا مۇلدە قارسىمىن», دەپ نارازىلىعىن ءبىلدىردى جورجي جەزۋش. ء«بىزدىڭ ماماندار 10 كۇن الدىن كەلىپ, بارلىعىن زەرتتەدى. بىزدە تولىق اقپارات بار», دەپ قالدى ليسسابوندىقتاردىڭ باپكەرى. بۇل نەنى بىلدىرەدى؟ ءبىر جاعىنان قارسىلاسقا دەگەن قۇرمەت, ياعني قالپاقپەن قاعىپ الامىز دەگەن ويدان ادا ەكەندىكتەرىن, ەكىنشى جاعىنان فۋتبولدا ۇساق-تۇيەكتىڭ بولمايتىندىعىن كورسەتەدى. الاڭنىڭ ساپاسىن, ءار بۇرىشىن, ءۇتىر, نۇكتەسىنە دەيىن زەرتتەپ بارلىق اقپاراتتى الدىن الا ءبىلىپ وتىر. دەمەك, سينتەتيكالىق الاڭدا ويناۋعا دەگەن الاڭداۋشىلىق بار. ەگەر, «استانا» فۋتبولشىلارى بۇل فاكتوردى ءتيىمدى پايدالانسا جاقسى ناتيجەگە قول جەتكىزۋگە بولادى.

ەكىنشىدەن. جانكۇيەرلەر. انشلاگ بولاتىنى انىق. وسىندايدا «ابىلايدىڭ اسىندا شاپپاعاندا, اتاڭنىڭ باسىندا شاباسىڭ با» دەگەن قازەكەمىنىڭ ءسوزى ەسكە تۇسەدى. «استانانىڭ» ءوز الاڭىندا جەڭىلىسسىز سەرياسىن 17 ويىنعا جەتكىزۋى جانكۇيەرلەردىڭ ارقاسى دەپ بىلەمىز. «استانا-ارەناعا» ءار ويىن سايىن وتىز مىڭعا جۋىق جانكەشتى جانكۇيەر جينالا بەرمەيدى. بۇگىنگى كەزدەسۋدىڭ ماڭىزدىلىعى ەرەكشە.

ۇشىنشىدەن. ستانيمير ستويلوۆ. سيقىرشى ستويلوۆتىڭ ءبىر ويلاعانى بولۋ كەرەك. بولگار باپكەرىنىڭ بىلىكتىلىگىنە ەشكىم سىن ايتا المايدى. «وقۋ-جاتتىعۋدا تىڭعىلىقتى دايىندالدىق. ويىنشىلارىم سىزدەردى جەرگە قاراتپاۋعا تىرىسادى», دەدى سەنىممەن كەشە ستانيمير. بولگار باپكەرىنىڭ وسى بايسالدىلىعى كوپشىلىككە ۇنايدى. كوپ سوزگە جوق. قىرسىقتاۋ مىنەزىنىڭ بارى راس. دەگەنمەن, سول مىنەزدىڭ, سالماقتىلىقتىڭ ارقاسىندا تالاي مىقتىلاردى سان سوقتىردى. بۇل جولعى كونفەرەنتسيادا دا تىڭ يدەيانىڭ, وزىندىك وزگەرىستەردىڭ لەبى بولاتىنىن بىلدىرگەندەي بولدى.

«سپورتينگ» بۇگىن جەڭىسكە جەتۋى مۇمكىن بە؟

بىرىنشىدەن. «سپورتينگتىڭ» بالالار اكادەمياسى əلەمدەگى ەڭ مىقتى مەكتەپتەردىڭ ءبىرى سانالادى. بۇل كورسەتكىش بويىنشا ليسسابوندىقتارمەن ايگىلى «اياكس» عانا ساناسا السا كەرەك. بۇگىنگى تاڭداعى əلەمنىڭ ەڭ ۇزدىك ويىنشىلاردىڭ ءبىرى كريشتيانۋ رونالدۋ ءدال وسى پورتۋگاليالىق كلۋبتىڭ تۇلەگى. از دەسەڭىز, لۋيش فيگۋ, لۋيش ناني, ريكاردۋ كۋارەجما سەكىلدى مىقتىلار تۇلەپ ۇشقان اكادەميا. «سپورتينگتە» سپورتتىق مەنەدجمەنت, ينفراقۇرىلىم, جاسوسپىرىمدەرگە جاعداي جاساۋ جاعى وتە جوعارى دەڭگەيدە قاراستىرىلعان.

ەكىنشىدەن. «سپورتينگ» ەۋروپا ليگاسىنىڭ فينالىندا ەكى رەت ويناعان ۇجىم. ەكى رەت ۇتىلسا دا, اقتىق سىنعا دەيىن جەتۋدىڭ ءوزى ۇلكەن نəتيجە. تəجىريبە جەتەرلىك. «ليسسابوندىقتار نەگىزگى كۇشتى ىشكى بىرىنشىلىكتىڭ ويىندارىنا سالادى. ەۋروپا ليگاسى ولارعا ماڭىزدى ەمەس», دەپ كەيبىر فۋتبول ساراپشىلارى بەكەر ايتادى. جەزۋش كەشە جۋرناليستەرگە جەتكىلىكتى دەرەكتەرمەن جەتكىزدى. «پورتۋ», «بەنفيكا» سەكىلدى گراندتار بار. قاي جارىستا ويناساق تا بارىنشا جەڭىسكە جەتۋگە تىرىسامىز», دەدى پورتۋگاليالىقتاردىڭ باس باپكەرى. سوندىقتان «سپورتينگ» بۇل جولى دا بار كۇش-جىگەرىن سالارى انىق. «استانامەن» سالىستىرعاندا تاجىربيەسى مولداۋ. مىنە, ءدال وسى فاكتور بۇگىنگى كەزدەسۋدە شەشۋشى ءرول اتقارۋى مۇمكىن.

ۇشىنشىدەن. جەكەلەگەن فۋتبولشىلاردىڭ مىقتىلىعى. كارۆاليۋ, مارتينەس, كوەنتراۋ, دۋمبيا سەكىلدى مىقتى ويىنشىلارى بار. كەشەگى ءباسپاسوز ءماسليحاتىندا جورشي جەزۋشتىڭ كومانداسىنا سەنىمدى ەكەنى بايقالدى. «استاناعا»  دەگەن قۇرمەت ەرەكشە. الايدا, مويىنداۋ كەرەك, ولاردىڭ تاجىربيەسى, دەڭگەيى بۇگىنگى قارسىلاستارىنان ءبىر ساتى تومەن. ءبىزدىڭ تۇجىرىم وسى.

قورىتىندى. «سپورتينگ» مىقتى قارسىلاس. قارسىلاستارىمىز جەرەبەدە «استاناعا» تۇسكەندە اسا قۋانا قويمادى. جولدىڭ الىستىعى, اۋا-رايىنىڭ سۋىقتىعى ولارعا قول ەمەس. فۋتبولدا ۇساق-تۇيەك بولمايتىنىن جوعارىدا ايتتىق. ءبىزدىڭ كوماندا بارلىق جاعدايدى سارالاپ, دۇرىس قورىتىندى شىعارادى دەپ ۇمىتتەنەمىز. دايىندىققا دا ۋاقىت جەتكىلىكتى بولدى. ەندەشە, بۇگىن ءبىزدىڭ جىگىتتەر ايانىپ قالمايتىنى انىق. تاريحي جەتىستىك, جالعاسىن تاپسا دەپ تىلەيىك!

ەركەبۇلان جومارت,
«ەگەمەن قازاقستان»