دينارا – دارىندى بالالارعا ارنالعان مامانداندىرىلعان مۋزىكا مەكتەبىنىڭ تۇلەگى. مەكتەپتى پريما-قوبىز كلاسى بويىنشا تامامداعان بەتتە قاراعاندى فيلارمونياسىندا سول كەزدە جاڭادان قۇرىلعان «ارقا سازى» فولكلورلىق انسامبلىنە قابىلداندى. سونىمەن قاتار ت.جۇرگەنوۆ اتىنداعى الماتى ونەر اكادەمياسىنىڭ سىرتقى بولىمىندە وقىدى.
ءبىر جارىم جىلدان سوڭ انسامبلگە بالقاش مۋزىكا مەكتەبىنىڭ جانە تاتتىمبەت اتىنداعى قاراعاندى ونەر كوللەدجىنىڭ تۇلەگى ارمان ايناباەۆ كەلىپ قوسىلدى. كەيىن ارمان تاراز پەدينستيتۋتىندا ءبىلىمىن جەتىلدىرىپ, «انسامبل ءارتىسى جانە ديريجەر» ماماندىعىن الىپ شىقتى.
«ديار» – دومبىرا مەن پريما-قوبىزدى ۇيلەستىرگەن قاراعاندى وڭىرىندەگى العاشقى دۋەت. ونەرلى جۇپتىڭ رەپەرتۋارىنان ءۇندى مەن تۇرىك حالىقتارىنىڭ تانىمال اندەرى مەن مۋزىكالارى, 70-ءشى, 80-ءشى جىلداردىڭ حيت اندەرى ورىن العان. بۇل شىعارمالار قازاقتىڭ ۇلتتىق اسپاپتارىمەن ورىندالعاندا تىڭدارماندى ەرەكشە ءبىر اسەرگە بولەيدى.
دۋەت بۇگىندە وبلىس ورتالىعىنىڭ كوپتەگەن ساحنالارىندا, وقۋ ورىندارى مەن بالالار ۇيىندە ونەر كورسەتىپ ءجۇر. گاسترولدىك ساپارمەن قاراعاندى وبلىسىنىڭ بارلىق اۋدان-قالالارىندا, استانا, پاۆلودار, ەكىباستۇز, سەمەيدە بولعان.
بايقارا سادۋاقاسوۆ جەتەكشىلىك ەتەتىن «ارقا سازى» انسامبلىندە 2004 جىلدان بەرى جۇمىس ىستەپ كەلە جاتقان دينارا مەن ارمان ۇجىممەن بىرگە فرانتسيا, گەرمانيا, تۇركيا, مالايزيا, كۋۆەيت, ومان ەلدەرىنە بارىپ ونەر كورسەتتى.
دۋەت قازىرگى ۋاقىتتا كاۆكاز اۋەندەرىمەن جۇمىس ىستەۋدە. تىڭدارماندار مەن كورەرمەندەردى جالىقتىرىپ الماۋ ءۇشىن رەپەرتۋاردى جاڭارتىپ وتىرۋ – نەگىزگى مىندەت.
دينارا حاسانوۆا قاراعاندىداعى «شالقىما» كونتسەرت زالىندا جەكە كونتسەرت بەردى. ارمان ايناباەۆ تا شىعارماشىلىق ەسەپ بەرۋ كەشىنە دايارلىق ۇستىندە. دارىندى جاستار ونەرسۇيەر قاۋىمنىڭ كوڭىلىنەن شىعۋعا ءاردايىم ءازىر.
قايرات ءابىلدا,
«ەگەمەن قازاقستان»
قاراعاندى
