كىتاپپەن تانىسۋ بارىسىندا ونىڭ قالىڭ كوپشىلىككە ارنالعانىن بىردەن تۇسىنەسىز. اۆتوردىڭ ءوز تاجىريبەسىنەن كەلتىرىپ وتىرعان وي-تولعامدارى ادەمى ىرعاقپەن باياندالىپ, وقىرماندى تەرەڭىنە تارتا جونەلەدى. مۇندا جاڭا ەكونوميكاعا نەگىزدەلگەن ساياسي, الەۋمەتتىك, رۋحاني جاڭعىرۋ بارىسىنداعى قايشىلىقتار ايتىلىپ قانا وتپەيدى, ونى شەشۋدىڭ ناقتى جولدارى كورسەتىلىپ تە وتىرادى. ەلباسى يادرولىق قارۋسىز الەم جولىنداعى, ۇلتارالىق جانە دىنارالىق كەلىسىمنىڭ دارا ۇلگىسىن قالىپتاستىرۋداعى ەۆوليۋتسيالىق جولمەن تۇرعىنداردىڭ باقىتتى ءومىر ءسۇرۋىن قامتاماسىز ەتۋدەگى قول جەتكەن جەتىستىكتەرىمىزدى سارالاپ كورسەتەدى. ەڭبەكتە تۇڭعىش پرەزيدەنت – ەلباسىنىڭ تاۋەلسىزدىك جىلدارى جاقسى ومىرگە قول جەتكىزۋ بارشا حالىقتىڭ ىنتىماقتى بىرلىگى مەن كەلىسىمىن نىعايتۋداعى ەرەن ەڭبەگىنىڭ مەنمۇندالاپ تۇرۋى كەرەمەت كورىنىس بەرەدى.
كىتاپتا تاۋەلسىزدىگىمىزدىڭ دامۋ ۇلگىسىنىڭ تابيعاتى مەن ەۆوليۋتسياسى جان-جاقتى سارالانعان. بۇل ەڭبەكتە مەملەكەتتىڭ ىشكى ساياساتىنىڭ ايتۋلى جەتىستىكتەرى ناقتى مىسالدارمەن دالەلدەنىپ, قاراپايىم وقۋشىعا تۇسىنىكتى تىلمەن تۇسىندىرىلگەن. جۇرەكتى تەربەگەن «تاۋەلسىزدىك ءداۋىرىن» قولعا العان ءاربىر وقىرماننىڭ كەۋدەسىن ەلىنىڭ ەرەن جەتىستىكتەرىنە دەگەن ماقتانىش سەزىمى كەرنەيدى. شىعارمادا تاۋەلسىزدىك العاننان بەرگى وتانىمىزدا بولىپ جاتقان ايتۋلى وقيعالار مەن ونىڭ استارىنداعى اۋقىمدى شارالار ەرەن جەتىستىكتەرگە جەتەلەگەن ىرگەلى ىستەر ۋاقىت شەجىرەسىندەي سيپاتتالادى.
كىتاپتىڭ «مەملەكەتىمىزدىڭ دۇنيەگە كەلۋى. قازاقستاننىڭ ءبىرىنشى جاڭعىرۋى» دەپ اتالاتىن العاشقى ءبولىمى 1991-1995 جىلدار ارالىعىنداعى تاريحي وقيعالاردى قامتيتىنى بەلگىلى. «تاۋەلسىزدىك ءداۋىرىنىڭ» ەكىنشى جاڭعىرتۋ باياندالاتىن « ۇلى بەتبۇرىس», «قازاقستاننىڭ ەكىنشى جاڭعىرۋى» تاراۋلارىندا ەلباسىنىڭ تىكەلەي باسشىلىعىمەن قازاقستاندىق بىرلىك پەن كەلىسىمنىڭ ۇلگىسى, ونىڭ قاعيداتتارى مەن بىرەگەيلىكتىڭ ىرگە قالار نەگىزدەرى قالايشا قالىپتاسقانىن بايىپتايسىز. ال ءۇشىنشى جاڭعىرۋ كەزەڭى تۋرالى بولىمدە جاڭا قازاقستاندىق وتانشىلدىق رۋحتى انىق اڭعاراسىز.
قورىتا ايتقاندا, «تاۋەلسىزدىك ءداۋىرى» جانىمىزعا ەرەكشە ءبىر جىلىلىق سىيلادى. بالكىم, تاۋەلسىزدىك جىلدارىنىڭ تاعىلىمدى تابىستارىنىڭ جەمىسىن تاتىپ وتىرعاندىعىمىزدان دا سولاي شىعار. وسىنداي ايشىقتى وقيعالارعا تولى زاماندا ءومىر ءسۇرىپ جاتقانىمىزدى ءبىز باقىت ساناۋعا ءتيىسپىز.
سادىق مۇستافاەۆ,
«ۇلتتىق عىلىمي-پراكتيكالىق دەنە تاربيەسى ورتالىعىنىڭ» باس ديرەكتورى
الماتى
