«ۇكىمەتتىڭ 2018 جىلعا ارنالعان جوسپارىندا مينيسترلىككە 27 ءىس-شارا جۇكتەلگەن. ونىڭ ىشىندە 13 پۋنكتتى ورىنداۋشى - ءبىلىم جانە عىلىم مينيسترلىگى. ۇكىمەتتىڭ كەڭەيتىلگەن وتىرىسىندا ايتىلعان مىندەتتەرى ەسكەرە وتىرىپ, جوسپارعا ءبىلىمدى تسيفرلاندىرۋ بويىنشا وزگەرىستەر ەنگىزىلدى. مىسالى, ينفورماتيكا 2017 جىلى 7-سىنىپتان, 2014 جىلى 5-سىنىپتان باستالعان. وسى وقۋ جىلىنان باستاپ 3-سىنىپتان باستالادى. بۇل ءبىر», - دەيدى مينيستر.
ەرلان ساعاديەۆتىڭ ايتۋىنشا, ەكىنشىدەن, بەستەن ون ءبىرىنشى سىنىپقا دەيىنگى باعدارلامالار جاڭارتىلادى.
«ونىڭ ىشىندە باعدارلامالاۋ تىلدەرىن قايتا قاراستىرىپ, جاڭا باعدارلامالاۋ تىلدەرىن ەنگىزۋ جۇمىسى باستالىپ كەتتى. ءۇشىنشى, بارلىق مەكتەپتەردە تسيفرلىق ءبىلىم بەرۋ رەسۋرستارى بار. وسى جىلدىڭ ماقساتى - ولاردى قولدانۋ دەڭگەيىن كوتەرۋ. ءتورتىنشى - ءبىلىم بەرۋ سالاسىندا بالاباقشادان باستاپ قىزمەتتەردى اۆتوماتتاندىرۋ», - دەدى ول.
مينيستر وسى جىلدان باستاپ پاۆلودار مەن شىمكەنت قالالارىندا 100 پايىزدىق قاعازسىز ەسەپ بەرۋ جۇيەسى بويىنشا پيلوتتىق جوبا باستالاتىنىن ايتتى. جوبا تيىمدىلىگىن كورسەتسە, اتالعان جۇيە بارلىق قالالارعا ەنگىزىلمەك.
