«قازاقستان بۇگىنگى تاڭدا جەمقورلىققا قارسى ستراتەگيانىڭ ءبىرىنشى كەزەڭىن, ياعني 2015-2017 جىلدارعا ارنالعان جوسپاردىڭ باستاپقى كەزەڭىن اياقتادى. ەندىگى 2018-2020 جىلدارعا ارنالعان ءىس-شارالارىمىزعا قادام باستاپ وتىرمىز», دەدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى سىبايلاس جەمقورلىققا قارسى ساياسات دەپارتامەنتىنىڭ ديرەكتورى سالاۋات سىيلىباي ۇلى.
ساراپشى ايگۇل سولوۆەۆا سىبايلاس جەمقورلىققا قارسى ستراتەگيانىڭ ورىندالۋ بارىسىن, مەملەكەتتىك قىزمەتتى, قۇقىق قورعاۋ ورگاندارىن جانە سوت جۇيەسىن رەفورمالاۋدىڭ ماڭىزدى قادامدارىن اتاپ ءوتتى.
«سوڭعى ەكى جىلدا ءبىز كاسىبي مەملەكەتتىك اپپاراتتاردى قالىپتاستىرۋدا, سونداي-اق مەملەكەتتىك قىزمەت ستاندارتتارىن ىسكە اسىرۋدا – قۇزىرەتتى ىرىكتەۋدە, قۇقىق قورعاۋ ورگاندارىن مەريتوكراتيا قاعيداتى بويىنشا ىلگەرىلەتۋدە ۇلكەن وزگەرىستەردى بايقادىق. مىسالعا, ءۇش ساتىلى ىرىكتەۋ جۇيەسىن ەنگىزۋ قۇقىق قورعاۋ ورگاندارىندا وقۋعا تۇسكەندەردىڭ سانىن قىسقارتتى (2016 جىلى 8640-تان 2017 جىلى 6181-گە), بۇل قابىلداناتىن كادرلاردىڭ ساپاسىنىڭ جاقسارعانىن بىلدىرەدى», دەدى ول.
«اتامەكەن» ۇكپ وكىلى مۇرات ابەنوۆ مەملەكەت جالعىز ءوزى جەمقورلىقپەن كۇرەسكەنىمەن جەتىستىككە جەتە المايتىنىن العا تارتىپ, ونىمەن قوعام بولىپ كۇرەسۋ كەرەكتىگىن تىلگە تيەك ەتتى.
«ول ءۇشىن مەملەكەت ءوز تاراپىنان اشىق جاريا تۇردە جۇمىس ىستەپ, قوعام سونى قولداۋى كەرەك. سىبايلاستىق جاساعانداردى سىناپ, تازا, شىنايى جۇمىس ىستەگەندەردى قولداعان ءجون. سوندا عانا جەمقورلىق جولىن تولىق جاۋىپ تاستاماساق تا, سانىن ازايتا الامىز», دەدى ول.
راۋان قايدار,
«ەگەمەن قازاقستان»
