وسىناۋ جاھاندىق وزەكتى ماسەلەمەن ورايلاس, بيىلعى جولداۋدا مەملەكەت باسشىسى جاستاردىڭ رەپرودۋكتيۆتى دەنساۋلىعىن قورعاۋعا جانە نىعايتۋعا ەرەكشە نازار اۋدارۋ كەرەكتىگىن بولە-جارا اتاعانى ايان. كوكەيكەستى ماسەلەگە وراي, الماتىداعى پەدياتريا جانە بالالار حيرۋرگياسى عىلىمي ورتالىعى ەلباسىنىڭ بيىلعى جولداۋىن تالقىلادى. جيىنعا س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ بالالار اۋرۋلارى كافەدراسىنىڭ وقىتۋشىلارى دا ورتاقتاستى. پەدياتريا ورتالىعىنىڭ ديرەكتورى ريزا بورانباەۆا جولداۋداعى اسىرەسە, جاسوسپىرىمدەردىڭ دەنساۋلىعىن قورعاۋعا ەرەكشە نازار اۋدارۋ قاجەتتىگى, حالىقتىڭ ۇزاق جاساۋى مەديتسينالىق تەحنولوگيالاردىڭ دامۋى مەن ساپالى مەديتسينالىق قىزمەت كورسەتۋگە بايلانىستى ەكەنى ايتىلعانىن العا تارتا كەلە, الداعى مىندەتتەر تۋرالى تاراتا ءسوز قوزعادى.
– مەملەكەت باسشىسى ونكولوگيالىق اۋرۋلارمەن كۇرەسۋ ءۇشىن كەشەندى جوسپار قابىلداپ, عىلىمي ونكولوگيالىق ورتالىق قۇرۋ قاجەتتىگىن تاپسىردى. «حالىقارالىق وزىق تاجىريبە نەگىزىندە اۋرۋدى ەرتە دياگنوستيكالاۋدىڭ جانە قاتەرلى ىسىكتى ەمدەۋدىڭ جوعارى تيىمدىلىگى قامتاماسىز ەتىلۋگە ءتيىس», دەدى. بۇل رەتتە پەدياتريا ورتالىعىندا ماقساتتى جۇمىستار جۇرگىزىلۋدە. سوڭعى جىلدارى بالالارداعى ونكولوگيالىق اۋرۋلاردى ەمدەۋدىڭ جاڭا باعدارلاماسىن ەنگىزۋدىڭ ارقاسىندا اۋىر دەرتكە شالدىققان بالالاردىڭ ءومىرىن ۇزارتۋعا قول جەتكىزدىك. بىرنەشە جىل ىشىندە بالالار ءولىمى ەكى ەسەگە ازايدى. ءبىزدىڭ ورتالىقتا جاسالاتىن جانە باسقا ەش جەردە جۇرگىزىلمەيتىن بىرەگەي دياگنوستيكالىق زەرتتەۋ ادىستەرىن اتقاراتىن كلينيكالىق-دياگنوستيكالىق زەرتحانامىز بار. الداعى ۋاقىتتا بۇل باعىتتاعى جۇمىستار ەلباسى تاپسىرماسىنا سايكەس جالعاسىن تاباتىن بولادى», دەدى ر.بورانباەۆا.
پەدياتريا ورتالىعى قازىرگى ۋاقىتتا دەنساۋلىق سالاسىن تسيفرلاندىرۋ مەن قىزمەت كورسەتۋدى وڭتايلاندىرۋ بويىنشا مەديتسينالىق اقپاراتتىق جۇيەنى ەنگىزە باستادى.
ايناش ەسالي,
«ەگەمەن قازاقستان»
الماتى
