قازاقستان بۇل باعىتتاعى قاتىناستاردى جانداندىرۋدى 1992 جىلى ەۋروپاداعى قاۋىپسىزدىك جانە ىنتىماقتاستىق ۇيىمىنا (ەقىۇ) مۇشە بولۋمەن باستادى. 1995 جىلدان ەۋرووداق كومپانيالارىنىڭ قازاقستاننىڭ مۇناي, گاز, ۋران, ءتۇستى مەتالدار سەكتورلارىن يگەرۋگە دەن قويدى. سونىمەن قاتار ءبىزدىڭ ەلدىڭ حالىقارالىق تەرروريزمگە, ناركوترافيككە, ءتۇرلى ىندەتتەرگە قارسى بەلسەندى قىزمەتى جانە يادرولىق قارۋلارعا قارسى كۇرەسى ەۋرووداق ەلدەرىنىڭ جاھاندىق قايشىلىقتارعا قاتىستى ۇستانىمدارىنا سايكەس كەلدى. قازاقستاندا نەمىس, پولياك دياسپورالارىنىڭ بولۋى گەرمانيا مەن پولشا سياقتى ەلدەردىڭ بىزبەن قاتىناستارىن تەرەڭدەتۋگە مۇددەلى ەتە ءتۇستى. ەۋرووداق قازاقستانعا ەڭ كوپ ينۆەستيتسيا قۇيدى. قازاقستاننىڭ ەۋروپا ەلدەرىمەن تىعىز قاتىناستارى ونىڭ 2010 جىلى ەقىۇ-عا توراعا بولۋىنا اكەلدى.
1999 جىلدىڭ 1 شىلدەسىندە قازاقستان مەن ەۋرووداق اراسىنداعى ارىپتەستىك پەن ىنتىماق تۋرالى كەلىسىمگە بريۋسسەل قالاسىندا قول قويىلدى. ەۋروپا مەملەكەتتەرىمەن بايلانىستاردىڭ ورىستەۋى بارىسىندا ەلىمىزدە 3000-نان استام بىرلەسكەن كاسىپورىن اشىلدى. ەو ەلدەرىمەن ساۋدا كولەمى 2017 جىلى 24,4 ملرد دوللارعا جەتىپ, قازاقستاننىڭ سىرتقى تاۋار اي-
نالىمىنىڭ 40 پايىزىن قۇرادى. بۇل كورسەتكىش 2016 جىلداعىدان 23% ارتىق. تىعىز بايلانىستاردىڭ ارتا تۇسۋىنە 2015 جىلى جەلتوقساندا قازاقستان مەن ەو قول قويعان جاڭا كەڭەيتىلگەن ارىپتەستىك پەن ىنتىماقتاستىق تۋرالى كەلىسىم /كاىك/ ءوز ىقپالىن تيگىزدى. تمد ەلدەرىنىڭ اراسىندا قازاقستان عانا ەو-مەن وسىنداي كەلىسىمگە كەلىپ وتىر. ەو-عا كىرەتىن 28 ەلدىڭ 18-ءنىڭ پارلامەنتتەرى بۇل كەلىسىمدى راتيفيكاتسيالادى. «ەۋروپاعا جول» باعدارلاماسىن ىسكە اسىرۋ بارىسىندا قازاقستان دۇنيەجۇزىلىك ساۋدا ۇيىمىنا كىرىپ, كەدەن وداعىن جانە ەۋرازيالىق ەكونوميكالىق وداقتى قالىپتاستىرا الدى. بۇل شارالار بريۋسسەلمەن قاتىناستاردى ۇنەمى ۇيلەستىرىپ وتىرۋدى تالاپ ەتتى. ارينە ەو ەلدەرى ءوز مۇددەلەرىن قورعايدى. ولار ءۇشىن رەسەي مەن ۋكراينا قاتىناستارىنىڭ شيە-
لەنىسۋى جاعدايىندا ەنەرگەتيكالىق قاۋىپسىزدىكتى نىعايتۋ, شيكىزاتتى تاسىمالداۋ, كونتينەنتالدىق قاۋىپسىزدىكتى نىعايتۋ ماسەلەلەرى ماڭىزدى. قارقىندى دامىپ كەلە جاتقان, اشىق, ساياسي تۇراقتى قازاقستانمەن جاقسى قاتىناستار ورناتا وتىرىپ, ەۋرووداق ورتالىق ازيا ايماعىنداعى ىقپالىن ارتتىرا ءتۇسۋدى كوزدەيدى.
ەو ەلدەرى قازاقستاندا نارىقتىق رەفورمالار جۇرگىزۋگە, ەكونوميكانى بەيتاراپتاندىرۋعا, دەنساۋلىق ساقتاۋ, الەۋمەتتىك كومەك, عىلىمي-زەرتتەۋلەر سالالارىن جەتىلدىرۋگە كومەكتەستى. 1992-2000 جىلدار ارالىعىندا تەك تاسيس باعدارلاماسى شەڭبەرىندە ەلىمىزدەگى ەكولوگيالىق ساراپتاۋلار جۇمىستارىنا 120 ملن ەۋرو كولەمىندە تەحنيكالىق كومەك بەرىلدى. قازاقستان ءۇشىن سەمەي يادرولىق پوليگونىندا جاسالعان سىناقتاردىڭ سالدارلارىن انىقتاۋ جانە جويۋ, ارال تەڭىزى باسسەينىنىڭ ەكولوگيالىق ماسەلەلەرىن انىقتاۋ, الماتىنىڭ اۋە كەڭىستىگىنىڭ لاستانۋىن ازايتۋ ماسەلەلەرىنە قاتىستى زەرتتەۋ شارالارىنىڭ پايداسى بولدى. بۇل قاتىناستار تۇراقتى بايلانىستارعا ۇلاستى. مىسالى, 2016 جىلى ءساۋىر ايىندا الماتى وبلىسىندا قازاق-فرانتسۋز راديولوكاتسيالىق تەحنيكا ءوندىرۋ زاۋ-
ىتى اشىلدى. 2017 جىلى ۆەنگريالىق «ەكسيمبانك» بىرلەسكەن شاعىن جانە ورتا بيزنەس جوبالارىن قارجىلاندىرۋعا 255 ملن ەۋرو ءبولدى. ەۋروپالىق ينۆەستيتسيالىق بانك «قازاگرو» ۇلتتىق باسقارۋشى حولدينگى» اق ۇجىمىنا ۇلتتىق اوك-ءتى دامىتۋعا 200 ملن ەۋرو قارجى ءبولدى. ەۋروپا قايتا قۇرۋ جانە دامۋ بانكى ەلىمىزدەگى 17 جوبانى قارجىلاندىرۋعا 500 ملن دوللار جۇمساعالى وتىر. «يندۋستريا 4.0» باعىتىندا ونەركاسىپتى تسيفرلاندىرۋ جۇمىستارىن ۇيىمداستىرۋعا وزىق نەمىس تاجىريبەلەرىن ەنگىزۋگە گەرمانيا مەن قازاقستان اراسىندا 1 ميلليارد دوللار كولەمىندەگى 20 قۇجاتقا قول قويىلدى.
ەو ءۇشىن قازاقستاننىڭ ترانزيتتىك مۇمكىندىگىن پايدالانۋ ماڭىزدى. قىتايدىڭ الىپ ەكونوميكاسىمەن ەۋروپانىڭ بايلانىسىن ءۇرىمجى (قىتاي) – التىنكول (قازاقستان) – ريگا (لاتۆيا) – روتتەردام (نيدەرلاند) ترانسكونتينەنتالدىق تاسىمالداۋ جولى جەڭىلدەتتى. بۇل جولدىڭ ەلىمىزدىڭ ەۋروپا ەلدەرىمەن ساۋدا-ساتتىعىن وسىرۋگە ىقپالى كۇشتى. 2017 جىلدىڭ كۇزىندە كوۋۆولا (فينليانديا) – بۋسلوۆسكايا (رەسەي) – التىنكول (قازاقستان) – سيان (قىتاي) كونتەينەرلىك تەمىر جول باعىتى ىسكە قوسىلدى. جىل سايىن بۇل جولمەن 1 ملن توننادان ارتىق جۇك تاسىمالدانۋى جوبالانعان. اتالعان ىستەردىڭ ەلباسىنىڭ قازاقستان حالقىنا جولداۋىندا كورسەتىلگەن ءتورتىنشى مىندەت – كولىك-لوگيستيكا ينفراقۇرىلىمىن دامىتۋدا كومەگى زور. ەۋروپاعا جۇك ترانزيتىنەن قازىنامىزعا بىرنەشە ملرد دوللار تابىس كىرەدى.
ەو-مەن قاتىناستارىمىزدى جاقسارتۋ قازاقستاننىڭ ءتورتىنشى ونەركاسىپتىك رەۆوليۋتسيا ۇردىستەرىنە ەنۋىن جەڭىلدەتۋگە كومەكتەسەدى. ەو-مەن تىعىز قاتىناستار عىلىم, ءبىلىم, مادەنيەت, مەديتسينا سالالارىندا جاقسى دامىسا, قازاقستاننىڭ باسەكەگە قابىلەتتىلىگى ارتا تۇسەدى. الەمدىك وركەنيەت جەتىستىكتەرىنە اينالعان ەۋروپالىق دەموكراتيا يگىلىكتەرىن ۇلتتىق قۇندىلىقتارىمىزبەن ۇشتاستىرۋ ارقىلى عانا دامىعان مەملەكەتتەر قاتارىنان كورىنە الامىز.
