سۋرەتتەردى تۇسىرگەن ورىنباي بالمۇرات
ءىس-شارا جەردىڭ العاشقى جاساندى سەرىگىنىڭ ۇشىرىلۋىنا 60 جىل تولۋىنا وراي اۋقىمدى اكتسيانىڭ ناتيجەسىندە جۇزەگە اسىرىلعان.
اتالمىش اكتسيانى بىلتىر بايقوڭىر عارىش ايلاعىنىڭ نەگىزىن قالاعان گ.شۋبنيكوۆ اتىنداعى № 1 ورتا مەكتەپ وقۋشىلارى باستاعان بولاتىن. ونى قازاقستان رەسپۋبليكاسىنا قاراستى بايقوڭىر قالاسىنداعى ءبىلىم بەرۋ مەكەمەلەرىنىڭ وقۋشىلارى قولداپ, ناتيجەسىندە بايقوڭىرلىق وقۋشىلار 5 مىڭنان استام سۋرەت دايىنداعان.
كەيىننەن ءبىر مەزگىلدە ەكى قۇقىقتىق نەگىزدە قىزمەت ەتەتىن «بايقوڭىر» كەشەنىنىڭ ايرىقشا مارتەبەسىن ەسكەرە كەلە, بالالار ءوز شىعارمالارىن قازاقستان جانە رەسەي پرەزيدەنتتەرىنە جولداۋعا شەشىم قابىلدايدى. «مەن ەڭ الدىمەن اتالمىش № 1 ورتا مەكتەپ باسشىلىعىنا ريزاشىلىق تانىتامىن. وسىناۋ باستامانى العاش كوتەرگەن ۇجىمنىڭ وقۋشىلارى بۇگىندە الەم نازارىن وزدەرىنە جالت قاراتقانداي. بىرىنشىلىك ۇعىمى العاشقى جەڭىستەرمەن ساباقتاس بولىپ تابىلادى. بۇگىندە جاس بۇلدىرشىندەردىڭ ول شىعارمالارى ماسكەۋدەگى رەسەي فەدەراتسياسىنىڭ قوعامدىق پالاتاسىندا كورسەتىلمەك. پرەزيدەنت ۆ.ءپۋتيننىڭ اتىنا جولدانعان 500-گە تارتا سۋرەتتەر كورمە قوناقتارىنىڭ قىزىعۋشىلىعىن ارتتىرادى دەگەن سەنىمدەمىز» دەيدى ەلباسى كىتاپحاناسىنىڭ مۋزەيى ديرەكتورىنىڭ ورىنباسارى ءامىرحان راحىمجانوۆ. كورمەنىڭ اشىلۋ سالتاناتىنا بالالار كوركەمونەر مەكتەبى – يۋنەسكو كلۋبىنىڭ ديرەكتورى گۇلزيا يسەنوۆا جانە رايىمبەك باتىر اتىنداعى №50 «قازعارىش» مەكتەپ-ليتسەيىنىڭ وقۋشىلارى قاتىستى.
بۇگىنگى كورمە جوعارىداعى بەس مىڭ سۋرەتتىڭ ىشىنەن ىرىكتەلىپ الىنىپ, ەلباسىمىز ن.نازارباەۆقا جىبەرىلگەن 200 سۋرەت توپتاماسىمەن اشىلدى. بالالاردىڭ بارلىق شىعارمالارى ءبىر اي بويى «بالالىق شاقتان كوزقاراس» جوباسى اياسىندا اتالمىش مۋزەيدە وتكىزىلەتىن كوركەمسۋرەت كورمەسىندە قالىڭ جۇرتشىلىققا ۇسىنىلماق.
ميراس اسان,
«ەگەمەن قازاقستان»
