سەن – قازاقسىڭ!

ەلباسىنىڭ زيالى قاۋىم وكىلدەرىمەن كەزدەسۋىنە قاتىسقان اقىن كۇلاش تومەندەگى ولەڭ جولدارىن رەداكتسياعا مىناداي اڭداتپامەن جولداعان ەكەن: “قازاقستاننىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىققا ۇمتىلۋى جونىندەگى پرەزيدەنتتىڭ باستاماسى العاش كوتەرىلگەن تۇستا جازىلعان جىر شۋماقتارى نۇرسۇلتان ابىش ۇلىمەن كەزدەسۋ كەزىندە ويىما ورالىپ, “ەگەمەنگە” تۇتاس كۇيىندە جاريالانسا دەگەن تىلەكپەن جولداپ وتىرمىن”. مەملەكەت باسشىسىنىڭ باستاماسى جۇزەگە اسىپ, قازاقستان ەقىۇ-عا توراعالىققا كىرىسكەن تۇستا اقىننىڭ تىلەگىن قۇپ الۋدى ءجون كوردىك. كۇلاش احمەتوۆا. سەن – قازاقسىڭ! قازاق دەگەن ەل بولەك, قازاق سالعان سوقپاق بولەك, جول بولەك. كيىز ءۇيى جەر سياقتى جۇپ-جۇمىر, شاڭىراعى كۇن سياقتى دوڭگەلەك. سەن – قازاقسىڭ! ءبىر اللانىڭ ق ۇلىسىڭ! ادامعا ادام قۇل بولعانى – قۇرىسىن. جويقىن سوعىس, زۇلماتتاردا جويىلماي, قالعان ۇلتسىڭ. قاھارمانسىڭ! ۇلىسىڭ! سەن – قازاقسىڭ! ۇلى دالا – تۇعىرى. كۇمبىر-كۇمبىر كۇرەسكەرلىك – عۇمىرى, تىرەسكەننىڭ دىرىلدەتكەن تىزەسىن تۇلپارىنىڭ تۇياعىنىڭ ءدۇبىرى! سەن – قازاقسىڭ! العىزبايتىن بارىسسىڭ! ار-وجداننىڭ اسقاعىسىڭ, نامىسسىڭ! تاعدىرىڭدى تانىعىسى كەلگەندەر تاسقا باسقان تاريحىڭمەن تانىسسىن! سەن – قازاقسىڭ! بايىرعى جۇرت – تۇزدەگى ەڭ, تابيعاتتان ءتان تامىرىن ۇزبەگەن. قولىن جايىپ, كوكتەن ءومىر سۇراعان, جەر بەتىنەن جەرۇيىقتى ىزدەگەن. سەن – قازاقسىڭ! قازىناسى – ءناسىپ, قۇت. قازاق بولۋ – عالاماتقا عاشىقتىق. جەرىڭ, سۋىڭ, تاۋىڭ سۇلۋ سونشالىق, كورگەن كوزدەن كەتەتىندەي جاس ىتقىپ! سەن – قازاقسىڭ! وتانشىلسىڭ, تەكتىسىڭ! دوسىڭا ادال, دۇشپانىڭا كەكتىسىڭ. بۇل دالاعا مۇراگەرلىك, يەلىك – ۇرپاقتارعا ۇلى امانات دەپ ءتۇسىن. سەن – قازاقسىڭ! ايلالىسىڭ, ەپتىسىڭ! ايبارلىسىڭ, اقىلدىسىڭ, بەتتىسىڭ! كوپ بولۋعا, ءبىر بولۋعا ءتيىسسىڭ, كورمەۋ ءۇشىن جاتتىڭ ەزگى, تەپكىسىن! سەن – قازاقسىڭ! رۋحى ەركىن, ءوزى ەركىن! مۇزبالاقسىڭ, سورعالاعان ءسوزى ەركىن! قايتالانباس كۇيشىسىڭ سەن قۇيا العان دومبىرانىڭ وزەگىنە ءوز ءورتىن! سەن – قازاقسىڭ! كەلە جاتقان باعى اسىپ, ادامزاتتىق ىزگىلىككە جول اشىپ, داستارقانىڭ – ەلشىلىگىڭ ەجەلدەن, مەيىربانسىڭ, مەيماندوسسىڭ قولى اشىق. سەن – قازاقسىڭ! عارىشكەرسىڭ, جانى – اسپان. ورەلىسىڭ, ءوز ورنىنا تالاسقان. تورگە لايىق مارقاسقاسىڭ, مىقتىسىڭ, تورتكۇل دۇنيە ساياساتتا ساناسقان. سەن – قازاقسىڭ! قازاق ەدىڭ تۋعاندا! وندا, دۇنيە تاعىلىمىنان ۇلگى ال دا, اتا جۇرتتان, انا تىلدەن ايرىلما, توبەڭدە كۇن, تومەندە جەر تۇرعاندا!