سۋرەتتى تۇسىرگەن – ەرلان ومار, «EQ»
وتكەن اپتادا قوعامدى ەلەڭ ەتكىزگەن وقيعا دا كوپتىڭ ەسىندە. پاۆلودار قالاسىنىڭ 39 جاستاعى تۇرعىنى ينسۋلتتەن كوز جۇمعاننان كەيىن, ونىڭ جۇبايى مارقۇمنىڭ اعزالارىن ترانسپلانتاتسيالاۋعا كەلىسكەن. وتا ەلوردادان كەلگەن ماماندار توبىنىڭ قاتىسۋىمەن جاسالعان. ءبىر مەزەتتە جۇرەك, ەكى بۇيرەك, باۋىر جانە كوزدىڭ قاساڭ قابىقتارى مۇقتاج جاندارعا سالىندى. قازىر پاتسيەنتتەردىڭ جاعدايى تۇراقتى, دارىگەرلەردىڭ باقىلاۋىندا, ۋاقتىلى ەم الىپ جاتىر.
ايتا كەتەرلىگى, قاساڭ قابىقتى كوشىرۋ وپەراتسياسى پاۆلوداردا العاش رەت جاسالعان. بۇعان دەيىن مۇنداي وپەراتسيالار تەك استانا مەن الماتى قالالارىنداعى عىلىمي ورتالىقتار دەڭگەيىندە جاسالاتىن.
رەسپۋبليكالىق ترانسپلانتولوگيا جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ ورتالىعىنىڭ ديرەكتورى ايدار سيتقازينوۆتىڭ ايتۋىنشا, بۇيرەك, باۋىر اۋرۋلارى جيىلەپ وتىر. باۋىر بويىنشا – گەپاتيتتەر, تسيرروز, فيبروزدار بار. جۇرەككە قاتىستى دا بۇرىن وتكەرىلگەن ينفەكتسيالىق سىرقاتتار جۇرەك-قان تامىر جۇيەسىنە اسقىنۋ بەرەدى. وسىنداي جاعدايلاردا ناۋقاستار ءۇشىن جالعىز مۇمكىندىك – ترانسپلانتاتسيا, ياعني اعزا الماستىرۋ.
قازىر كۇتۋ پاراعىندا, بالالاردى قوسا العاندا, 4 500-دەن استام پاتسيەنت تۇر. ولاردىڭ باسىم بولىگىندە بۇيرەك قىزمەتى توقتاعان. قازا بولعاننان كەيىن دونور بولا الاتىن جانداردىڭ جاسى 18 بەن 65 ارالىعىندا. دارىگەرلەردىڭ ايتۋىنشا, اعزالاردى الۋ تەك مارقۇمنىڭ ءوزى ءتىرى كەزىندە بەرگەن كەلىسىمى مەن تۋىستارىنىڭ رۇقساتى بولعان جاعدايدا عانا جۇزەگە اسادى. ال ەگەر ادام ومىرىندە ءوز ورگاندارىن پايدالانۋعا رەسمي تۇردە تىيىم سالسا, بۇل شەشىمدى ەشكىم وزگەرتە المايدى.
اقپان قان تاپسىرۋ ايى دەپ جاريالاندى: اقمارال ءالنازاروۆا قان دونورى بولدى
