جىل باسىنان بەرى ەلىمىز بويىنشا التى مىڭعا جۋىق انا وسىنداي SMS قۇتتىقتاۋ العان. ال العاشقىلاردىڭ ءبىرى بولىپ پرواكتيۆتى ادىسپەن كۋالىك يەلەنگەندەر اراسىندا اتىراۋلىق باعىت ءالي تىلەكقابىل ۇلى مەن ماقسىم ومار نۇربەك ۇلى دا بار.
وبلىستىق پەريناتالدى ورتالىقتا دۇنيەگە ومار ەسىمدى ۇل اكەلگەن جايدار يباتوللاقىزى «قاعازباستىلىقتى كوبەيتپەي, جەدەل, اۆتوماتتى تۇردە رەسىمدەلەتىن كۋالىكتىڭ العاشقى يەگەرلەرىنىڭ قاتارىندا بولعانىمىزعا قۋانىشتىمىز», دەيدى.
«ازاماتتارعا ارنالعان ۇكىمەت» مەملەكەتتىك كورپوراتسياسى «ۇلتتىق اقپاراتتىق تەحنولوگيالار» اكتسيونەرلىك قوعامىنىڭ پرواكتيۆتى ءادىسى اياسىندا باستاۋ العان قاناتقاقتى جوبانىڭ ارتىقشىلىعى كوپ. وبلىستىق حالىققا قىزمەت كورسەتۋ ورتالىعى دەپارتامەنتىنىڭ ديرەكتورى تۇرلان نۇرجانوۆ بۇرىن جاڭا تۋعان بالانى تىركەۋ, كۋالىگىن الۋ, جاردەماقى تاعايىنداۋ, بالاباقشا كەزەگىنە تۇرۋ سىندى شارالار حالىققا قىزمەت كورسەتۋ ورتالىقتارىندا جۇزەگە اسقانىن ايتادى. ەندى اتا-انا حقو-عا بالانىڭ كۋالىگىن الىپ كەتۋ ءۇشىن عانا بارادى نەمەسە ۇيگە جەتكىزۋ قىزمەتىن پايدالانا الادى. بارلىق قاجەتتى قىزمەتتەردى SMS حابارلاما ارقىلى الۋعا بولادى. بۇل ءۇشىن كەز كەلگەن حالىققا قىزمەت كورسەتۋ ورتالىقتارىنا بارىپ, تەلەفون نومىرلەرىن پورتالداعى جەكە كابينەتتەرىندە بەكىتۋى كەرەك.
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن
ەرلان التىباەۆ
