وسىعان وراي, ەلەۋلى ءىس جۇرگىزىپ جاتقانداردىڭ ءبىرى «بەينەۋ اۋىل شارۋاشىلىعى كووپەراتيۆى» اوك وندىرىستىك كووپەراتيۆى. كووپەراتيۆتىڭ قۇرامىندا مال سويۋ الاڭى, ەت ءوندىرۋ, ۆەتەريناريالىق زەرتحانا جانە مال بازارى بار. شارۋاشىلىق ەتتى دايىنداۋ جانە ەت ونىمدەرىن ەكسپورتتاۋمەن قاتار, مال بورداقىلاۋمەن اينالىسادى. ول زاماناۋي مال سويۋ قۇرالدارى, مۇزداتقىشتار جانە ەت تۋراعىشتارمەن جابدىقتالعان. تسەحتىڭ ءوندىرىس قۋاتتىلىعى تاۋلىگىنە 4 توننا.
جالپى 2017 جىلى بەينەۋ اۋدانىندا «بيزنەستىڭ جول كارتاسى 2020» باعدارلاماسى بويىنشا 188,9 ملن. تەڭگەگە 8 جوبا نەسيەلەنىپ, اشىلعان جۇمىس ورنى 7,7 ەسەگە كوبەيدى. بەينەۋ سەلوسى كوشەلەرىنە ەلەكتر جەلىلەرىن تارتۋ جۇمىستارىنا جەرگىلىكتى بيۋدجەتتەن 79,5 ملن. تەڭگە, تولەپ جانە ەسەت سەلولارىنان بەينەۋ سەلوسىنا دەيىن جوعارى كەرنەۋلى ەلەكتر جەلىسىن تارتۋ جۇمىستارىنا – 100,0 ملن تەڭگە, بەينەۋ سەلوسىندا سىرتقى جارىقتاندىرۋ جۇمىستارىن – 6,9 ملن تەڭگە ءبولىندى. بارلىق نىساندار بويىنشا قۇرىلىس جۇمىستارى جۇرگىزىلىپ جاتىر.
بەينەۋ – مال شارۋاشىلىعى دامىعان اۋدان. الايدا مال ءوسىمى جاقسى بولعانىمەن, ەت تاپسىراتىن ورىن بولماي وتىر. بۇل دا تۇرعىندار كوكەيىندەگى ساۋالداردىڭ ءبىرى. وسىعان وراي وبلىس اكىمى ە.توعجانوۆ ەت ونىمدەرىنەن كونسەرۆىلەر دايىنداپ شىعاراتىن زاۋىت, اگرو نەسيە كورپوراتسياسىنىڭ نەگىزىندە بورداقىلاۋ ورتالىقتارىن قۇرىپ, تسەح اشۋ سىندى ەت وتكىزۋدىڭ بىرقاتار جولدارىن قاراستىرۋ كەرەك ەكەنىن اتاپ ءوتتى.
ەلباسى جولداۋىندا اۋىلدىق ەلدى مەكەندەردى ساپالى اۋىزسۋمەن قامتاماسىز ەتۋ ءۇشىن ۇكىمەت تاراپىنان ءتيىستى دەڭگەيدە قولداۋ كورسەتىلەتىنىن اتاپ ايتتى.
– اۋىلشارۋاشىلىقتىڭ ۇلعايۋىنا بايلانىستى سوڭعى 6 جىلدىڭ ىشىندە 20 ملن 600 مىڭ تەڭگە نەسيە الىندى. ولار بۇگىندە ءوز ىستەرىن دامىتىپ, اۋدان ەكونوميكاسىنىڭ وسۋىنە ۇلەستەرىن قوسۋدا. 2017 جىلى سارعا اۋىلىنان «باستاۋ بيزنەس» بويىنشا 7 ادام وقىتىلىپ, سەرتيفيكات الدى. 2 ادام 5 ملن-نان استام نەسيە جانە اۋىل شارۋاشىلىق قارجىلاي قولداۋ قورىنان 3 ملن. تەڭگە جەڭىلدىك پايىزبەن نەسيە الىپ, ماقساتىنا پايدالانۋدا. اۋىل جاستارى بيىل دا كاسىپكەرلىككە وقۋعا ۇسىنىس بىلدىرۋدە, - دەيدى سارعا اۋىلىنىڭ اكىمى مارات بولىسوۆ.
بەينەۋدەگى «بەينەۋ-اقجىگىت-وزبەكستان رەسپۋبليكاسى شەكاراسى» اۆتوموبيل جولىن قايتا جاڭعىرتۋ جۇمىسى دا ماڭىزدى. اقجىگىت اۋىلىندا قۋاتتىلىعى ساعاتىنا 120 توننا اسفالت دايىندايتىن اسفالت-بەتون زاۋىتى ورناتىلىپ, پايدالانۋعا دايىن. كوكبەكتى بەكەتىندەگى قۋاتتىلىعى ساعاتىنا 175 توننا اسفالت دايىندايتىن اسفالت-بەتون زاۋىتىن قۇراستىرۋ جۇمىستارى اياقتالىپ, گاز قۇبىرىنا قوسۋ جۇمىستارى جۇرگىزىلۋدە.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
