بۇگىندە اتالعان سالا ماماندارى ەۋروستاندارتتارعا ساي ءىس-قيمىل تانىتا الماسا, ىسكەرلىگىمىزگە سىن. ويتكەنى شەتەلدەردەن كەلەتىن قوناقتار مەن تۋريستەر ەلدىك دامۋدىڭ دەڭگەيىنە ءبىرىنشى كەزەكتە قوناقۇيلەر مەن مەيرامحانالارداعى قىزمەت كورسەتۋ ساپاسىنا قاراپ, ولشەم جاساۋى ابدەن مۇمكىن. ياعني مۇنداعى باستى قاعيدا بىرەۋ عانا – كورسەتىلەتىن قىزمەت تۇرلەرىن الەمدىك تالاپتار نورمالارىنان كەم تۇسىرمەۋ.
وسى ورايدا اقتوبە ايماعىندا ەرەكشە ءبىر جوبانىڭ تۇساۋى كەسىلدى. وبلىس ورتالىعىنداعى ءىرى كاسىپورىنداردىڭ جانىنان ارنايى وقىتۋ ورتالىقتارى اشىلىپ, جۇمىس ىستەي باستادى. وعان جۇمىسپەن قامتۋ ورتالىقتارىندا جۇمىسسىز رەتىندە تىركەلگەندەر قابىلدانادى. وقۋ مەرزىمى – ەكى اي. اسپاز, داياشى جانە اكىمگەر ماماندىعىن الىپ شىققاندارعا مەملەكەتتىك ۇلگىدەگى سەرتيفيكاتتار تاپسىرىلادى.
ۇكىمەت تاراپىنان وقىتۋ ورتالىقتارى ءۇشىن ءتيىستى قارجىلىق قولداۋ كورسەتىلىپ وتىرعانىن دا ايتا كەتكەن ءجون. سوعان ساي ءار وقۋشى ءۇشىن 24 مىڭ تەڭگە كولەمىندە تولەم تولەۋ شارالارى بەلگىلەنگەن. بۇل قاراجات وقىتۋشىنىڭ ەڭبەكاقىسى مەن وزگە دە ماتەريالدىق شىعىنداردى وتەۋگە جۇمسالادى.
ءبىز تاياۋدا وبلىس ورتالىعىندا قىزمەتىن باستاعان جاڭا قۇرىلىمداردىڭ ءبىرى «دامىتۋ» وقىتۋ ورتالىعىندا بولىپ, قىزمەتىمەن تانىسقان ەدىك. بۇل ورتالىق «اقتوبە وبلىسىنىڭ قوناقۇيلەر مەن مەيرامحانالار بيزنەسى» قوعامدىق بىرلەستىگى جانىنان قۇرىلىپتى. ول «زەرە» مەيرامحاناسى بازاسىندا ورنالاسقان. جاڭا ماماندىققا قايتا ازىرلەۋ كەزىندە كۋرس تىڭداۋشىلارىنا اي سايىن 17 مىڭ تەڭگە كولەمىندە شاكىرتاقى تولەۋ ءتارتىبى ورنىعىپتى.
بۇل جەردە تاجىريبەلىك ساباقتاردى جۇرگىزۋ ءۇشىن ارنايى كابينەتتەر ۇيىمداستىرىلعان. ورتالىقتا جوعارىدا ايتىلعان ماماندار دايارلانادى. بۇل رەتتە كاسىپقوي باس اسپاز بەن مەيرامحانا اكىمگەرى كۋرس تىڭداۋشىلارىنا تاقىرىپتاردى تولىق ءتۇسىندىرىپ ايتىپ بەرەدى. بۇدان ءارى تاجىريبەلىك ساباقتار جالعاسادى. دامىتۋ ورتالىعىنا قابىلدانعاندار تەك باس اسپاز بەن باس اكىمگەردىڭ تالىمىمەن شەكتەلمەي, «اقتوبە وبلىسىنىڭ قوناقۇيلەر مەن مەيرامحانالار بيزنەسى» قاۋىمداستىعى مۇشەلەرى مەن اقتوبە قالاسىنداعى ءدامحانا جانە مەيرامحانا يەلەرىنىڭ دارىستەرىن قوسا تىڭدايدى.
وقىتۋ ورتالىعىندا اسپاز ءىسى مەن باسقارۋ مەنەدجمەنتىنە باعىتتاۋدىڭ كەشەندى ءىس-جوسپارى بەكىتىلگەن. وعان وبلىستىق كاسىپكەرلەر پالاتاسى مەن جۇمىسپەن قامتۋ ورتالىقتارىنىڭ ماماندارى تارتىلعان. بۇل جونىندە «زەرە» مەيرامحاناسىنىڭ ديرەكتورى, وبلىستاعى قوناقۇيلەر مەن مەيرامحانالار بيزنەسى قاۋىمداستىعىنىڭ ءتورايىمى بانۋ تىلەگەنوۆا ايتىپ بەردى. ول بۇگىندە مەيرامحانا مەن قوناقۇي بيزنەسى سالاسىندا جاڭا تۇرپاتتاعى كادرلارعا سۇرانىس جىل سايىن ءوسىپ كەلە جاتقانىنا توقتالىپ ءوتتى. سوندىقتان ارنايى وقىتۋ ورتالىعىن اشۋ جونىندە ۇيعارىمعا كەلىپتى.
مۇنداعى ماقسات – اتالعان بيزنەس سالاسىنا قاجەتتى كادر ازىرلەۋ. ءارى كۋرستى بىتىرگەننەن كەيىن ولاردىڭ جۇمىسسىز قالماۋىنا باسا ءمان بەرۋ, دەيدى ب.تىلەگەنوۆا. «دامىتۋ» ورتالىعىندا وقۋىن اياقتاعان 20 اكىمگەر مەن 30 اسپازدىڭ 80 پايىزى ساناۋلى كۇندەردىڭ ىشىندە جۇمىسقا ورنالاسىپ تا ۇلگەرگەن.
اقتوبە وبلىستىق كاسىپكەرلىك پالاتاسى ادامي كاپيتالدى دامىتۋ ءبولىمىنىڭ باسشىسى دامەلى قۇنانوۆانىڭ ايتۋىنشا, اقتوبەلىكتەردىڭ بۇل جوباسى ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىنا يە بولىپتى. جوبانىڭ ەرەكشەلىگى, جۇمىس بەرۋشىلەر وزدەرىنە قاجەتتى كادرلاردى وزدەرى ازىرلەيدى. ياعني كۋرستى اياقتاعان سوڭ جۇمىسسىز قالامىن دەگەن قاۋىپ تۋمايدى.
تەمىر قۇسايىن,
«ەگەمەن قازاقستان»
اقتوبە
سۋرەتتە: تاجىريبەلىك دارىستەن كورىنىس
