فوتو: lukichev.biz
ءبىزدى ەلباسىنىڭ ادەتتەگىدەي جاس ۇرپاققا ءبىلىم بەرۋگە ايرىقشا كوڭىل ءبولۋى ەرەكشە قۋانتتى. جولداۋدا ءبىزدى ءبىلىم بەرۋدىڭ جاڭا ساپاسىنا كوتەرەتىن جاڭعىرۋدىڭ نەگىزى رەتىندەگى ادام كاپيتالى بولاتىنىن اتاپ كورسەتەدى. وسى رەتتە مەملەكەت باسشىسىنىڭ وقىتۋعا تەحنيكالىق تۇرعىدا قولداۋ كورسەتۋ جونىندەگى تۇجىرىمى كوڭىلگە قونادى. مۇنىڭ شەڭبەرىنە تسيفرلى ءبىلىم بەرۋ رەسۋرستارىن دامىتۋ مەن كەڭ جولاقتى ينتەرنەتكە قوسۋ دا كىرەدى.
بۇل جولعى جولداۋ مۇنىڭ الدىنداعى ءۇشىنشى جاڭعىرۋدىڭ جالعاسى ىسپەتتەس. بۇدان ءبىر جىل بۇرىن جاريالانعان سول قۇندى قۇجاتتا نۇرسۇلتان نازارباەۆ ەكونوميكانىڭ جەدەلدەتىلگەن تەحنولوگيالىق جاڭعىرۋىنا قول جەتكىزۋ, تسيفرلى تەحنولوگيانى قولدانۋ, جاڭا يندۋستريالاردى وركەندەتۋ, ونەركاسىپ, اگروونەركاسىپتىك كەشەن, كولىك پەن لوگيستيكا, قۇرىلىس سەكتورىن دامىتۋ, تسيفرلى يندۋستريانى جەدەلدەتۋ ماسەلەلەرىن العا شىعارىپ ەدى. ەلباسىنىڭ تۇجىرىمىنشا, قازاقستان وسىلاردى جۇزەگە اسىرۋ ارقىلى باسەكەگە قابىلەتتى ەلگە اينالۋعا ءتيىس بولاتىن.
ەندى, مىنە, ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا بەلەستەرىن اتاپ كورسەتەتىن بيىلعى جولداۋدا وسى مىندەتتەردى ودان ءارى دامىتىپ, جالعاستىرۋدىڭ باعدارلارى مەن باعىتتارى ۇسىنىلادى. مەملەكەت باسشىسى مۇنى 10 ءتۇرلى مىندەتتى جۇزەگە اسىرۋ جولىمەن ورىنداعاندى ءجون سانايدى. وسى مىندەتتەردىڭ قاتارىندا رۋحاني-الەۋمەتتىك ماسەلەلەر دە بار. جولداۋدا مۇنى ساپالىق جاڭا دەڭگەيگە كوتەرۋدىڭ ءبىلىم بەرۋ نەگىزىندە جاسالۋى كەرەك ەكەندىگى دە تايعا تاڭبا باسقانداي ايقىن كورسەتىلىپ تۇر. «بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەت», دەلىنگەن وندا. بۇدان ءارى ەلباسى بۇل مىندەتتى قالاي شەشۋگە بولاتىنىن تارقاتىپ ايتىپ بەرەدى. مۇنىڭ ەڭ سۇبەلىسى ءبىلىم بەرۋ باعدارلامالارىنىڭ ۇنەمى ءارتۇرلى وزگەرىستەرگە بەيىم بولىپ شىعۋى. جاڭا ءبىلىمدى تەك وسىلاي عانا مەڭگەرىپ تۇرۋدىڭ ءجونى كەلەدى.
جولداۋدا ورتا ءبىلىم بەرۋ سالاسىندا جاڭارتىلعان مازمۇنعا كوشۋ تەزدەتىلۋگە ءتيىس ەكەنى ايتىلادى. مۇنداي وزگەرىستەر وقۋ جۇيەسىنە مۇلدە جاڭا باعدارلامالار, وقۋلىقتار, ستاندارتتار قابىلدانىپ, كادرلار تارتىلاتىنىن اڭعارتادى. دەمەك سول كەزگە دەيىن پەداگوگتەردى وقىتۋدى جانە ولاردىڭ بىلىكتىلىگىن ارتتىرۋدى قايتا قاراۋ قاجەتتىگى تۋىندايدى. بۇل تۇستا جوعارى وقۋ ورىندارىندا كافەدرالار مەن فاكۋلتەتتەردى بۇرىنعىدان دا دامىتا ءتۇسۋ قاجەتتىگى الدان شىعادى. سول كەزدە ءبىلىم بەرۋدىڭ بارلىق دەڭگەيىندە ماتەماتيكا جانە جاراتىلىستانۋ عىلىمدارىن وقىتۋدىڭ ساپاسىن كوتەرۋگە زور ءمان بەرىلەدى.
قۇندى قۇجاتتا ءبىلىم بەرۋمەن جانە عىلىممەن اينالىسۋدىڭ سونى ادىستەرى مەن جاڭاشا تەتىكتەردى كەرەك ەتەتىنى دە ايتىلادى. بۇل بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەتتىگىن بىلدىرەدى. سول سياقتى الداعى جىلى مەكتەپكە دەيىنگى ءبىلىم بەرۋ ىسىندە بالالاردىڭ ەرتە دامۋى ءۇشىن ءوز بەتىنشە وقۋ ماشىعى مەن الەۋمەتتىك داعدىسىن دامىتاتىن باعدارلامالاردىڭ بىرىڭعاي ستاندارتتارىن ەنگىزۋ ماسەلەسى دە تىلگە تيەك ەتىلەدى. سونىمەن بىرگە جاس ۇرپاقتى عىلىمي-زەرتتەۋ سالاسىنا, وندىرىستىك-تەحنولوگيالىق ورتاعا ۇتىمدى كىرىستىرۋگە الىپ بارا الاتىن قازىرگى زامانعى جاڭعىرتۋلارعا ارقا سۇيەۋ كەرەكتىگى دە ەسكەرىلگەن ەكەن.
ەلباسى جوعارى ءبىلىم بەرۋ جۇيەسىندە اقپاراتتىق تەحنولوگيالار بويىنشا ءبىلىم العان تۇلەكتەر سانىن كوبەيتۋ كەرەك ەكەنىنە نازار اۋدارادى. مۇنىڭ ىڭعايىندا وتاندىق جوعارى وقۋ ورىندارىنىڭ شەتەلدەردەگى جەتەكشى ۋنيۆەرسيتەتتەرمەن, عىلىمي ورتالىقتارمەن, ءىرى كاسىپورىندارمەن جانە ترانسۇلتتىق كورپوراتسيالارمەن بىرلەسكەن جوبالاردى جۇزەگە اسىرۋى كەرەكتىگىن ەسكەرتىپ وتەدى. بۇل جاس عالىمداردىڭ عىلىمي گرانتتار اياسىنا كۆوتا ءبولىپ, ولاردى قولداۋدىڭ جۇيەلى ساياساتىن جۇرگىزۋگە بارىپ ۇلاسادى. سول سياقتى جاس عالىمداردىڭ ءبىلىم بەرۋ سالاسىنا ءوزىنىڭ ينۆەستيتسيالىق جوباسى مەن ەكسپورتتىق الەۋەتتى ەكونوميكانىڭ جەكە سالاسى رەتىندە قارايتىن ۋاقىتى كەلگەنى دە قاپەرگە الىنادى. وسىنىڭ ءبارى ءبىزدىڭ قازىرگى زاماننىڭ تالاپتارىنا ساي كەلەتىن مامانداردى دايارلاپ شىعارۋىمىزعا جول اشىپ بەرەدى. قولدانبالى عىلىمي-زەرتتەۋلەردى اعىلشىن تىلىنە بىرتىندەپ كوشىرۋدى جۇزەگە اسىرۋ تۋرالى ناقتى تاپسىرمالار بەرىلدى. جاس عالىمدارىمىزعا عىلىمي گرانتتار اياسىندا كۆوتا ءبولىپ, ولاردى قولداۋدىڭ جۇيەلى ساياساتىن جۇرگىزۋ حاقىندا جاقسى ۇسىنىستار ءبىلدىرىلدى. مەنىڭ ويىمشا, بۇل – ءبىلىم مەن عىلىم سالاسى ماماندارىنا بەرىلىپ وتىرعان زور مۇمكىندىك. تاعى ءبىر قۋانتارلىعى, بۇل قۇجاتتا مۇعالىمدەر مارتەبەسىن كوتەرۋگە دە ەرەكشە نازار اۋدارىلىپ وتىر.
«جوعارى وقۋ ورىندارىنا ءبىلىم بەرۋ باعدارلامالارىن جاساۋعا كوبىرەك قۇقىق بەرىپ, ولاردىڭ اكادەميالىق ەركىندىگىن زاڭنامالىق تۇرعىدان بەكىتۋ كەرەك» دەلىنگەن جولداۋدا. مۇنىڭ قاباتىندا وقىتۋشىلاردىڭ قايتا دايارلىقتان وتۋىنە كۇش سالىپ, جوعارى وقۋ ورىندارىنا شەتەلدىك مەنەدجەرلەردى تارتىپ, الەمدىك ۋنيۆەرسيتەتتەردىڭ كامپۋستارىن اشۋعا ءمان بەرىلۋى ءتيىس. بۇعان قوسا, ۇلتتىڭ الەۋەتىن ارتتىرۋ ءۇشىن مادەنيەتىمىز بەن يدەولوگيامىزدى ودان ءارى دامىتۋىمىز كەرەكتىگى تاعى بار. اينالىپ كەلگەندە, بۇل قادامداردىڭ بارلىعى «رۋحاني جاڭعىرۋعا» قىزمەت ەتەتىن بولادى.
ءبىلىم بەرۋ سالاسىنىڭ قىزمەتكەرى رەتىندە ءبىزدى جولداۋدا مامان دايارلاۋ ساپاسىن ارتتىرا تۇسۋگە كوڭىل بولىنگەنى دا ايرىقشا قاناتتاندىرادى. ءيا, قازىر از دا بولسا ساز مامان ازىرلەيتىن كەزەڭ كەلدى. بۇل باياعى ءبىر كەزدەردەگىدەي وقۋ ورىندارىنىڭ توپىرلاتىپ تۇلەك شىعاراتىن ءۇردىسىنىڭ كۇنى كەتىپ بارا جاتقانىن دا بايقاتادى.
مۇنىڭ ءبارى جاڭاشا ويلاۋعا جاتادى. ال جاڭاشا ويلاۋ تۋرالى ءبىلىمدى ۇسىنۋ مەن وڭدەۋ يننوۆاتسيالىق قوعام ءۇشىن اسا ماڭىزدى ەكەنى انىق. جولداۋدىڭ بىلىمگە قاتىستى قۇرمەت كورسەتۋدى ۇندەيتىن تارماعىنان تۋعان ويلار ءبىزدى وسىنداي تۇجىرىمدارعا جەتەلەيدى. تۇپتەپ كەلگەندە, ءبىلىم ءبىزدىڭ جوعارى وقۋ ورىندارى مەن مامانداردىڭ باسەكەگە قابىلەتتىگىن ارتتىرىپ, ولاردىڭ وسى سالاداعى ءىس-ارەكەتتەرىنە ناعىز بەزبەن بولادى.
گاۋھار الدامبەرگەنوۆا,
قازاق قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور
