فوتو: nurotan.kz
جيىندى اشقان م.قۇل-مۇحاممەد جاڭا جولداۋدىڭ قازاقستاننىڭ جۇيەلى جاڭعىرۋداعى 10 باسىم باعىتىن جۇزەگە اسىرۋدى قامتاماسىز ەتەتىن بىرەگەي باعدارلامالىق قۇجات ەكەنىن ايتتى. ويتكەنى قازاقستاندىق يندۋستريا مەن اگروونەركاسىپتىك كەشەندى جانە كولىكتىك-لوگيستيكالىق ينفراقۇرىلىمدى تسيفرلاندىرۋ, تۇرعىن ءۇي قۇرىلىسى مەن كوممۋنالدىق سەكتورعا جاڭا تەحنولوگيالاردى ەنگىزۋ ەلباسى ۇسىنعان ەلدى دامىتۋدىڭ نەگىزگى ۆەكتورى بولىپ تابىلادى.
وتىرىسقا جەتەكشىلىك ەتكەن م.قۇل-مۇحاممەدتىڭ ايتۋىنشا, مۇنىڭ بارلىعى قازاقستاننىڭ جاڭا الەمدەگى جەتەكشى ەلدەردىڭ قاتارىنا قوسىلۋى ءۇشىن قاجەت. سونىمەن قاتار پرەزيدەنت داستۇرگە ساي بيىل دا الەۋمەتتىك دامۋ ماسەلەلەرىنە زور كوڭىل ءبولىپ, ادامي كاپيتالدى قازاقستاندىق جاڭعىرۋدىڭ جۇيەلى ۇشتاعانىنىڭ نەگىزى رەتىندە بەلگىلەگەن. «ەلباسىمىزدىڭ جولداۋىندا ەلىمىزدى ساياسي, ەكونوميكالىق, الەۋمەتتىك جانە رۋحاني جاڭعىرتۋدىڭ 10 باسىم باعىتى ايقىن بەلگىلەنگەن. ءبىزدىڭ ەندىگى مىندەتىمىز – ءاربىر قازاقستاندىقتىڭ ءومىرى, دەنساۋلىعى مەن تۇرمىسىنا دەگەن ەلباسى قامقورلىعىنان تۇراتىن جولداۋدىڭ مازمۇنىن بارشا حالىققا جەتكىزۋ», دەدى م.قۇل-مۇحاممەد.
دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ وتىرىسىنا ەلدەگى جەتەكشى پارتيالاردىڭ باسشىلارى, پارلامەنت دەپۋتاتتارى, قازاقستان حالقى اسسامبلەياسىنىڭ, كاسىبي جانە قوعامدىق بىرلەستىكتەردىڭ وكىلدەرى قاتىستى. ال وتىرىس بارىسىندا كواليتسيا مۇشەلەرى مەملەكەت باسشىسىنىڭ جاڭا جولداۋىنا بايلانىستى ءوز ويلارىن ورتاعا سالىپ, پىكىرلەرىمەن ءبولىستى. ماسەلەن, قازاقستان كاسىپوداقتار فەدەراتسياسىنىڭ توراعاسى باقىتجان ءابدىرايىم ءتورتىنشى ونەركاسىپتىك رەۆوليۋتسيانىڭ جاڭا مۇمكىندىكتەرى كىمدەرگە تيەسىلى ەكەنىن دە باياندادى. «جاڭا مۇمكىندىكتەر ەڭ الدىمەن عىلىمعا, بىلىمگە جاقىن ەڭبەكقور ازاماتتارعا بەرىلەدى دەپ سانايمىن. ويتكەنى وسى ماقساتتا كاسىپوداق الدىندا ۇلكەن مىندەتتەر تۇر. ءبىز وسى باعىتتاعى جۇمىستارىمىزدى ورىنداۋ ءۇشىن جاقىن ارادا ارنايى جول كارتاسىن جاساپ, بۇكىل قازاقستان بويىنشا ۇگىت-ناسيحات جۇرگىزەمىز», دەدى ول.
«نۇر وتان» پارتياسىنىڭ باستاماسىمەن قۇرىلعان دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ كەزەكتى كەڭەسىنە قاتىسۋشىلار جولداۋدا ادام كاپيتالىن جاقسارتۋعا ارنالعان پرەزيدەنت باستامالارىن جەدەل جۇزەگە اسىرۋ قاجەتتىگىنە كەڭىنەن توقتالدى.
«اق جول» دەموكراتيالىق پارتياسى بيزنەس پارتياسى رەتىندە جولداۋدا بيزنەسكە ارنالعان باعىتتاردى ەرەكشە باعالايدى. بۇل جولى ەلباسىمىز يندۋسترياعا عانا ەمەس, ەڭ الدىمەن يننوۆاتسيالىق باعىتقا باسا نازار اۋدارىپ وتىر. ەگەر ءبىز يننوۆاتسيانى باستى ماقسات رەتىندە, باستى كورسەتكىش رەتىندە الساق, كەز كەلگەن كاسىپورىندى ەمەس, كەز كەلگەن ءوندىرۋشىنى ەمەس, تەك زاماناۋي جاڭا تەحنولوگيالاردى پايدالاناتىن, جاڭا تەحنولوگيالار الىپ كەلەتىن كومپانيالاردى قولداۋىمىز كەرەك», دەدى پارلامەنت ءماجىلىسىنىڭ دەپۋتاتى, «اق جول» پارتياسىنىڭ توراعاسى ازات پەرۋاشەۆ.
سودان كەيىن ءسوز العان قازاقستان كوممۋنيستىك حالىقتىق پارتياسىنىڭ مۇشەسى, پارتيانىڭ استانا فيليالىنىڭ ءبىرىنشى حاتشىسى مارات اۋباكىروۆ مەملەكەت باسشىسىنىڭ بۇل جولعى جولداۋىندا ەلىمىزدىڭ اۋىل شارۋاشىلىعى سالاسىنا ايرىقشا كوڭىل بولىنگەندىگىنە توقتالدى. «راسىندا دا قازاقستاننىڭ اۋىل شارۋاشىلىعى ونىمدەرىن ءوندىرۋ الەۋەتى وتە جوعارى جانە ەڭ باستىسى, ول تازا تابيعي ونىمدەر بولىپ تابىلادى. اسىرەسە استىق وندىرىسىندە الەمدەگى الدىڭعى قاتارلى ەلدەردىڭ ساناتىندامىز. ەندەشە ءبىز اتادان بالاعا ميراس بولىپ كەلە جاتقان وسىنداي يگىلىكتى ىستەرىمىزدى زاماناۋي تالاپقا ساي ەتىپ دامىتۋىمىز كەرەك», دەدى م.اۋباكىروۆ.
سول سياقتى اۋىل ماسەلەسىنە ايرىقشا كوڭىل بولگەن «اۋىل» حالىقتىق-دەموكراتيالىق پاتريوتتىق پارتياسى توراعاسىنىڭ ءبىرىنشى ورىنباسارى تولىمبەك عابدىلاشىموۆ ءوزىنىڭ سوزىندە ەڭبەك ونىمدىلىگىن ارتتىرۋ قاجەتتىگىنە باسا نازار اۋداردى. «وعان قوسا, ەڭبەك ونىمدىلىگىنىڭ ارتۋىنان پايدا بولعان ونىمدەردىڭ ەكسپورتىن ەسەلەۋگە دە كۇش سالعانىمىز لازىم. ەلباسىمىز ايتقانداي, تاۋاردى الەمدىك نارىققا شيكىزات كۇيىندە ەمەس, وڭدەلگەن ءارى حالىقارالىق تالاپقا ساي, تۇتىنۋعا دايىن ءونىم رەتىندە ۇسىنۋدى قولعا العانىمىز ءجون. بۇل رەتتە ءبىز جاڭا تەحنولوگيالاردى ترانسفەرتتەۋمەن جانە ونى قازاقستاندىق جاعدايعا بەيىمدەي وتىرىپ, الەۋەتىمىزدى ارتتىرعانىمىز ابزال», دەدى ت.عابدىلاشىموۆ.
جيىندا ەل كاسىپكەرلەرى جولداۋدا اتاپ كورسەتىلگەن باعىتتار بويىنشا جۇمىستار قازىردىڭ وزىندە قىزۋ قولعا الىنىپ جاتقانىن العا تارتتى. «اتامەكەن» ۇكپ توراعاسى ابىلاي مىرزاحمەتوۆ ەلباسى جولداۋىندا ءوزىن-ءوزى قامتيتىن اۋىلداعى ازاماتتاردى كاسىپكەرلىككە تارتۋ, رۋحاني جاڭعىرۋ, پراگماتيزم ماقساتى العا قويىلعانىن اتاپ كورسەتتى. «اتامەكەن» وتكەن جىلى «بيزنەس باستاۋ» جوباسىن قولعا العانى بەلگىلى. سول كەزدە ەلىمىز بويىنشا 15 مىڭ ادامدى وقىتتىق, ونىڭ ىشىندە 8 مىڭى بيزنەس جوسپارىن قورعاپ شىقتى جانە 3 مىڭ ادام ءوز ءىسىن اشتى. بيىل 160 اۋداندا 30 مىڭعا تارتا ادامدى وقىتامىز. ءبىر قۋانتاتىنى, وسى ماسەلەنى ەلباسى ءوزىنىڭ حالىققا جولداۋىندا اتاپ ءوتتى جانە ونى «اتامەكەن» كاسىپكەرلەر پالاتاسى ىسكە اسىرۋدا», دەدى ا.مىرزاحمەتوۆ.
ايتا كەتەيىك, القالى جيىندا «بىرلىك» ساياسي پارتياسى توراعاسىنىڭ ورىنباسارى بورىبەك قادىربەك ۇلى, «جاڭارۋ» جەمقورلىققا قارسى جالپىۇلتتىق قوزعالىسى» رقب پرەزيدەنتى ورالباي ابدىكارىموۆ, پارلامەنت سەناتىنىڭ دەپۋتاتى جانە «قازاقستان ۇلتتىق ينجەنەرلىك اكادەمياسى» رقب پرەزيدەنتى باقىتجان جۇماعۇلوۆ, «قازاقستاننىڭ ازاماتتىق اليانسى» زتب پرەزيدەنتى تاڭىربەرگەن بەردىوڭعاروۆ سىندى قوعام بەلسەندىلەرى ءسوز سويلەپ, وي-پىكىرلەرىن ورتاعا سالدى. ال جيىن سوڭىندا قاتىسۋشىلار جولداۋعا قولداۋ ءبىلدىرىپ, ەلىمىزدىڭ بارشا ازاماتتارىن جىلدىڭ باستى قۇجاتىن تالقىلاۋ جانە ءتۇسىندىرۋ جۇمىستارىنا بەلسەندى قاتىسۋعا شاقىرعان ۇندەۋ قابىلدادى.
نۇرلىبەك دوسىباي,
«ەگەمەن قازاقستان»
