اتى الەمگە ايگىلى قاجىمۇقان 1945 جىلى سەمەيدەگى ۇلى ابايدىڭ 100 جىلدىق مەرەيتويىنا بارعاندا وسى بەلدىكتى بازارلىق رەتىندە ساتىپ الىپ, جۇبايى مىنايىمگە سىيلاپتى. بەلدىكتىڭ ءبىر-بىرىنە جاپسارلاستىرىلىپ بىردەن جەتىگە دەيىن نومىرلەنگەن اشەكەيلى بولىكتەرى بار. سونداي-اق كورنەكىلىگى تازا كۇمىستەن بەدەرلەنگەن بەتتەرىنە قىزىل كوزدى تاستان اشەكەيلەر جاپسىرىلعان. قاجىمۇقان مۋزەيىنىڭ عىلىمي قىزمەتكەرى گ.اشىرباەۆانىڭ ايتۋىنشا, كۇش اتاسى قاجىمۇقاننىڭ جۇبايى ءمىنايىم ومىردەن وتەرىنىڭ الدىندا توسەك تارتىپ جاتقاندا شاۋىلدىردە تۇرعان جاڭىل ەسىمدى ءسىڭلىسى كوڭىلىن سۇراي كەلگەن. «سوندا ءمىنايىم اپا ءوزىنىڭ ءسىڭلىسى جاڭىلعا «بەلدىكتى ماعان پالۋان جەزدەڭ سىيعا بەرگەن ەدى, ەندى وسىنى سەن ال, جەزدەڭنىڭ جانە مەنىڭ كوزىمدەي كورىپ ءجۇر» دەپ اشەكەيلى كۇمىس بەلدىكتى بەرەدى. قاجىمۇقان پالۋاننىڭ ءۇشىنشى ايەلى ءمىنايىم اپامىز 1978 جىلى دۇنيەدەن وتكەن. جاڭىل اپامىز ءوز ۇرپاقتارىنا اپايى مەن جەزدەسىنەن قالعان ەستەلىك بەلگى دەپ تاريحىن ايتىپ وتىراتىن-دى. ول كىسى 1994 جىلى قايتىس بولادى. جاڭىل اپامىزدىڭ ۇلى ساۋىنباي ماماسەرىكوۆ ونى 2002 جىلدىڭ ناۋرىز ايىندا مۋزەي قورىنا وتكىزگەن», دەيدى مۋزەي قىزمەتكەرى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
