«استانا» باسكەتبول كلۋبىنىڭ شاقىرۋىمەن كەڭەستىك بەلگىلى سپورتشى كاسىپقوي باسكەتبول كلۋبىنىڭ اياسىنداعى «استانا» بالالار باسكەتبول اكادەمياسىنىڭ تاربيەلەنۋشىلەرىنىڭ اشىق جاتتىعۋىنا قوناق بولدى. جاتتىعۋ بارىسىندا ءالجان جارمۇحامەدوۆ بالالارمەن اڭگىمەلەسىپ, سپورتتاعى جەتىستىگى جايلى باياندادى. بالالارمەن جانە بالالار باسكەتبول اكادەمياسىنىڭ باپكەرلىك شتابىمەن اڭگىمەلەسكەننەن كەيىن وليمپيادا چەمپيونى ءوز اسەرىن باق وكىلدەرىنە ايتىپ بەردى:
"استانادا باسكەتبول دامىپ كەلەدى. بالالار اكادەمياسىندا سەرب مامانى دەيان ءپاريجانيننىڭ جۇمىس ىستەپ جاتقانىن اتاپ وتەيىن. بۇل ەلدە جاقسى ويىنشىلاردى باپتاپ شىعاراتىن باسكەتبولدىڭ ەۋروپالىق مەكتەبى بار".
اشىق جاتتىعۋ اياقتالعاننان كەيىن ءالجان جارمۇحامەدوۆ اكادەميا تاربيەلەنۋشىلەرىمەن جانە «استانا» باسكەتبول كلۋبىنىڭ سپورتشىلارىمەن «دۆيجەنيە ۆۆەرح» ءفيلمىنىڭ جابىق كورسەتىلىمىن تاماشالاۋعا باردى. بۇل فيلم 1972 جىلعى وليمپيادا ويىندارىندا باسكەتبولدان اقش قۇراماسىنان فينالدا باسىم تۇسكەن كسرو كومانداسىنىڭ تاريحي جەڭىسىن باياندايدى. باسكەتبولشى جارمۇحامەدوۆ ميۋنحەندە وتكەن وسى وليمپيادانىڭ فينالىندا كەڭەس وداعى قۇرامىندا ويناعان.
«دۆيجەنيە ۆۆەرح» ءفيلمىن ەكى رەت كوردىم. 21 جەلتوقسانداعى ءبىرىنشى پرەمەراسىنان كەيىن شاقىرتۋلار كوپ تۇسە باستادى - بالالار سپورت مەكتەپتەرىنەن, كورپوراتسيالار ءوز قىزمەتكەرلەرىنە, ءوز سپورتشىلارىنا كورسەتىپ, مەنى مىندەتتى تۇردە شاقىرادى. مىنە, استاناداعى پرەمەراعا دا شاقىردى. ارينە, قازاقستاندا ماعان جانە فيلمگە قىزىعۋشىلىق تانىتىپ جاتقانى كوڭىلگە مەدەۋ. بۇكىل زال مەنىڭ جانىمنان ءوتىپ, امانداسىپ, سۋرەتكە ءتۇستى, مۇنداي قىزىعۋشىلىققا تاڭمىن», - دەپ پىكىر ءبىلدىردى جارمۇحامەدوۆ.
باسكەتبولشى ميۋنحەندە وتكەن تاريحي فينالدا الاڭنان شىقپاي ويناعانىن ايتتى.
«باسقا ويىنشىلاردان كوبىرەك ويناۋىما تۋرا كەلدى. 40 مينۋتتىڭ 36 مينۋتىن ويناپ بەردىم. ءبىرىنشى جانە ەكىنشى تايمداردا ەكى مينۋتتان عانا دەمالدىم. بار ويىن, دوپ سالدىرماۋ, كومەكتەسۋ, دوپتى تارتىپ الۋمەن بولدى. بارىمدى سالدىم».
«استانا» باسكەتبول كلۋبىنىڭ شاقىرتۋىمەن ءالجان مۇسىربەك ۇلى رەسەيلىك ءفيلمنىڭ قازاقستاندىق پروكاتتاعى تانىستىرىلىم كۇنىنە ارنايى كەلدى.
«قازاقستانعا ءاردايىم قۋانا-قۋانا كەلەمىن. بۇل اتا-بابامنىڭ جەرى. كىشى وتانىم – وڭتۇستىك قازاقستان وبلىسىنا جىل سايىن بارامىن. قازاقستانعا كوشۋ تۋرالى ويىم 1967 جىلى بولدى, سول كەزدە مەنى الماتىعا شاقىرتقان. "لوكوموتيۆ» كومانداسى بار ەدى. كەلىپ, جارتى جىلداي قوناقۇيدە تۇردىم. كەڭەس وداعىنىڭ باسكەتبول فەدەراتسياسى ماعان رۇقسات الىپ بەرۋگە تىرىسقان, بىراق سول كۇيى بەرمەدى. سەبەبى, ماعان وزبەكستان جوعارى دەڭگەيدە تالاستى. ودان كەيىن مەن ماسكەۋدىڭ تسسكا-سىنا كەتتىم. كارەرامدا جوعارى ناتيجەگە جەتكەنىم وسى قادامىمنىڭ ارقاسى شىعار".
ايتا كەتەيىك, 12 قاڭتاردا ءالجان مۇسىربەك ۇلى قازاقستان رەسپۋبليكاسىنىڭ مادەنيەت جانە سپورت مينيسترىمەن كەزدەستى. كەزدەسۋ بارىسىندا ارىستانبەك مۇحامەدي ۇلى جارمۇحامەد ۇلىنا باسكەتبولدى دامىتۋعا قوسقان ۇلەسى ءۇشىن العىس ايتتى. مينيستر سپورتشىنىڭ ەرلىك جاساپ, ۇرپاققا ۇلگى بولا بىلگەنىن اتاپ ءوتتى.
ەسكە سالايىق, ءالجان جارمۇحامەدوۆ – كەڭەستىك بەلگىلى باسكەتبولشى, 1972 جىلعى وليمپيادانىڭ چەمپيونى, 1976 جىلعى وليمپيادانىڭ قولا جۇلدەگەرى جانە وليمپيادا چەمپيونى بولعان تۇڭعىش قازاق. قازىرگى ۋاقىتتا باسكەتبولشى جارمۇحامەدوۆ ماسكەۋدە تۇرادى جانە سپورت قاۋىمداستىعىندا بەلسەندى قىزمەت اتقارىپ ءجۇر.
