ارقاباي تۋىسى ءاندىردىڭ ۇيىندەگى الا شۇبار دۇرەكتىڭ قوس كۇشىگىن كورىپ قىزىعا ءتۇستى. الايدا ايەلى سۋسۇلۋ الگى تىيىمدى ەسىنە سالدى. ونىڭ ۇستىنە وتكەن جولى ءاندىردىڭ ءوزى كۇشىكتەرىن قايتا-قايتا ماقتاپ ارقابايدىڭ اۋەسىن كەتىرگەن. وسى دۇرەكتىڭ كۇشىكتەرى توبەت شىعادى. سەبەبى, ءيتىم بايدىكتىڭ اقتىرناق اتتى توبەتىمەن ىلىققان, – دەپ دالدىك ايتقانى بار. بايدىكتىڭ اقتىرناعى دەگەنى – دەنە تۇرقى ەسىك پەن توردەي زور توبەت يت. اقىرى ارقاباي ءاندىر تۋىسقانىنىڭ ۇيىنە قايتا-قايتا بارعىشتاپ ءجۇرىپ قوس كۇشىكتىڭ ءبىرىن «زىپ» ەتكىزدى. كۇشىكتى دەرەۋ قويلارىن قوسىپ باعاتىن قويشى قوسپاننىڭ اۋىلىنا اتتاندىردى. سودان كۇشىك جاز بويى قويلى اۋىلدا ەركىن ءجۇردى. كۇزگە سالىم ارقاباي كۇشىكتى قايتا اۋىلعا الدىرىپ الدى. ول ۋاقىتتا جەلكەسى كۇجىرەيىپ, ءتىسى اقسيىپ, بويى تارالا وسكەن قوڭقاق ءىرى دۇرەكتى ءاندىر تۇگىلى ارقابايدىڭ ءوزى تانىماي قالدى. تۋرا ەنەسى سياقتى الا شابىر دۇرەككە اينالعان. بىراق ءبىر جامان قاسيەتى يتاياعىنا جاقىنداساڭ سيراعىڭنان الا تۇسەدى. جۋىندىسىن قىزعانا جەيدى ەكەن. قار تۇسە سوعىمنىڭ باسى باستالىپ قوناق شاقىرىس باستالدى. ارينە, اعايىن-تۋىس, كورشى-قولاڭ تۇگەل شاقىرىلدى. كەلگەن قوناقتار استان كەيىن تىسقا تىنىستاۋعا شىقتى. ءبىرى شاقشاسىن شەرتىپ, ءبىرى شىلىمىن شىمشىلاپ اجىك-گۇجىك اڭگىمەلەسىپ تۇرعان بولاتىن. ءيتتىڭ يتاياعىنا ءاندىردىڭ قايدان جاقىنداعانىن كىم ءبىلسىن, الا دۇرەك ءاندىر تۋىسقانىنىڭ تىرسەگىنەن الا ءتۇسىپتى. ال كەرەك بولسا؟! الا قۇيىن شابىلىس باستالدى. جەدەل جاردەم شاقىرىلىپ, ءاندىردى سالىپ الىپ كەتتى. ەرتەڭىنە «قارعى باۋى قايدا؟», «نەگە بوس جىبەرەسىزدەر؟» دەپ پوليتسيا قىزمەتكەرى, ودان «تولقۇجاتى قايدا؟», «ۆاكتسينا ەگىلگەن بە؟» دەپ ۆەتۆراچ كەلىپ تۇر. شاقشاداي باسى شاراداي بولعان ارقاباي اۋدانعا بارىپ قۇجات جيناپ, ءيتىن تەكسەرىستەن تەكسەرىسكە وتكىزىپ جۇرگەندە وتىز كۇن دە وتە شىعىپتى. «نەسىن ايتاسىڭ كىسىنى قۇتىرعان يت قاپسا, وتىز توعىز كۇن ءوتىپ قىرقىنشى كۇنى قۇتىرادى ەكەن» دەگەندى ەستىپ ۋايىممەن كۇن ساناپ ءجۇردى. ساناعان وتىز توعىز كۇنى ءوتىپ, قىرقىنشى كۇنى تاڭەرتەڭ ارقاباي ۇيقىدان ويانا سالا ءاندىر تۋىسىنىڭ ۇيىنە اسىعا جۇگىردى. اسىققاندا جەتە السايشى. ءاندىردىڭ اۋلىسىنە كىرگەندە ەسىگىنىڭ الدىندا قار كۇرەپ جۇرگەن ءاندىردى كورىپ: «قۇتىرماپتى!», «قۇتىرماپتى!» دەپ تۋىسىن قۋانا قۇشاقتاي الدى.
سودان بەرى ارقاباي اعايىن تۇگىلى الىستان يت الىپ اسىرامايتىن بولدى. ءيا, اللانىڭ بەرگەن از عۇمىرىندا يتشە ىرىلداسپاي, كۇشىكشە شاۋىلدەسپەي وتكەنگە نە جەتسىن!
ماقسات قارعاباي
