مەملەكەت باسشىسى راسىمگە قاتىسۋشىلاردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋمەن قۇتتىقتاپ, ولاردىڭ جاۋاپتى ءارى مارتەبەلى ميسسيالارى ەلدەرىمىز اراسىنداعى ىنتىماقتاستىقتى جان-جاقتى دامىتۋعا سەپتىگىن تيگىزەتىنىنە سەنىم ءبىلدىردى.
– سىزدەردىڭ جۇمىستارىڭىز قىزىقتى جانە جاۋاپتى كەزەڭگە تۇسپا-تۇس كەلىپ وتىر. تەحنولوگيالىق رەۆوليۋتسيا جاڭا سىن-قاتەر اكەلۋمەن قاتار, كەز-كەلگەن ەلدىڭ دامۋىندا سەرپىلىس جاساۋعا مۇمكىندىك بەرەدى. سوندىقتان قازاقستان حالقىنا ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىمدى جاريالادىم, – دەدى نۇرسۇلتان نازارباەۆ.
قازاقستان پرەزيدەنتى الەمنىڭ وزىق دامىعان 30 ەلىنىڭ قاتارىنا قوسىلۋدى جەدەلدەتۋ ءۇشىن قاجەتتى زاماناۋي تەحنولوگيالاردى پايدالانۋدىڭ ماڭىزدىلىعىن اتاپ ءوتتى.
– مەن جولداۋدا ەكونوميكانى, الەۋمەتتىك سالانى, سونداي-اق مەملەكەتتىك باسقارۋ ءىسىن دامىتۋدىڭ نەگىزگى باعىتتارى بويىنشا ناقتى ون مىندەت قويدىم, – دەدى مەملەكەت باسشىسى.
نۇرسۇلتان نازارباەۆ قازاقستاننىڭ حالىقارالىق ارەنادا بەلسەندى پوزيتسيا ۇستانىپ كەلە جاتقانىن ايتىپ, 2017 جىلى استانادا وتكەن بىرقاتار ءىس-شارانىڭ ناتيجەلەرىنە نازار اۋداردى. ولاردىڭ قاتارىندا يميدجدىك تۇرعىدان عانا ەمەس, سونداي-اق ەكونوميكالىق تۇرعىدان وڭ اسەرى بولعان حالىقارالىق «ەكسپو-2017» مامانداندىرىلعان كورمەسىن, شانحاي ىنتىماقتاستىق ۇيىمىنىڭ ءسامميتى مەن يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتىن اتاعان ءجون.
– سيرياارالىق قاقتىعىستاردى رەتتەۋدىڭ جاڭا تەتىگى رەتىندەگى استانا پروتسەسى اياسىنداعى وڭ ناتيجەلەر ءبىزدىڭ ەلدىڭ دەربەس جانە بەيتاراپ الاڭ رەتىندە تاڭدالۋىنىڭ دۇرىستىعىن كورسەتتى جانە ونى الەمدىك قوعامداستىق مويىندادى, – دەدى قازاقستان پرەزيدەنتى.
مەملەكەت باسشىسى قازاقستاننىڭ بۇۇ قاۋىپسىزدىك كەڭەسىنىڭ توراعاسى رەتىندە قاراستىراتىن ماسەلەلەرىنە جان-جاقتى توقتالىپ, جاھاندىق ورگاننىڭ بارلىق مۇشەلەرىنىڭ ءوزارا ىمىرا مەن كونسەنسۋسكە كەلۋى ءۇشىن بەلسەندى تۇردە كۇش جۇمىلدىرۋدىڭ ماڭىزدى ەكەنىن ايتتى.
– ءبىز تاراتپاۋ رەجىمىن دايەكتى تۇردە نىعايتۋ مەن كەڭەيتۋ ارقىلى عالامدى يادرولىق قارۋدان ازات ەتۋ, سونداي-اق جاھاندىق سوعىس قاۋپىنىڭ الدىن الىپ, ونى تولىق جويۋ ءۇشىن الەمدىك قوعامداستىقتىڭ كۇش-جىگەرىن جۇمىلدىرا بەرۋگە نيەتتىمىز, – دەدى نۇرسۇلتان نازارباەۆ.
قازاقستان پرەزيدەنتى ۇلىبريتانيا جانە سولتۇستىك يرلانديا قۇراما كورولدىگىنىڭ توتەنشە جانە وكىلەتتى ەلشىسىنە ارناعان سوزىندە ەكونوميكالىق باعىت ەلىمىزدىڭ شەتەلدىك ارىپتەستەرمەن ىنتىماقتاستىعىنىڭ باستى وزەگى بولىپ سانالاتىنىن اتاپ ءوتتى.
– ەلدەرىمىزدىڭ ىنتىماقتاستىعى ءوزارا قۇرمەت پەن سەنىمگە بەرىك نەگىزدەلگەن. بۇگىندە ۇلىبريتانيا قازاقستاننىڭ ءىرى ينۆەستورلارىنىڭ جانە ساۋدا ارىپتەستەرىنىڭ ءبىرى بولىپ سانالادى, – دەدى مەملەكەت باسشىسى.
نۇرسۇلتان نازارباەۆ شۆەتسيامەن ىنتىماقتاستىقتى دامىتۋعا ايرىقشا ءمان بەرەتىنىن اتاپ ءوتىپ, شۆەتسيا ريكسداگىنىڭ سپيكەرى ۋربان ءاليننىڭ ەلىمىزگە ساپارى وتكەن جىلدىڭ باستى وقيعاسىنا اينالعانىن ايتتى.
قازاقستان پرەزيدەنتى نۇرسۇلتان نازارباەۆ پرابحات كۋماردى ءۇندىستاننىڭ شانحاي ىنتىماقتاستىق ۇيىمىنىڭ تولىق مۇشەسى بولۋىمەن قۇتتىقتاپ, قازاقستان ءۇندىستان رەسپۋبليكاسىن ماڭىزدى سىرتقى ساياسي جانە ساۋدا سەرىكتەسى رەتىندە قاراستىراتىنىن اتاپ ءوتتى.
– ەلدەرىڭىز شانحاي ىنتىماقتاستىق ۇيىمىنىڭ جۇمىسىنا تىڭ سەرپىن بەرىپ, مارتەبەسىن ارتتىرادى دەپ سەنەمىن, – دەدى مەملەكەت باسشىسى.
سونىمەن قاتار, نۇرسۇلتان نازارباەۆ سوڭعى جىلدارى قازاقستان-كۋبا قارىم-قاتىناستارى ايتارلىقتاي جاندانعانىن اتاپ ءوتىپ, ەلدەرىمىزدىڭ ساۋدا-ەكونوميكالىق جانە ساياسي ىنتىماقتاستىعىن نىعايتۋ ءۇشىن ناقتى جۇمىستاردى جالعاستىرۋ قاجەت ەكەنىن ايتتى.
سوڭىندا قازاقستان پرەزيدەنتى ديپلوماتتاردى تاعى دا قۇتتىقتاپ, الداعى جۇمىستارىنا تابىس تىلەدى.
